Breaking News : કેનેડામાં વર્ક પરમિટના નિયમો વધુ કડક, IRCCએ જાહેર કર્યા નવા નિયમો
કેનેડાના C20 વર્ક પરમિટ નિયમોમાં IRCC દ્વારા મહત્વપૂર્ણ ફેરફારો જાહેર કરાયા છે. હવે આ પરમિટ માત્ર એવા વિદેશી કર્મચારીઓને મળશે જેઓ વિદેશમાં સમાન કંપનીમાં કામ કરતા હોય અને કેનેડામાં ટ્રાન્સફર થાય.
કેનેડામાં નોકરી કરવાની યોજના બનાવી રહેલા ભારતીયો સહિત વિદેશી કામદારો માટે મહત્વપૂર્ણ સમાચાર સામે આવ્યા છે. કેનેડાની ઇમિગ્રેશન, રેફ્યુજીસ એન્ડ સિટીઝનશિપ કેનેડા (IRCC)એ વર્ક પરમિટ સંબંધિત નિયમોમાં મહત્વપૂર્ણ ફેરફાર કર્યો છે. ખાસ કરીને C20 ‘રિસિપ્રોકલ એમ્પ્લોયમેન્ટ વર્ક પરમિટ’ માટેની પાત્રતાના નિયમો હવે વધુ કડક બનાવવામાં આવ્યા છે. આ સુધારેલી માર્ગદર્શિકા 29 જુલાઈ, 2026થી અમલમાં આવી છે.
શું બદલાયું?
નવી માર્ગદર્શિકા અનુસાર હવે C20 વર્ક પરમિટ માત્ર એવા વિદેશી કર્મચારીઓને જ મળશે, જે પહેલેથી જ વિદેશમાં તે જ કંપનીમાં કાર્યરત હોય અને ત્યારબાદ કંપની તેમને કેનેડાની ઓફિસમાં ટ્રાન્સફર કરતી હોય. એટલે કે, કેનેડા પહોંચ્યા પછી જે લોકો નવી નોકરી શરૂ કરશે, તેઓ હવે C20 શ્રેણી હેઠળ વર્ક પરમિટ મેળવવા માટે પાત્ર ગણાશે નહીં.
સરળ શબ્દોમાં કહીએ તો, જો કોઈ વ્યક્તિ કેનેડા પહોંચ્યા પછી પ્રથમ વખત કંપનીમાં જોડાય છે, તો તેને C20 વર્ક પરમિટનો લાભ મળશે નહીં.
IRCCએ આ નિર્ણય શા માટે લીધો?
IRCCના જણાવ્યા મુજબ C20 વર્ક પરમિટનો મુખ્ય હેતુ કેનેડિયન અને વિદેશી કર્મચારીઓ વચ્ચે જ્ઞાન, અનુભવ અને વ્યાવસાયિક કુશળતાનું આદાન-પ્રદાન વધારવાનો છે. જો કોઈ કર્મચારી કેનેડા આવ્યા બાદ જ કંપનીમાં જોડાય, તો આવા જ્ઞાન અને અનુભવના વિનિમયનો હેતુ પૂર્ણ થતો નથી. તેથી આ પ્રકારના અરજદારોને હવે C20 મુક્તિ હેઠળ પાત્ર માનવામાં આવશે નહીં.
C20 વર્ક પરમિટ શું છે?
C20 વર્ક પરમિટ કેનેડાના ઇન્ટરનેશનલ મોબિલિટી પ્રોગ્રામ (IMP) હેઠળ આપવામાં આવે છે. આ કેટેગરીમાં પાત્ર ઉમેદવારોને લેબર માર્કેટ ઇમ્પેક્ટ એસેસમેન્ટ (LMIA) વગર વર્ક પરમિટ મળી શકે છે.
સામાન્ય રીતે કેનેડામાં કોઈ પણ વિદેશી કર્મચારીને નોકરી પર રાખતા પહેલાં કંપનીએ LMIA મેળવવું પડે છે. LMIA દ્વારા સરકાર ખાતરી કરે છે કે તે નોકરી માટે કોઈ યોગ્ય કેનેડિયન નાગરિક અથવા કાયમી નિવાસી ઉપલબ્ધ નથી.
કોને થશે સૌથી વધુ અસર?
આ નવા નિયમોની અસર મુખ્યત્વે બહુરાષ્ટ્રીય કંપનીઓ, શૈક્ષણિક સંસ્થાઓ, સરકારી સંગઠનો અને આંતરરાષ્ટ્રીય એનજીઓમાં કામ કરતા કર્મચારીઓ પર પડશે. ખાસ કરીને એવા લોકો, જેઓ સીધા કેનેડા જઈને નવી નોકરી શરૂ કરવાની યોજના બનાવી રહ્યા હતા, તેમના માટે હવે C20 વર્ક પરમિટ મેળવવી વધુ મુશ્કેલ બનશે.
જોકે, ઇન્ટરનેશનલ એક્સપિરિયન્સ કેનેડા (IEC) પ્રોગ્રામ હેઠળ આપવામાં આવતી વર્ક પરમિટ પર આ નવા નિયમોની કોઈ અસર થશે નહીં, કારણ કે તે અલગ ઇમિગ્રેશન જોગવાઈ હેઠળ કાર્ય કરે છે.
C20 માટે પાત્ર ન હોય તો શું કરવું?
જો કોઈ વિદેશી કર્મચારી C20 અથવા ઇન્ટરનેશનલ મોબિલિટી પ્રોગ્રામની અન્ય કોઈ કેટેગરી હેઠળ પાત્ર ન હોય, તો કંપનીએ ટેમ્પરરી ફોરેન વર્કર પ્રોગ્રામ (TFWP) હેઠળ ભરતી પ્રક્રિયા કરવી પડશે.
આ સ્થિતિમાં કંપનીએ સૌપ્રથમ LMIA મેળવવું ફરજિયાત રહેશે. LMIA મેળવવાની પ્રક્રિયામાં વધારાનો સમય અને ખર્ચ થાય છે. ઉપરાંત, જ્યાં બેરોજગારીનો દર 6 ટકા અથવા તેથી વધુ હોય, ત્યાં સરેરાશ સ્થાનિક વેતનના 120 ટકા કરતાં ઓછા પગારવાળી જગ્યાઓ માટે LMIA મેળવવું પણ વધુ મુશ્કેલ બની શકે છે.
વધુ મહત્વનું શું છે?
જો તમે કેનેડામાં નોકરી કરવા ઇચ્છો છો અથવા કોઈ બહુરાષ્ટ્રીય કંપની મારફતે કેનેડામાં ટ્રાન્સફર થવાની યોજના બનાવી રહ્યા છો, તો IRCCના આ નવા નિયમો વિશે સંપૂર્ણ માહિતી રાખવી જરૂરી છે. કારણ કે હવે C20 વર્ક પરમિટ મેળવવા માટે માત્ર કેનેડામાં નોકરી મળવી પૂરતી નથી, પરંતુ તે જ કંપનીમાં અગાઉથી વિદેશમાં કાર્યરત હોવું પણ ફરજિયાત બની ગયું છે.
કેનેડામાં પાર્ટ-ટાઇમ નોકરી કરતા વિદ્યાર્થીઓ માટે IRCCની મહત્વપૂર્ણ એડવાઇઝરી
