તાલિબાન સભ્યનો ઈન્ટરવ્યુ લઈને ચર્ચામાં આવનાર મહિલા પત્રકારે છોડયું અફઘાનિસ્તાન, કહ્યું- જો પરિસ્થિતિ સુધરશે તો હું પરત આવીશ

તાલિબાનના (Taliban) સભ્યનો ઈન્ટરવ્યુ લઈને ચર્ચામાં આવેલી અફઘાન મહિલા પત્રકાર (Afghan woman journalist) દેશ છોડી દીધો છે. બેહેસ્તા અરખંડ (Behesta Arghand) નામની આ પત્રકાર સ્થાનિક મીડિયામાં કામ કરતી હતી.  હકીકતમાં, કાબુલ (Kabul) કબજે કર્યાના બે દિવસ પછી 17 ઓગસ્ટના રોજ અરખંદે તાલિબાનના વરિષ્ઠ સભ્યનો ઇન્ટરવ્યૂ લીધો હતો.

તેમણે નેતાને કાબુલમાં ઘરની શોધખોળ અને ભવિષ્ય માટે તાલિબાનની યોજનાઓ વિશે પ્રશ્નો પૂછ્યા હતા. આ મુલાકાત ઐતિહાસિક રહી હતી, કારણ કે તે અફઘાન સમાચાર નેટવર્ક પર તાલિબાન નેતાનો ઇન્ટરવ્યૂ લેનારી પ્રથમ મહિલા પત્રકાર હતી.

આ ઇન્ટરવ્યૂની તસ્વીર પણ સોશિયલ મીડિયા પર ખૂબ વાયરલ થઈ હતી, જેણે 24 વર્ષીય બેહેસ્તા અરખંડને સ્ટાર બનાવી હતી. જોકે, હવે તાલિબાનોના ડરથી અરખંડ ઘરે પરત ફરી છે. તેણે એક મહિના અને 20 દિવસ સુધી સ્થાનિક મીડિયામાં કામ કર્યું હતું અને તે પછી તાલિબાને સત્તા સંભાળી હતી.

પરત ફરવાને લઈને શું કહ્યું?

મીડિયા રિપોર્ટ્સ અનુસાર, તેણીએ કહ્યું હતું કે, જો અફઘાનિસ્તાનમાં પરિસ્થિતિ સુધરે અને તાલિબાન તેમના વચન પ્રમાણે રહે તો તેઓ પાછા આવી શકે છે. આ સમાચાર એવા સમયે સામે આવ્યા છે જ્યારે થોડા દિવસો પહેલા કાબુલના મધ્ય રસ્તા પર સ્થાનિક મીડિયામાં કામ કરતા એક રિપોર્ટર અને કેમેરામેનને માર માર્યો હોવાના સમાચાર પ્રકાશમાં આવ્યા હતા. આ રિપોર્ટર દેશમાં ફેલાયેલી ગરીબી પર રિપોર્ટિંગ કરી રહ્યા હતા. આવી સ્થિતિમાં અત્યારે અફઘાનિસ્તાનની સ્થિતિ ખૂબ નાજુક રહે છે.

એક તરફ, જ્યારે તાલિબાન મીડિયાની સ્વતંત્રતાની વાત કરી રહ્યું છે, તો બીજી બાજુ, પત્રકારો પર ધમકીઓ અને હુમલાના અહેવાલો પણ સતત સામે આવી રહ્યા છે. તાજેતરમાં, એક વીડિયો પણ સામે આવ્યો છે જેમાં એક ટીવી પત્રકાર બળજબરીથી ‘ગન પોઇન્ટ’ પર તાલિબાનની પ્રશંસા કરી રહ્યો છે. આ વીડિયો સોશિયલ મીડિયા પર વધુને વધુ વાયરલ થઈ રહ્યો છે.

અમેરિકન સૈનિકોની પાછી ખેંચવાની પ્રક્રિયા પૂર્ણ થયા બાદ તાલિબાન હવે અફઘાનિસ્તાનમાં શાસન કરવાની સંપૂર્ણ તૈયારીમાં છે. સંસ્થા ટૂંક સમયમાં નવા મંત્રીમંડળની જાહેરાત કરી શકે છે. દરમિયાન, તાલિબાનના ઉચ્ચ શિક્ષણ મંત્રાલયના કાર્યકારી વડા અબ્દુલ બાકી હક્કાનીએ કહ્યું છે કે તાલિબાન શાસન હેઠળ અફઘાનિસ્તાનની યુનિવર્સિટીઓમાં છોકરાઓ અને છોકરીઓ અલગ વર્ગખંડમાં અભ્યાસ કરશે. અફઘાનિસ્તાનમાં તાલિબાનના કબજા બાદ છોકરીઓના શિક્ષણ અને સ્વતંત્રતા અંગે મોટી શંકા ઉભી થઈ રહી છે.

આ  પણ વાંચો : સરકારને જાણ કર્યા વગર ગુપ્ત મુલાકાત પર અમેરિકી સાંસદ પહોંચ્યા કાબુલ એરપોર્ટ, પરત જઈને કર્યા ચોંકાવનારા ખુલાસાઓ

આ પણ વાંચો :Afghanistan Crisis: તાલિબાને કહ્યુ ભારત અમારા માટે મહત્વનુ, વ્યાપારી અને રાજનૈતિક સબંધો જાળવી રખાશે, શું ભારત તાલિબાન શાસનને માન્યતા આપશે ?