22 ઓગસ્ટના મહત્વના સમાચાર : મહેસાણામાં દારૂના દૂષણ સામે પોલીસની કડક ઝૂંબેશ, ડ્રોનની મદદથી દારૂના અડ્ડાઓ પર પોલીસે પાડ્યા દરોડા

રાજકોટના ભાદર-2 ડેમમાંથી સિંચાઈ માટે 100 ક્યુસેક પાણી છોડવામાં આવ્યું છે. પૂર્વ MLA લલિત વસોયાએ ખેડૂતોના હિતમાં ડેમમાંથી પાણી છોડવાની માંગ કરી હતી અને આ અંગે 8 ઓગસ્ટે મુખ્યમંત્રીને પત્ર લખી રજૂઆત કરી હતી. તેમની માંગને ધ્યાને લઈ તંત્ર દ્વારા ભાદર-2 ડેમમાંથી પાણી છોડવાનો નિર્ણય લેવાયો છે. પાણી છોડાતા ભાદર કેનાલ કાંઠાના ખેડૂતોને સિંચાઈ માટે મોટો લાભ મળશે.

ગીર-સોમનાથ જિલ્લાના વેરાવળ તાલુકાના મંડોર ગામે રસ્તા પર સિંહ અને સિંહણ આવી ચડ્યા. શિકારની શોધમાં સિંહ અને સિંહણ માનવ વસતી સુધી પહોંચ્યા હતા. મંડોર-ભેરાળા રોડ પરથી પસાર થઈ રહેલા વાહનચાલકોએ જ્યારે રસ્તા વચ્ચે સિંહ અને સિંહણને લટાર મારતા જોયા ત્યારે વાહન રોકીને આ અદ્ભુત દ્રશ્યને કેમેરામાં કેદ કર્યા.

ભાવનગરના દારૂકાંડની તપાસમાં હવે સિહોર તાલુકા સુધી પોલીસ કાર્યવાહી પહોંચી છે. સિહોર પોલીસે પ્રવીણ જાદવ અને અશ્વિન જાદવ નામના બે શખ્સોની ધરપકડ કરી છે. પ્રાથમિક પૂછપરછમાં બંનેએ વરતેજના હરદીપ મોરી પાસેથી રોયલ સ્ટેગ દારૂની 54 બોટલ ખરીદી હોવાનું સામે આવ્યું છે. દારૂકાંડ સર્જાયા બાદ બંને આરોપીઓએ સર અને સાગવાડીના ડુંગર નજીક દારૂનો નાશ કર્યો હોવાનું પણ તપાસમાં બહાર આવ્યું છે. પોલીસે બંનેની ધરપકડ કરી વધુ પૂછપરછ હાથ ધરી છે.

અમેરિકાના ન્યૂયોર્કમાં ભારે વાવાઝોડા બાદ ધોધમાર વરસાદ વરસતા અનેક વિસ્તારોમાં જળબંબાકારની સ્થિતિ સર્જાઈ છે. ભારે વરસાદને કારણે રસ્તાઓ પર નદીની જેમ પાણી વહેતા જોવા મળ્યું હતું. એમ્પાયર સ્ટેટના કેટલાક વિસ્તારો પાણીમાં ગરકાવ થયા છે, જ્યારે લોંગ આઇલેન્ડમાં 2.87 ઈંચ વરસાદ ખાબકતા પૂર જેવી સ્થિતિ સર્જાઈ છે. ક્વીન્સ અને બ્રુકલિનના અનેક રસ્તાઓ પર પાણી ભરાઈ જતા વાહનચાલકોને ભારે મુશ્કેલીનો સામનો કરવો પડી રહ્યો છે.

સાબરકાંઠાના હિંમતનગરમાં કેનેડાના વર્ક વિઝા અપાવવાના નામે કરોડોની છેતરપિંડીનો મામલો સામે આવ્યો છે. આરોપી પ્રીતિ વ્યાસે રાજ્યના અનેક લોકોને કેનેડાના વર્ક વિઝા અપાવવાની લાલચ આપી પીડિતો પાસેથી રૂ.25-25 લાખ જેટલી રકમ ઉઘરાવી હોવાનું સામે આવ્યું છે. છેતરપિંડી બાદ આરોપી છેલ્લા દોઢ મહિનાથી ફરાર છે. સમગ્ર મામલે છેતરપિંડીનો ભોગ બનેલા પીડિતોએ SPને રજૂઆત કરી આરોપી પ્રીતિ વ્યાસની તાત્કાલિક ધરપકડ કરવાની માગ સાથે આવેદનપત્ર પાઠવ્યું છે.

મહેસાણામાં દારૂના દૂષણને ડામવા પોલીસે કડક ઝુંબેશ હાથ ધરી છે. પોલીસ દ્વારા ડ્રોનની મદદથી દારૂના અડ્ડાઓ પર નજર રાખી દરોડા પાડવામાં આવ્યા હતા. છેલ્લા 24 કલાક દરમિયાન પોલીસે દારૂ સંબંધિત કુલ 13 કેસ નોંધી કાર્યવાહી કરી છે.