Breaking News : ગાય-ભેંસનું દૂધ જ નહીં, હવે દહીં અને પનીર પણ થશે મોંઘા ! જાણો કયા રાજ્યમાં વધારાયા ડેરી પ્રોડક્ટ્સના ભાવ
11 ઓગસ્ટથી ગાય અને ભેંસના દૂધના ભાવમાં પ્રતિ લિટર 2 રૂપિયાનો વધારો થવા જઈ રહ્યો છે. મુખ્ય સહકારી અને ખાનગી ડેરીઓના સંગઠને વધતા ખર્ચને ધ્યાનમાં રાખીને આ નિર્ણય લીધો છે.
મહારાષ્ટ્રમાં દૂધ ખરીદતા લોકોને હવે પોતાના બજેટમાં થોડો વધુ ખર્ચ કરવો પડશે. મહારાષ્ટ્ર રાજ્યમાં ગાય અને ભેંસના દૂધ બંનેના ભાવમાં વધારો થવાની તૈયારી છે. 11 ઓગસ્ટ, મંગળવારથી દૂધના ભાવમાં પ્રતિ લિટર 2 રૂપિયાનો વધારો થઈ શકે છે. દૂધના ભાવ વધારવાનો નિર્ણય રાજ્યની અગ્રણી સહકારી અને ખાનગી ડેરીઓના પ્રતિનિધિઓની બેઠકમાં લેવામાં આવ્યો હતો. આ બેઠક મિલ્ક પ્રોડ્યુસર એન્ડ પ્રોસેસર વેલફેર એસોસિએશન દ્વારા આયોજિત કરવામાં આવી હતી.
પેકેજિંગ ખર્ચમાં આશરે 30 ટકાનો વધારો
એસોસિએશનના જણાવ્યા અનુસાર, દૂધના ભાવમાં વધારા પાછળ ખર્ચમાં વધારો કારણભૂત છે. તાજેતરમાં ડીઝલના ભાવમાં વધારો થયો છે અને દૂધના પેકેજિંગનો ખર્ચ પણ નોંધપાત્ર રીતે વધ્યો છે. એસોસિએશન જણાવે છે કે પેકેજિંગ ખર્ચમાં લગભગ 30 ટકાનો વધારો થયો છે. વધુમાં, ડેરીઓને ખેડૂતો પાસેથી દૂધ ખરીદવા માટે પહેલા કરતા વધારે ભાવ ચૂકવવા પડી રહ્યા છે. આગામી દિવસોમાં દૂધની ખરીદી કિંમતમાં વધુ વધારો થવાની ધારણા છે.
દહીં અને પનીર પણ થશે મોંઘા
આ વધતા ખર્ચને ધ્યાનમાં રાખીને, એસોસિએશને દૂધના વેચાણ ભાવમાં પ્રતિ લિટર 2 રૂપિયાનો વધારો કરવાનો નિર્ણય લીધો છે. આનો અર્થ એ થયો કે 11 ઓગસ્ટથી મહારાષ્ટ્રમાં ગાય અને ભેંસના દૂધના ભાવમાં વર્તમાન દરથી પ્રતિ લિટર 2 રૂપિયાનો વધારો થશે. માત્ર દૂધ જ નહીં, પરંતુ અન્ય ડેરી ઉત્પાદનોના પણ વધુ મોંઘા થવાના છે. એસોસિએશને ડેરી ઉત્પાદનોના ભાવમાં 10 ટકા સુધીનો વધારો કરવાનો નિર્ણય લીધો છે. આમાં વિવિધ ડેરી પ્રોડક્ટનો સમાવેશ થઈ શકે છે. દૂધના ભાવમાં વધારાથી સામાન્ય પરિવારોના ઘરના બજેટ પર સીધી અસર પડશે. ખાસ કરીને જેઓ દરરોજ મોટી માત્રામાં દૂધ ખરીદે છે. વધુમાં દૂધના ભાવમાં વધારાથી દહીં, પનીર અને અન્ય ડેરી ઉત્પાદનોના ભાવમાં પણ વધારો થઈ શકે છે.
ઈરાન યુદ્ધને કારણે વધ્યા ભાવ?
મે મહિનાની શરૂઆતમાં, અમૂલ, મધર ડેરી, સુધા અને જયપુર ડેરીએ પણ દેશભરમાં દૂધના ભાવમાં વધારો કર્યો હતો. તે સમયે કંપનીઓએ જણાવ્યું હતું કે તેમના પર વધતા ખર્ચનો બોજ વધી રહ્યો છે. જેના કારણે ભાવમાં વધારો કરવો જરૂરી બન્યો છે. આ ભાવવધારો પણ પેટ્રોલ અને ડીઝલના ભાવમાં વધારા બાદ કરવામાં આવ્યો હતો. ઈરાન યુદ્ધને કારણે સ્ટ્રેટ ઓફ હોર્મુઝમાં જહાજોની અવરજવર પ્રભાવિત થતાં સપ્લાય પર અસર પડી હતી. હજુ સુધી ઈરાન અને અમેરિકા યુદ્ધનો અંત આવ્યો નથી. જોકે, ઓમાન અને ઈરાન વચ્ચે હોર્મુઝ સમજૂતી અંગે વાતચીત ચાલી રહી છે. જો હોર્મુઝમાં ફરીથી જહાજોની અવરજવર શરૂ થાય છે તો તેલના ભાવમાં નરમાઈ આવી શકે છે.
