Ahmedabad: વાડજ વિસ્તારમાં અસામાજિક તત્વોએ આંતક, હથિયારો સાથે તોડફોડ કરીને સમગ્ર વિસ્તારમાં ફેલાવી દહેશત, એક આરોપીની થઈ ધરપકડ
અમદાવાદના વાડજ વિસ્તારમાં અસામાજિક તત્વોએ આંતક મચાવ્યો હતો. હાથમાં હથિયારો સાથે તોડફોડ કરીને સમગ્ર વિસ્તારમાં દહેશત ફેલાઈ ગઈ હતી.
Ahmedabad: અમદાવાદના વાડજ વિસ્તારમાં અસામાજિક તત્વોએ આંતક મચાવ્યો હતો. હાથમાં હથિયારો સાથે તોડફોડ કરીને સમગ્ર વિસ્તારમાં દહેશત ફેલાઈ ગઈ હતી. આ ટોળકી વિસ્તારના ડોન બનવા તોડફોડ કરીને લોકોમાં ડર ઉભો કરતા હોવાનું તપાસમાં સામે આવ્યું છે. પોલીસે એક આરોપીની ધરપકડ કરીને અન્ય આરોપીઓની શોધખોળ શરૂ કરી છે.
અમદાવાદ શહેરમાં અસામાજિક તત્વોનો આંતક વધી રહ્યો છે. વાડજ, શાહીબાગ અને વાસણામાં અસામાજિક તત્વોએ તોડફોડ કરીને આંતક મચાવ્યો હતો. આ વિસ્તારમાં ગુંડાઓની દહેશત ફેલાઇ છે. વિડિઓમાં પણ જોઈ શકાય છે બાઈક પર આવેલા આ ગુંડા તત્વો તલવાર અને પાઇપો લઈને તોડફોડ કરી રહ્યા છે. વાડજમાં નિર્ણયનગર નજીક આવેલા પાન પાર્લર પર કેટલાક યુવાનો ઉભા હતા ત્યારે આ અસામાજિક તત્વો રોફ જમાવવ ત્યાં આવ્યા અને તોડફોડ કરીને એક યુવક પર તલવારથી હુમલો કરી દીધો હતો. આ ટોળકી વિસ્તારમાં પોતાનો ડર ઉભો કરવા આતંક મચાવી રહી હતી. વાડજ પોલીસે 5 અસામાજિક તત્વો વિરુદ્ધ ગુનો નોંધીને ટોળકીના એક આરોપીને ઝડપી લીધો છે.
ફોટામાં જોવા મળતો કરણ વણઝારો છે. તેની વિરુદ્ધ અનેક ગુના નોંધાયા છે. આ ગેંગનો સરદાર રોહિત ઠાકોર છે જેને આ ગેંગ બનાવી છે. તેની ગેંગમાં કરણ વણઝારો, ચેતન ઉર્ફે ચેતો, જય ઉર્ફે જયલો ઠાકોર અને અજય ઉર્ફે ચકો ઠાકોર છે. આ ટોળકીએ વિસ્તારમાં દાદા બનવા માટે હથિયારો લઈને સ્પીડમાં બાઇકો લઈને ફરતા હતા. અને દુકાનોમાં તોડફોડ કરીને સ્થાનિક લોકો પર હુમલો કરતા હતા. રોહિત ઠાકોર કુખ્યાત આરોપી છે. અગાઉ પણ આરોપીએ તોડફોડ કરીને આતક મચાવ્યો હતો. પોલીસે પાસા કરીને જેલ હવાલે કર્યો હતો. પરંતુ પાસા પુરી કરીને પરત આવ્યા બાદ ફરી આ આરોપીએ પોતાના સાગરીતો સાથે મળીને તોડફોડ કરી હતી.
મહત્વનું છે કે, આ ઘટનાને લઈને વાડજ પોલીસે રાયોટિંગ અને મારામારીનો ગુનો નોંધીને એક આરોપીની ધરપકડ કરી. જ્યારે મુખ્ય સૂત્રધાર રોહિત ઠાકોર સહિત 4 આરોપી ફરાર થઈ જતા પોલીસે જુદી જુદી ટીમો બનાવીને શોધખોળ શરૂ કરી છે.