બોટાદના ગઢડામાં જળઝીલણી એકાદશીની ઉજવણી દરમિયાન મોટી દુર્ઘટના થતાં સહેજમાં ટળી હતી. ગઢડાના પવિત્ર ઘેલો નદીના રમા ઘાટ ખાતે પૂજનવિધિ દરમિયાન ભગવાનને સ્નાન કરાવવાની તૈયારી ચાલી રહી હતી, તે પહેલાં જ નાવડી પલટી ગઈ હતી. નાવડીમાં સવાર સાધુ-સંતો, સેવકો અને કેમેરામેન સહિત કુલ 6 લોકોનો આબાદ બચાવ થયો હતો.

ભગવાનને સ્નાન કરાવાય તે પહેલાં જ નાવડી પલટી

જળઝીલણી એકાદશી નિમિત્તે ગોપીનાથજી દેવ મંદિરથી શોભાયાત્રા સાથે ભગવાનને રમા ઘાટ ખાતે લાવવામાં આવ્યા હતા. અહીં શાસ્ત્રોક્ત વિધિ પ્રમાણે પૂજન-અર્ચન બાદ ભગવાનને ઘેલો નદીમાં સ્નાન કરાવવાનું આયોજન હતું.
જોકે, ભગવાનને સ્નાન કરાવાય તે પહેલાં જ નદીમાં ઉપયોગમાં લેવાયેલી નાવડી અચાનક પલટી ગઈ હતી. નાવડીમાં તે સમયે સાધુ-સંતો, સેવકો અને કેમેરામેન સહિત 6 લોકો સવાર હતા. નાવડી પલટી જતાં સ્થળ પર અફરાતફરીનો માહોલ સર્જાયો હતો.

પોલીસ અને લોકોએ તાત્કાલિક બચાવ કામગીરી હાથ ધરી

નાવડી પલટી હોવાની જાણ થતાં જ સ્થળ પર હાજર પોલીસકર્મીઓ અને લોકોએ તાત્કાલિક બચાવ કામગીરી શરૂ કરી હતી. તમામ 6 લોકોને સલામત રીતે નદીમાંથી બહાર કાઢવામાં આવ્યા હતા. સદનસીબે કોઈ જાનહાનિ થઈ નથી. રમા ઘાટ ખાતે તે સમયે પાણીની ઊંડાઈ આશરે 4 ફૂટ જેટલી હોવાનું સામે આવ્યું છે. પાણીની ઊંડાઈ ઓછી હોવાથી મોટી દુર્ઘટના ટળી હોવાનું માનવામાં આવી રહ્યું છે.

નાવડીમાં વજન વધી જતાં પલટી હોવાનો પ્રાથમિક અંદાજ

પ્રાથમિક અનુમાન મુજબ નાવડીમાં સવાર લોકોની સંખ્યા અને વજન વધી જતાં નાવડીનું સંતુલન બગડ્યું હતું અને તે પલટી ગઈ હતી. જળઝીલણી એકાદશી નિમિત્તે ભગવાનને નદીમાં સ્નાન કરાવવા માટે પ્લાસ્ટિક મટીરિયલની પેડલ નાવડીનો ઉપયોગ કરવામાં આવ્યો હતો.

હજારો ભાવિકો અને સાધુ-સંતોની હાજરી

ગઢડામાં જળઝીલણી એકાદશીનો ઉત્સવ વર્ષોથી પરંપરાગત રીતે રમા ઘાટ ખાતે ઉજવવામાં આવે છે. આ વર્ષે પણ મોટી સંખ્યામાં ભાવિકો અને સાધુ-સંતો ઉપસ્થિત રહ્યા હતા. ઉત્સવ દરમિયાન કોઈ અનિચ્છનીય ઘટના ન બને તે માટે પોલીસનો ચુસ્ત બંદોબસ્ત ગોઠવવામાં આવ્યો હતો. સાથે જ ઘટના સ્થળે એમ્બ્યુલન્સની પણ વ્યવસ્થા કરવામાં આવી હતી.

ઘટના બાદ તમામ 6 લોકોને સુરક્ષિત બહાર કાઢવામાં આવતા તંત્ર અને ઉપસ્થિત લોકોએ રાહતનો શ્વાસ લીધો હતો. જળઝીલણી એકાદશીનો ઉત્સવ ભક્તિ અને પરંપરા સાથે ઉજવાયો હતો, પરંતુ નાવડી પલટી જવાની ઘટનાએ થોડા સમય માટે ચિંતા ફેલાવી હતી.

Breaking News : જંગલની જમીન પર ખેતી કરતા આદિવાસી ખેડૂતોને બેદખલ કરવા સામે હાઈકોર્ટની રોક