ભાવનગર-ગાંધીગ્રામ દૈનિક સમર સ્પેશિયલ ટ્રેનની ટ્રીપ આગામી 90 દિવસ માટે લંબાવવામાં આવી
પશ્ચિમ રેલવે દ્વારા ભાવનગર-ગાંધીગ્રામ-ભાવનગર દૈનિક સમર સ્પેશિયલ ટ્રેનને 1 ઓગસ્ટથી આગામી 90 દિવસ માટે લંબાવવાનો નિર્ણય લેવામાં આવ્યો છે.
Western Railway : મુસાફરોની સુવિધા માટે અને ટ્રેનોમાં (Train) વધારાનો ધસારો ઘટાડવા પશ્ચિમ રેલવે દ્વારા ભાવનગર-ગાંધીગ્રામ વચ્ચે વિશેષ ભાડા પર દરરોજ સમર સ્પેશિયલ ટ્રેન દોડાવવામાં આવી રહી છે. પશ્ચિમ રેલવે દ્વારા ભાવનગર-ગાંધીગ્રામ-ભાવનગર દૈનિક સમર સ્પેશિયલ ટ્રેનને 1 ઓગસ્ટથી આગામી 90 દિવસ માટે લંબાવવાનો નિર્ણય લેવામાં આવ્યો છે.
ભાવનગર – ગાંધીગ્રામ દૈનિક સમર સ્પેશિયલ ટ્રેન (09216) ભાવનગર ટર્મિનસ સ્ટેશનથી દરરોજ 17.00 કલાકે ઉપડે છે અને 21.40 કલાકે ગાંધીગ્રામ સ્ટેશન પહોંચે છે. તેવી જ રીતે રિટર્નમાં ગાંધીગ્રામ-ભાવનગર દૈનિક સમર સ્પેશિયલ ટ્રેન (09215) ગાંધીગ્રામ સ્ટેશનથી દરરોજ 06.35 કલાકે ઉપડે છે અને ભાવનગર ટર્મિનસ 11.15 કલાકે પહોંચે છે. આ ટ્રેન બંને દિશામાં ભાવનગર પરા, સિહોર, ધોળા, બોટાદ, ધંધુકા, ધોળકા, સરખેજ અને વસ્ત્રાપુર સ્ટેશનો પર ઉભી રહે છે.
પશ્ચિમ રેલવે દ્વારા ઓખા-મદુરાઈ સાપ્તાહિક સ્પેશિયલ ટ્રેનના ફેરા લંબાવવામાં આવ્યા
મુસાફરોની સુવિધા માટે પશ્ચિમ રેલવેએ વધુ એક નિર્ણય લીધો છે. ઓખા-મદુરાઈ સાપ્તાહિક સ્પેશિયલ ટ્રેનના ફેરા પણ લંબાવવામાં આવ્યા છે. જેમાં ટ્રેન નંબર 09520/09519 ઓખા-મદુરાઈ વીકલી સ્પેશિયલ 8-8 ટ્રીપ્સ કરશે.
ટ્રેન નંબર 09520 ઓખા-મદુરાઈ સ્પેશિયલ જે અગાઉ 31મી જુલાઈ, 2023 સુધી સૂચિત કરવામાં આવી હતી, તે હવે 25મી સપ્ટેમ્બર, 2023 સુધી લંબાવવામાં આવી છે. આ દરમિયાન આ ટ્રેન ઓખાથી દર સોમવારે 22.00 કલાકે ઉપડશે અને ગુરુવારે 11.45 કલાકે મદુરાઈ પહોંચશે. આ ટ્રેનનું બુકિંગ 2જી ઓગસ્ટ, 2023થી PRS કાઉન્ટર અને IRCTC વેબસાઇટ પર ખુલશે.
મદુરાઈ-ઓખા સ્પેશિયલ 29મી સપ્ટેમ્બર, 2023 સુધી લંબાવવામાં આવી
ટ્રેન નંબર 09519 મદુરાઈ-ઓખા સ્પેશિયલ જે અગાઉ 4 ઓગસ્ટ, 2023 સુધી સૂચિત કરવામાં આવી હતી, તેને હવે 29મી સપ્ટેમ્બર, 2023 સુધી લંબાવવામાં આવી છે. આ દરમિયાન આ ટ્રેન મદુરાઈથી દર શુક્રવારે 01.15 કલાકે ઉપડશે અને રવિવારે 10.20 કલાકે ઓખા પહોંચશે.
ગાંધીનગર-વારાણસી સ્ટેશન યાર્ડ રિમોડલિંગના કામને કારણે સાપ્તાહિક એક્સપ્રેસ ટ્રેન રદ રહેશે
તો બીજી તરફ ટ્રેન નંબર 22468/22467 ગાંધીનગર-વારાણસી-ગાંધીનગર સાપ્તાહિક એક્સપ્રેસ ટ્રેન ઉત્તર રેલવેના વારાણસી સ્ટેશન યાર્ડના રિમોડલિંગના કામ માટેના એન્જિનિયરિંગ કામને કારણે રદ રહેશે. આ ટ્રેનની 5 ટ્રીપો જે 02 ઓગસ્ટ 2023થી 31 ઓગસ્ટ 2023 સુધી રદ રહેશે.