Surat: સી. આર. પાટીલની અધ્યક્ષતામાં આજે પ્રદેશ ભાજપની કારોબારી, 1 હજારથી વધુ આગેવાનો ભાગ લેશે

વિધાનસભાની ચૂંટણી (Gujarat Assembly Election 2022) પહેલાં આજે સુરત (Surat) માં પ્રદેશ ભાજપની કારોબારી બેઠક મળી રહી છે. ભાજપ (BJP) અધ્યક્ષ સી. આર. પાટીલની અધ્યક્ષતામાં કારોબારી બેઠક શરૂ થઈ છે. આ બેઠકમાં મુખ્યમંત્રી, મંત્રીમંડળના સભ્યો, ધારાસભ્યો, સાંસદો, પ્રદેશ હોદેદારો મળીને 1 હજારથી વધુ આગેવાનો ભાગ લઇ રહ્યા છે. સવારે 10 કલાકે કારોબારીનો પ્રારંભ થયો હતો. આ બેઠકમાં પ્રભારી ભૂપેન્દ્ર યાદવ પણ માર્ગદર્શન આપશે. કારોબારીમાં કેન્દ્ર – રાજય સરકારને બિરદાવતો રાજકીય પ્રસ્તાવ પાસ થશે. કેન્દ્રની આર્થિક યોજનાઓ અંગે પ્રસ્તાવ રજૂ થશે. આ ઉપરાંત હૈદરાબાદમાં થયેલી કારોબારી બેઠકમાં લેવાયેલા નિર્ણયોની જાણકારી કાર્યકર્તાઓને આપવામાં આવશે. અહીં આવેલા સભ્યોને વિવિધ વિધાનસભા બેઠક વિસ્તારમાં જઈ વિસ્તારક તરીકે કામ કરવા સૂચના આપવામાં આવશે.

બેઠકમાં ડિજિટલાઇઝેશનનો ઉપયોગ થઈ રહ્યો છે. તમામ હોદેદારોની કયુઆર કોડથી એન્ટ્રી કરાઈ છે. સભા સ્થળે PM નરેન્દ્ર મોદીની ખાસ રંગોળી તૈયાર કરવાઈ છે. આ ઉપરાંત PM મોદી, અમિત શાહ સહિત રાષ્ટ્રીય નેતાઓના કટ આઉટ તૈયાર કરાયાં છે. સુરતમાં 72 ફૂટના ડોમમાં આ બેઠક યોજાઈ રહી છે. સભા સ્થળે PMની 3D હોલોગ્રામ ઇફેક્ટ મુકાઈ છે. પીએમની ફોલોગ્રામ ઇફેક્ટ પાસે ભાજપ કાર્યકરો ફોટો પડાવી રહ્યાં છે. 2012માં આ ટેક્નોલોજીનો પહેલીવાર ઉપયોગ કરાયો હતો. પીએમ મોદીએ એક સ્થળે રહી 100થી વધુ સ્થળે એક સાથે ભાષણ કર્યું હતું.

વિધાનસભાની ચૂંટણી પહેલાંની આ બેઠક છે. મુખ્યમંત્રી ભૂપેન્દ્ર પટેલ ઉપરાંત કેન્દ્રીય નેતા પુરુષોત્તમ રૂપાલા અને મનસુખ માંડવિયા પણ ઉપસ્થિત રહ્યા છે. આગામી સમયના કાર્યક્રમો અંગે પણ ચર્ચા કરાશે. વર્તમાન સરકારની આ અંતિમ કારોબોરી છે. આમાં નીતિન પટેલ પણ ઉપસ્થિત રહ્યા છે. નીતિન પટેલે જણાવ્યું કે ભાજપનું સંગઠન ખુબ મજબુતાઈ પૂર્વક રાજ્ય અને દેશનો વિકાસ કરવા માટે કાર્ય કરે છે. ટુંક સમયમાં વિધાનસભાની ચૂંટણી આવી રહી છે ત્યારે એક એક ગામડાં સુધી રાજ્ય અને કેન્દ્ર સરકારની કામગીરી પ્રજા સુધી પહોંચે તે માટે આમારા કાર્યકર્તા સક્રિયતાથી કામ કરતા હોય છે. તેમને હૈદરાબાદમાં થયેલી કારોબારી બેઠકમાં લેવાયેલા નિર્ણયોની જાણકારી કાર્યકર્તાઓને આપવામાં આવશે. અહીં આવેલા સભ્યોને વિવિધ વિધાનસભા બેઠક વિસ્તારમાં જઈ વિસ્તારક તરીકે કામ કરવા સૂચના આપવામાં આવશે.