26 સપ્ટેમ્બરના મહત્વના સમાચાર : આજે 8 રાજ્યોમાં IMDની ભારે વરસાદની ચેતવણી, ઉત્તરાખંડના 5 જિલ્લામાં અતિભારે વરસાદનું રેડ એલર્ટ

અમરેલીના રાજુલા તાલુકામાં ગણેશ વિસર્જન સમયે દુર્ઘટના સર્જાઈ છે. ચાંચબંદર ગામ નજીક ગણેશ વિસર્જન દરમિયાન ચાર યુવકો દરિયામાં ડૂબ્યા હતા. ઘટનાની જાણ થતાં સ્થાનિકો અને બચાવ ટીમે તાત્કાલિક રેસ્ક્યૂ કામગીરી હાથ ધરી હતી, જેમાં ત્રણ યુવકોને સલામત રીતે બહાર કાઢવામાં આવ્યા હતા. જોકે, એક યુવક દરિયામાં ડૂબી ગયો હતો. શોધખોળ બાદ યુવકનો મૃતદેહ દરિયામાંથી મળી આવ્યો હતો. ઘટનાને પગલે વિસ્તારમાં શોકનો માહોલ છવાયો છે.

દેશના અનેક રાજ્યોમાં હાલ ભારે વરસાદનો માહોલ જોવા મળી રહ્યો છે. હવામાન વિભાગે આજે 8 રાજ્યોમાં ભારે વરસાદની ચેતવણી જાહેર કરી છે. ઉત્તરાખંડના 5 જિલ્લામાં અતિભારે વરસાદને પગલે રેડ એલર્ટ જાહેર કરાયું છે. પિથોરાગઢ અને નૈનીતાલમાં વરસાદની આગાહીને ધ્યાનમાં રાખીને શાળા-કોલેજો આવતીકાલ સુધી બંધ રાખવાનો નિર્ણય લેવાયો છે. ઉત્તર પ્રદેશના 36 જિલ્લાઓમાં પણ અતિભારે વરસાદનું રેડ એલર્ટ જાહેર કરવામાં આવ્યું છે અને અનેક વિસ્તારોમાં શાળાઓમાં રજા જાહેર કરાઈ છે. બીજી તરફ બિહારમાં કોસી નદી ગાંડીતૂર બનતા સરકારી કર્મચારીઓની રજાઓ રદ કરવામાં આવી છે. છત્તીસગઢના બસ્તર વિસ્તારમાં ભારે વરસાદથી જળબંબાકારની સ્થિતિ સર્જાતા ડેમના દરવાજા ખોલવામાં આવ્યા છે. જ્યારે ઓડિશામાં ભારે વરસાદને પગલે લગભગ 10 હજાર લોકોને સલામત સ્થળે ખસેડવામાં આવ્યા છે. ભારે વરસાદને કારણે અનેક રાજ્યોમાં જનજીવન પ્રભાવિત થયું છે અને તંત્ર દ્વારા રાહત-બચાવ કામગીરી તેજ કરવામાં આવી છે.