છેલ્લા 24 કલાક સાબરકાંઠા અને અરવલ્લી જિલ્લાના ખેડૂતો માટે હાશકારા રુપ છે. જિલ્લાના ખેડૂતોની પ્રાર્થના મેઘરાજાએ સાંભળી હોય એમ વરસાદ વરસ્યો છે. અરવલ્લી જિલ્લામાં પાંચ ઈચ જેટલો વરસાદ બાયડ, ધનસુરા વિસ્તારમાં ખાબકતા રાહત સર્જાઈ છે. અરવલ્લી જિલ્લામાં ગઈકાલે બપોર બાદથી મેઘરાજાની સવારીએ ધડબડાટી બોલાવી હતી. જેને લઈ જિલ્લાના અનેક વિસ્તાર જે સુકા ભઠ્ઠ ભાસી રહ્યા હતા એ પાણી પાણી થઈ ગયા હતા.
બપોર બાદ વરસાદ શરુ થતા મોડી સાંજ બાદ કેટલાક વિસ્તારમાં ધોધમાર વરસાદ વરસ્યો હતો. સાબરકાંઠા જિલ્લામાં પણ એક થી દોઢ ઈંચ વરસાદ મોટાભાગના તાલુકાઓમાં વરસ્યો હતો. વરસાદને લઈ કેટલાક જળાશયમાં પાણીની આવક નોંધાઈ હતી.
રાત્રી દરમિયાન અરવલ્લી જિલ્લાના કેટલાક વિસ્તારમાં સારો વરસાદ નોંધાયો હતો. હવામાન ખાતાની ભારે વરસાદની આગાહી મુજબ જ જિલ્લામાં વરસાદ વરસ્યો હતો. ખાસ કરીને બાયડ અને ધનસુરામાં પાંચ ઈંચ કરતા વધારે વરસાદ વરસ્યો હતો. જિલ્લાના મુખ્ય મથક મોડાસામાં પણ ચાર ઈંચ જેટલો વરસાદ નોંધાયો હતો. ભારે વરસાદને લઈ અનેક સ્થળો પર વરસાદી પાણી ભરાઈ જવા પામ્યા હતા.
ઉત્તર ગુજરાતમાં વરસાદની આગાહી કરવામાં આવી હતી. મધ્યપ્રદેશમાં સિસ્ટમ સક્રિય થતા ઉત્તર ગુજરાતમાં વરસાદ નોંધાયો હતો. સાબરકાંઠા જિલ્લાના તલોદ, પોશિના, વડાલી, ખેડબ્રહ્મા, વિજયનગર અને ઈડરમાં દોઢ-દોઢ ઈંચ જેટલો વરસાદ અંતિમ 24 કલાક દરમિયાન વરસ્યો હતો. જ્યારે પ્રાંતિજ અને હિંમતનગરમાં એક એક ઈંચ વરસાદ નોંધાયો હતો.
વરસાદને પગલે બંને જિલ્લામાં કપાસ, મગફળી, ડાંગર સહિતના પાકને જીવતદાન મળવા રુપ વરસાદ વરસ્યો છે. ખેતી પાક વરસાદ વિના મૂરઝાવાની સ્થિતિ પર હતો. આ દરમિયાન લાંબા વિરામ બાદ મેઘરાજાએ બેટિંગ કરતા વધુ એક રાઉન્ડ આવી પહોંચતા મોટી રાહત સર્જાઈ છે.
Published On - 7:47 am, Sun, 17 September 23