Breaking News : મુંબઈના CSMT રેલવે સ્ટેશનને બોમ્બથી ઉડાવી દેવાની ધમકી, પોલીસ કંટ્રોલ રૂમમાં આવ્યો ફોન! સુરક્ષા એજન્સીઓ એલર્ટ

મુંબઈના છત્રપતિ શિવાજી મહારાજ ટર્મિનસ (CSMT) રેલવે સ્ટેશન પર બોમ્બ મૂકવામાં આવ્યો હોવાની ધમકી મળતાં સુરક્ષા તંત્રમાં દોડધામ મચી ગઈ હતી. ધમકીની જાણ થતાં જ મુંબઈ પોલીસ અને સુરક્ષા એજન્સીઓ તાત્કાલિક એલર્ટ થઈ ગઈ હતી. પરિસ્થિતિને ધ્યાનમાં રાખીને સ્ટેશન પર ડોગ સ્ક્વોડ અને બોમ્બ ડિટેક્શન એન્ડ ડિસ્પોઝલ સ્ક્વોડ (BDDS)ની ટીમને બોલાવવામાં આવી હતી. લગભગ ત્રણ કલાક સુધી સમગ્ર સ્ટેશન પરિસરમાં તપાસ કરવામાં આવી હતી. જોકે, તપાસ દરમિયાન કોઈ શંકાસ્પદ વસ્તુ કે વિસ્ફોટક સામગ્રી મળી આવી નહોતી.

પોલીસ કંટ્રોલ રૂમમાં આવ્યો ધમકીભર્યો ફોન

સૂત્રો અનુસાર, 14 નવેમ્બરના રોજ સાંજે આશરે 6:50 વાગ્યે મુંબઈ પોલીસના કંટ્રોલ રૂમમાં એક ફોન આવ્યો હતો. ફોન કરનારે CSMT રેલવે સ્ટેશન પર બોમ્બ મૂકવામાં આવ્યો હોવાની ધમકી આપી હતી. જાહેર જનતાની મોટી અવરજવર રહેતા રેલવે સ્ટેશનને નિશાન બનાવવાની ધમકી મળતાં પોલીસે આ મામલાને ગંભીરતાથી લીધો હતો. ત્યારબાદ તાત્કાલિક સુરક્ષા વ્યવસ્થા વધારી દેવામાં આવી હતી અને તપાસ શરૂ કરવામાં આવી હતી.

ડોગ સ્ક્વોડ અને બોમ્બ નિરોધક ટુકડીએ હાથ ધરી તપાસ

ધમકી મળ્યા બાદ ડોગ સ્ક્વોડ અને BDDSની ટીમ સ્ટેશન પર પહોંચી હતી. સુરક્ષા કર્મચારીઓએ સ્ટેશનના અલગ-અલગ વિસ્તારોમાં તપાસ હાથ ધરી હતી. કોઈ અનિચ્છનીય ઘટના ન બને તે માટે સમગ્ર પરિસરમાં સઘન ચેકિંગ કરવામાં આવ્યું હતું. આ તપાસ રાત્રે આશરે 9:30 વાગ્યે પૂર્ણ થઈ હતી. રાહતની વાત એ રહી કે પોલીસ અને સુરક્ષા ટીમોને તપાસ દરમિયાન કોઈ શંકાસ્પદ વસ્તુ કે વિસ્ફોટક સામગ્રી મળી નહોતી. ત્યારબાદ રેલવે પોલીસ દ્વારા સમગ્ર ઘટનાની જાણ મુખ્ય કંટ્રોલ રૂમને કરવામાં આવી હતી.

ધમકી આપનાર વ્યક્તિની શોધખોળ શરૂ

હાલમાં મુંબઈ પોલીસ ધમકીભર્યો ફોન કરનાર વ્યક્તિની ઓળખ મેળવવા તપાસ કરી રહી છે. ફોન કયા વ્યક્તિએ કર્યો હતો અને આ પ્રકારની ધમકી આપવા પાછળ તેનો હેતુ શું હતો તે જાણવાના પ્રયાસો હાથ ધરવામાં આવ્યા છે. પોલીસ દ્વારા આ મામલે વધુ તપાસ કરવામાં આવી રહી છે. જોકે, તપાસમાં કોઈ વિસ્ફોટક સામગ્રી ન મળતાં સુરક્ષા એજન્સીઓએ રાહતનો શ્વાસ લીધો છે.

આ પણ વાંચો, Breaking News : પુણેમાં ઉડાન ભર્યા બાદ વિમાનનાં લેન્ડિંગ ગિયર ફસાયા, એરપોર્ટ પર સંપૂર્ણ ઇમરજન્સી જાહેર! 192 મુસાફરોનો આબાદ બચાવ