વડોદરા શહેર પોલીસે ગુરુવાર સાંજે દિવાળી પહેલા જ દિવાળીની ઉજવણી કરી. બંદોબસ્ત અને લોકોની સુરક્ષામાં વ્યસ્ત પોલીસ કોઈ તહેવારો ઉજવી ન શકતી નથી. જેથી ગુરુવારે વારસિયા પોલીસ અને તેઓના અધિકારીઓએ પ્રેમદાસ વૃદ્ધાશ્રમમાં દિવાળીના તહેવારની ધામધૂમ પૂર્વક ઉજવણી કરી. વૃદ્ધો સાથે પોલીસના સ્ટાફે ફટાકડા ફોડી, ગીતો ગાઈ અને એકબીજાને મીઠાઈ ખવડાવી દિવાળી પહેલા જ દિવાળીની ઉજવણી કરી.
શહેરીજનો દ્વારા દિવાળી પર્વ અને નવા વર્ષની ઉજવણી કરવા માટે તડામાર તૈયારીઓ શરૂ કરી દેવાઇ છે. ત્યારે વૃદ્ધાશ્રમમાં દિવસો પસાર કરી રહેલા વૃદ્ધો પણ પરિવાર સાથે દીપાવલી પર્વની ઉજવણીના આનંદનો અહેસાસ કરી શકે, તેવી ઉત્કૃષ્ટ ભાવના સાથે શહેર પોલીસ તંત્રની શી ટીમ દ્વારા વારસીયાના વૃદ્ધાશ્રમમાં જઇ ફટાકડા ફોડીને દિવાળી પર્વની ઉજવણી કરવામાં આવી હતી.
તે સાથે ઉચ્ચ પોલીસ અધિકારીએ ભજન અને ગીતોની વૃદ્ધાશ્રમમાં રમઝટ બોલાવી હતી. અને, વૃદ્ધજનોને પોતાના પરિવાર જેવો માહોલ ઉભો કરાયો હતો. હર્ષના આંસુ સાથે વૃદ્ધોએ જણાવ્યું કે, આજે અમને એવું લાગે છે કે, બીજા શહેરોમાં નોકરી કરતા અમારા પરિવારજનો દીપાવલી પર્વની ઉજવણી કરવા આવ્યા છે.
મદદનીશ પોલીસ કમિશનર “જી” ડીવીઝન પી.આર. રાઠોડે પોતાના સુમધૂર કંઠે ભજનો અને ગીતો ગાઇને વૃદ્ધોને મંત્રમુગ્ધ કરી દીધા હતા. પોલીસ અધિકારીના કર્ણપ્રિય ભજનો અને ગીતો સાંભળી સિનિયર સિટીઝનો ભાવવિભોર થઇ ગયા હતા અને પોલીસ અધિકારીના કંઠે ગવાઇ રહેલા ભજનો-ગીતો સાથે તાલ મિલાવી ઝૂમી ઉઠ્યા હતા.