ગુજરાતના (Gujarat) પાટનગર ગાંધીનગરમાં (Gandhinagar) 15મી જૂને એક લૂંટનો (Robbery)બનાવ સામે આવ્યો હતો. જોકે પોલીસે ગણતરીની કલાકોમાં લૂંટનો ભેદ ઉકેલી નાંખ્યો હતો. ગાંધીનગરના ઇન્ફોસીટી પોલીસ સ્ટેશન વિસ્તારમાં 15 જૂનના સાંજના સમયે ગાંધીનગર કોબા રોડ ઉપર રાજધાની હોટલની સામે મેઇન રોડ પરથી બે મહિલાઓ એક્ટીવા ઉપર આવતી હતી ત્યારે પાછળથી બાઈક પર આવેલ ત્રણ અજાણ્યા ઇસમોએ એક્ટીવાની આગળ મુકેલું પર્સ ચાલુ એક્ટીવાએ ખેંચી એક્ટીવા ચાલક અને પાછળ બેઠેલ મહિલાને નીચે પછાડી હતી. જેમાં નીચે પછડાયેલી મહિલાઓ કઈ સમજે તે પહેલાં જ ત્રણ શખ્સોની પર્સની લૂંટ કરી અને પર્સ સાથે રોકડ રકમ 11000 તથા મોબાઇલ, આધારકાર્ડ અને એ.ટી.એમ કાર્ડ સહિત કુલ 20000 ની મત્તાની લુંટ કરી નાસી છૂટયા હતા.
આ મહિલાઓ જમીન પર પછડાતા મહિલાઓને ફેક્ચર જેવી ગંભીર ઇજાઓ પહોચી હતી. સમગ્ર બનાવ અંગે મહિલાઓએ પોલીસને જાણ કરી હતી અને મહિલાઓની ફરિયાદને આધારે પોલીસે વધુ તપાસ હાથ ધરી હતી. જે જગ્યા પર બનાવ બન્યો હતો ત્યાં પોલીસે આજુબાજુના લોકોમાં નિવેદનો અને કમાન્ડ કન્ટ્રોલ રૂમ સેક્ટર 27 ગાંધીનગરની મદદ લઈ ઇન્ફોસીટી પોલીસ સ્ટેશનના સર્વેલન્સના માણસોની ટીમ બનાવી અલગ અલગ જગ્યાથી સી.સી.ટી.વી ફુટેઝ મેળવી તેના આધારે તપાસ શરૂ કરવામાં આવી હતી.
આ ઉપરાંત શંકાસ્પદ લોકોના ફોટા અને વીડીયો ભેગા કરી તેના આધારે પણ તપાસ શરૂ કરવામાં આવી હતી અને ખાનગી બાતમીદારોને વાકેફ કરવામાં આવ્યા હતા. પોલીસને તપાસ બાદ માહિતી મળી હતી કે લૂટ ચલાવનારા શંકાસ્પદ લોકો અપોલો સર્કલ પાસે છે જેથી પોલીસે સર્વેલન્સની ટીમ બનાવી વોચ ગોઠવી ત્રણ લોકોને પકડી પાડ્યા હતા જેની પૂછપરછમાં ત્રણેય લોકોએ પોતે લૂટ કરી હોવાનું કબૂલ કર્યું હતું. ત્રણેય લોકોની વધુ પુછપરછ કરતા ગુનામાં ઉપયોગમાં લીધેલું Z-S મોટર સાયકલ GJ-01-SK-0699નું રીક્વર કરવામાં આવ્યું હતું.
Published On - 4:49 pm, Fri, 17 June 22