Breaking News: ડૉ નિરજા ગુપ્તા બન્યા ગુજરાત યુનિવર્સિટીના નવા કુલપતિ, ગુપ્તા ગુજરાત યુનિવર્સીટીના પ્રથમ મહિલા કુલપતિ
Ahmedabad: ડૉ નિરજા ગુપ્તા ગુજરાત યુનિવર્સીટીના નવા કુલપતિ બન્યા છે. વર્તમાન કુલપતિ હિમાંશુ પંડ્યાની ટર્મ 30 જૂને પૂર્ણ થતા ડૉ નિરજા ગુપ્તાની નિમણુક કરવામાં આવી છે. ડૉ ગુપ્તા યુનિવર્સિટીના પ્રથમ મહિલા કુલપતિ બન્યા છે. અગાઉ તેઓ યુનિવર્સિટીના સેનેટ અને સિન્ડીકેટ મેમ્બર પણ રહી ચુક્યા છે.
Ahmedabad: રાજ્યની સૌથી મોટી યુનિવર્સીટી ગુજરાત યુનિવર્સિટીને નવા કુલપતિ ડૉ નિરજા ગુપ્તા મળ્યા છે. જૂન અંતમાં હાલના કુલપતિ ડૉ. હિમાંશુ પંડ્યાની ટર્મ પૂર્ણ થઈ રહી હતી. અંતિમ દિવસે જ શિક્ષક વિભાગે પરિપત્ર કરી ડૉ.નિરજા ગુપ્તાને ગુજરાત યુનિવર્સીટીના નવા કુલપતિ તરીકે જાહેર કર્યા છે. ડૉ નિરજા ગુપ્તા ગુજરાત યુનિવર્સીટીના ઇતિહાસના પ્રથમ મહિલા કુલપતિ છે.
યુનિવર્સિટીના 18માં કુલપતિ તરીકે ડૉ નિરજા ગુપ્તની પસંદગી
1949 માં સ્થાપિત રાજ્યની સૌથી મોટી ગુજરાત યુનિવર્સીટીના 18 માં કુલપતિ તરીકે મૂળ અમદાવાદી અને સાંચી યુનિવર્સિટી ઓફ બુધ્ધિસ્ટ-ઇન્ડિક સ્ટડી, સાંચી, મધ્યપ્રદેશ ના કુલપતિ ડૉ નિરજા ગુપ્તાની પસંદગી કરાઈ છે. 30 જૂને ડૉ હિમાંશુ પંડ્યાની કુલપતિ તરીકેની ટર્મ પૂર્ણ થઈ રહી હતી. એજ સાંજે નિરજા ગુપ્તાની પસંદગી ત્રણ વર્ષ કે 65 વર્ષ બંને માંથી જે જલ્દી થાય ત્યાં સુધી કરાઈ છે.
ગુજરાત યુનિવર્સિટીના સેનેટ અને સિન્ડીકેટ સભ્ય પણ રહી ચુક્યા છે ડૉ નિરજા ગુપ્તા
ડૉ. નીરજા ગુપ્તા RAPG કોલેજ ઓફ આર્ટસ એન્ડ કોમર્સ, ભારતીય વિદ્યા ભવન, ખાનપુર, અમદાવાદ, ગુજરાત ખાતે પ્રોફેસર અને આચાર્ય રહી ચૂક્યા છે. 2006 થી 2012 સુધી ડૉ.ગુપ્તા ગુજરાત યુનિવર્સિટી, અમદાવાદના ફોરેન એજ્યુકેશન પ્રોગ્રામના સલાહકાર રહ્યા છે. તેમણે 1992માં મેરઠ યુનિવર્સિટીમાંથી ડૉક્ટરેટની પદવી મેળવી હતી. હિન્દી, સંસ્કૃત, ગુજરાતી, મરાઠી, આસામી ઉપરાંત તેને ઉર્દૂમાં પણ જ્ઞાન છે. અગાઉ ગુજરાત યુનિવર્સિટીના સેનેટ અને સિન્ડિકેટ સભ્ય રહી ચૂક્યા છે.
રાજ્યની 8 યુનિવર્સિટી હજુ ઈન્ચાર્જ કુલપતિથી ચાલી રહી છે
ગુજરાત યુનિવર્સિટીના કુલપતિ પદે ડૉ નિરજા ગુપ્તાની કાયમી નિમણૂક થઈ છે ત્યારે હજીપણ રાજ્યની 8 યુનિવર્સીટીઓ એવી છે કે જ્યાં ઇન્ચાર્જ કુલપતિથી ચાલી રહી છે. જેમાં GTU, ચિલ્ડ્રન યુનિવર્સીટી, ડૉ બાબાસાહેબ આંબેડકર ઓપન યુનિ, ઉત્તર ગુજરાત યુનિ, ભાવનગર યુનિ, સરદાર પટેલ યુનિ, સૌરાષ્ટ્ર યુનિ, સોમનાથ સંસ્કૃત યુનિવર્સીટીનો સમાવેશ થાય છે. આ યુનિવર્સીટીઓમાં પણ કાયમી કુલપતિ નિમનુકની માંગ થઈ રહી છે.
અમદાવાદ સહિત ગુજરાતના તમામ જિલ્લાના સમાચાર વાંચવા માટે અહીં ક્લિક કરો
Published On - 5:30 pm, Fri, 30 June 23
