Breaking Pakistan Train Hijack : 104 બંધકોને બચાવી લેવામાં આવ્યા, 16 BLA લડવૈયા ઠાર

પાકિસ્તાનમાં એક ગંભીર ઘટના સામે આવી છે. બલૂચ લિબરેશન આર્મી (BLA) એ જાફર એક્સપ્રેસ ટ્રેનનું અપહરણ કરી મુસાફરોને બંધક બનાવ્યા હતા. આ દુષ્કૃત્ય દરમિયાન પાકિસ્તાની સેનાએ ત્વરિત કાર્યવાહી હાથ ધરી અને 104 બંધકોને સુરક્ષિત રીતે મુક્ત કરાવ્યા. આ કામગીરી દરમિયાન 16 BLA લડવૈયાઓ માર્યા ગયા હતા અને સંઘર્ષ હજુ ચાલુ છે.

શું હતો ઘટનાનો ક્રમ ?

BLA દ્વારા જાફર એક્સપ્રેસ ટ્રેનનું અપહરણ કરવામાં આવ્યું હતું. આ ટ્રેન ક્વેટાથી પેશાવર જતી હતી અને બોલાન નજીક હાઇજેક કરવામાં આવી. BLA લડવૈયાઓએ ટ્રેન રોકવા માટે રેલ્વે ટ્રેક ઉડાવી દીધા અને ટ્રેનને ટનલમાં લઈ જવામાં આવી. ટ્રેનમાં લગભગ 450 મુસાફરો હતા, જેમાંથી 140 પાકિસ્તાની સૈનિકો પણ સામેલ હતા. BLA એ તેમને બંધક બનાવી લીધા હતા અને પાકિસ્તાને જોابی કાર્યવાહી કરતા, 104 મુસાફરોને સુરક્ષિત રીતે છોડાવવામાં આવ્યા.

સેનાની કાર્યવાહિ અને તાજેતરના સમાચાર

સુરક્ષા દળોએ તાત્કાલિક એક્શન લેતા 104 મુસાફરોને સુરક્ષિત બહાર કાઢ્યા, જેમાં 58 પુરુષો, 31 મહિલાઓ અને 15 બાળકોનો સમાવેશ થાય છે. આ દરમિયાન, સેનાની કાર્યવાહિમાં 16 BLA લડવૈયાઓ માર્યા ગયા છે અને અનેક આતંકીઓ ઘાયલ થયા છે. બીજી તરફ, BLA એ દાવો કર્યો છે કે 30 પાકિસ્તાની સૈનિકો માર્યા ગયા છે.

BLA અને પાકિસ્તાની સેના વચ્ચે સંઘર્ષ ચાલુ

સેનાની કાર્યવાહિ પછી BLA લડવૈયાઓ નાના જૂથોમાં વહેંચાઈ ગયા છે. ઘાયલ મુસાફરોને નજીકની હોસ્પિટલમાં દાખલ કરવામાં આવ્યા છે અને સુરક્ષા દળોએ સમગ્ર વિસ્તારમાં સખત સુરક્ષા વ્યવસ્થા ગોઠવી છે. પાકિસ્તાની સેનાએ હવાઈ હુમલાની તૈયારી કરી હતી, પરંતુ BLA લડવૈયાઓએ ધમકી આપી હતી કે જો હવાઈ હુમલો થશે, તો તમામ 140 સૈનિકોની હત્યા કરી દેવામાં આવશે.

BLA અને અન્ય બળવાખોર જૂથોની સક્રિયતા

તાજેતરમાં, BLA સહિતના બલૂચ બળવાખોર જૂથોએ પાકિસ્તાન અને ચીન સામે મોટા હુમલાઓની જાહેરાત કરી હતી. સિંધી અને બલૂચ સંગઠનો હવે એક થઈ રહ્યા છે, જેનાથી CPEC પ્રોજેક્ટ અને અન્ય પાકિસ્તાની પ્રવૃત્તિઓને ગંભીર ખતરો ઉભો થયો છે. ગયા મહિને BRAS (Baloch Raji Ajoi Sangar) ની બેઠકમાં મોટી યોજના ઘડીને આ હુમલો કરવામાં આવ્યો હોવાનો અંદાજ છે.

શાહબાઝ સરકાર માટે નવી મુશ્કેલી

આ ટ્રેન હાઇજેકની ઘટના બાદ પાકિસ્તાનની શાહબાઝ સરકાર માટે નવી સમસ્યાઓ ઉભી થઈ છે. BLA અને અન્ય બળવાખોર જૂથોની સક્રિયતાને પગલે, દેશમાં આતંકવાદ વિરુદ્ધ લડતને વધુ મજબૂત બનાવવાની જરૂરિયાત ઉભી થઈ છે. સુરક્ષા દળોએ બચાવ કામગીરીને વધુ મજબૂત બનાવી છે અને ખૂણેખૂણે આતંકીઓની શોધખોળ કરી રહી છે.

આ ઘટના પાકિસ્તાન માટે એક મોટો સંકટ છે અને ભવિષ્યમાં આતંકવાદ વિરુદ્ધ લડતમાં કઈ નવી વ્યૂહરચના અપનાવવામાં આવશે તે જોવાનું રહેશે.