Breaking News: મહારાષ્ટ્રના લાતુર જિલ્લામાં પુલ પરથી પડી કાર, એક જ પરિવારના ચાર લોકોના મોત

મહારાષ્ટ્રના લાતુર જિલ્લામાં સોમવારે એક કાર પુલ પરથી પડી ગઈ હતી, જેમાં એક પરિવારના ત્રણ બાળકો સહિત ચાર લોકોના મોત થયા અને અન્ય ત્રણ ઘાયલ થયા હતા. પોલીસે આ માહિતી આપી હતી. એક પોલીસ અધિકારીએ જણાવ્યું હતું કે, પરિવાર લગ્નમાં હાજરી આપીને પુણેથી લાતુર જિલ્લાના નિલંગા શહેરમાં પરત ફરી રહ્યો હતો ત્યારે લાતુર-ગુલબર્ગા રાષ્ટ્રીય ધોરીમાર્ગ પર સવારે લગભગ 7 વાગ્યે અકસ્માત થયો હતો.

મૃતકોમાં એક 27 વર્ષીય પુરુષ અને ત્રણ બાળકોનો સમાવેશ થાય છે, એમ અધિકારીએ જણાવ્યું હતું. બે બાળકો 10 વર્ષના હતા જ્યારે એક 15 વર્ષનો હતો. સહાયક પોલીસ નિરીક્ષક નાના લિન્ગેએ પીટીઆઈને જણાવ્યું હતું કે, “પ્રથમ દૃષ્ટિએ એવું લાગે છે કે ડ્રાઈવરે વાહન પરનો કાબૂ ગુમાવ્યો, જેના કારણે કાર પલટી ગઈ અને પુલ પરથી નીચે પડી ગઈ.”

એક દસ વર્ષની છોકરી અને 40 વર્ષની મહિલા સહિત અન્ય ઘાયલોને લાતુર શહેરની ખાનગી હોસ્પિટલમાં દાખલ કરવામાં આવ્યા છે, એમ તેમણે જણાવ્યું હતું. આ સિવાય તેમણે કહ્યું કે મૃતકો અને ઘાયલો નિલંગા અને આસપાસના ગામોના રહેવાસી છે.