ઔદ્યોગિક નગરી ભરૂચ(Bharuch)માં મોટી સંખ્યામાં શ્રમજીવી પ્રજા વસવાટ કરે છે. સ્થાનિક શ્રમજીવીઓને સસ્તા ઈલાજ અને કામોત્તેજક દવાઓ આપવાના ભણે તેમના આરોગ્ય સાથે ચેડાં કરતા ૪ મુન્નાભાઈને ભરૂચ સ્પેશિયલ ઓપરેશન ગ્રુપે ઝડપી પાડી લોકઅપ ભેગા કરી દીધા છે. આ કહેવાતા તબીબો કોઈપણ પ્રકારની ડિગ્રી વગર હાટડીઓ ખોલી લોકોના સ્વાસ્થ્ય સાથે અખતરા કરવા માંડ્યા હતા. પોલીસે બિશ્વજીત ત્રિનાથ બિસ્વાસ , ઉત્તમ સુશાંતા મોંડળ , શંકર સ્વપન દેબનાથ અને મધુમંગળ જયદેવ બિશ્વાશ નામના કહેવાતા તબીબોની ધરપકડ કરી છે.આ ચારેય બોગસ તબીબ પશ્ચિમ બંગાળના છે.
દહેજ બંદર એક એવો વિસ્તાર માનવામાં આવે છે જ્યાં લગભગ દેશના દરેક પ્રાંતના લોકો આવીને વસ્યા છે. અહીં મોટી સંખ્યામાં શ્રમજીવીઓ પણ રોજગારી માટે આવ્યા છે. કોરોનકાળ બાદ વ્યક્તિ આરોગ્યલક્ષી સામાન્ય લક્ષણોને પણ ગંભીરતાથી લેતો થયો છે. તબીબી અભિપ્રાય મેળવી નિશ્ચિન્ત બનવાનું વિચારતો વ્યક્તિ મોટી મુશ્કેલીમાં મુકાય તેવી સિનતાજનક સ્થિતિ દહેજમાં નિર્માણ પામી હતી. અહીં તબીબના વેશમાં ઠગ તબીબ બનીને બેઠા હતા જે લોકો ઉપર અખતરા કરી લાલ પીળી ગોળીઓ પધરાવવા માંડયા હતા અને ઇન્જેક્શન પણ લગાવી દેતા હતા.
પશ્ચિમ બંગાળમાં કેટલાક ભેજાબાજો ભણતર વિના લોકોને બોગસ તબીબ બનવાની તાલીમ આપે છે.આ લોકોને સામાન્ય દવાઓની માહિતી અપાય છે અને બાકી તે અખતરાઓ કરવા માંડે છે. એકાદ બે મહિના કમ્પાઉન્ડરની નોકરી કરી બંગાળના આ લોકો સીધા ભરૂચમાં દવાખાનું ખોલી નાખે છે.
ભરૂચ એસઓજીના પોલીસ ઇન્સ્પેકટર વી બી કોઠીયાને આ ઝોલાછાપ તબીબો અંગે બાતમી મળતા SOG એ દહેજ મેરિન પોલીસ સ્ટેશન અંતર્ગતનો વિસ્તાર ધમરોળવા માંડ્યો હતો. કોઇ પણ જાતની મેડીકલ ડીગ્રી વિના મેડીકલના સાધનો સાથે એલોપેથિક દવાઓ અને ઇન્જેકશન રાખી ઇલાજના નામે લોકોને ઠગતા ૪ ની એકજ દિવસમાં ધરપકડ કરાઈ છે.
બોગસ તબીબોને ઝડપી પાડવાની કામગીરીમાં PI વી બી કોઠીયા સાથે પોલીસકર્મીઓ હરેશભાઈ, દર્શકભાઇ , રવિન્દ્રભાઇ , અનિરૂધ્ધસિંહ , વરસનભાઇ , ભાવસીંગભાઈ , મેહુલકુમાર , મો.ગુફરાન અને ભુમિકાબેને જહેમત ઉઠાવી હતી.
Published On - 3:24 pm, Mon, 4 July 22