નિવૃત્તિની ઉંમર વધારવા માટે વારંવાર અવાજ ઉઠાવવામાં આવે છે, પરંતુ ફ્રાન્સમાં લોકો નિવૃત્તિની ઉંમર ઘટાડવા માટે રસ્તા પર ઉતરી રહ્યા છે. હાલમાં સરકાર અને જનતા વચ્ચે ખેંચતાણ ચાલી રહી છે. મીડિયાને ટાંકીને જે તસવીરો સામે આવી છે, તેમાં લોકો રસ્તા પર વિરોધ કરતા જોવા મળે છે. ફ્રાન્સના રાષ્ટ્રપતિ ઈમેન્યુઅલ મેક્રોનનું કહેવું છે કે પેન્શન સિસ્ટમને સંતુલિત કરવા માટે આ સુધારો જરૂરી છે. આંતરરાષ્ટ્રીય સમાચાર અહીં વાંચો.
મીડિયા રિપોર્ટ્સ અનુસાર, પેન્શન સિસ્ટમમાં સુધારા માટે ફ્રાંસના રાષ્ટ્રપતિ ઈમેન્યુઅલ મેક્રોન દ્વારા ગૃહમાં રજૂ કરવામાં આવેલા બિલને મંજૂરી આપવામાં આવી છે. ગયા શનિવારે મોડી રાત્રે આ બિલ અંગે સેનેટમાં મતદાન થયું હતું. તમને જણાવી દઈએ કે આ બિલનો દેશભરમાં વિરોધ થઈ રહ્યો છે. પેરિસમાં ઘણા લોકોએ સરકારના નિર્ણયનો વિરોધ કર્યો હતો. પેરિસ પોલીસ સાથેની અથડામણમાં ઓછામાં ઓછા 120 લોકોની ધરપકડ કરવામાં આવી હતી.
જ્યારે સફાઈ કામદારોએ બિલના વિરોધ મામલે તેમની હડતાલ ચાલુ રાખી છે, ત્યારે વિદ્યાર્થીઓએ સંસદના નીચલા ગૃહ તરફ કૂચ કરવાની યોજના બનાવી છે, કારણ કે બિલના વિરોધીઓ સરકાર પર પીછેહઠ કરવા દબાણ કરી રહ્યા છે. બુધવારે, દેશભરમાં લગભગ 5,00,000 લોકોએ વિરોધ કર્યો.
ફ્રેન્ચ અર્થતંત્રને વધુ સ્પર્ધાત્મક બનાવવાના તેમના વિઝનને ધ્યાનમાં રાખીને, મેક્રોન આ પેન્શન સુધારા બિલ દ્વારા આગળ વધવા માગતા હતા. વિવિધ કર્મચારી યુનિયનોએ બુધવારે રાત્રે સાંસદોને બિલના વિરોધમાં મતદાન કરવાની અપીલ કરી હતી. જો તે કાયદો બને તો ફ્રેન્ચ નાગરિકો અને અર્થવ્યવસ્થા પર તેની અસરોની આશંકાને કારણે ડાબેરી અને જમણેરી સાંસદો તેનો વિરોધ કરી રહ્યા છે, જ્યારે કન્ઝર્વેટિવ સાંસદો તેના પર વિભાજિત હતા.
આ સુધારાઓ હેઠળ, નિવૃત્તિ વય 62 થી વધારીને 64 વર્ષ કરવામાં આવશે, જેનો લોકો ઘણા અઠવાડિયાથી રસ્તાઓ પર વિરોધ કરી રહ્યા છે. સેનેટરોએ સુધારાને 112 વિરુદ્ધ 195 મતોથી પસાર કર્યો છે. એક સમિતિ હવે અંતિમ ડ્રાફ્ટ તૈયાર કરશે, જેને અંતિમ મત માટે સેનેટ અને નેશનલ એસેમ્બલી બંને સમક્ષ રજૂ કરવામાં આવશે.
મીડિયા રિપોર્ટ્સ અનુસાર, ફ્રાન્સના મોટાભાગના કર્મચારીઓના સંગઠનો આ બિલનો વિરોધ કરી રહ્યા છે. તેમનું કહેવું છે કે આનાથી મધ્યમ વર્ગ પર ટેક્સ વધશે. વાસ્તવમાં લોકો આવું એટલા માટે કહી રહ્યા છે કારણ કે હવે તેમને પેન્શન મેળવવા માટે વધુ વર્ષો સુધી કામ કરવું પડશે અને પછી તેમને તેમના પગારમાંથી ભારે ટેક્સ ચૂકવવો પડશે.
(ઇનપુટ-ભાષાંતર)
Published On - 4:11 pm, Fri, 17 March 23