Breaking News: સોનુ નિગમના 19 વર્ષના પુત્ર નિવાનનું સિંગિંગ ડેબ્યૂ, દીકરાના ડેબ્યૂ પર ભાવુક થયા ગાયક

બોલિવૂડના જાણીતા ગાયક સોનુ નિગમના પરિવારમાં દિવાળીના પર્વે ખુશીનો માહોલ જોવા મળ્યો છે. સોનુ નિગમનો 19 વર્ષીય પુત્ર નિવાન નિગમ હવે સંગીતની દુનિયામાં પોતાની નવી સફર શરૂ કરવા જઈ રહ્યો છે. પિતાની જેમ ગાયન ક્ષેત્રે કારકિર્દી બનાવવાના નિર્ણય સાથે નિવાને પોતાનું સિંગિંગ ડેબ્યૂ કર્યું છે. પુત્રની આ નવી શરૂઆતની જાહેરાત સોનુ નિગમ અને તેમની પત્ની મધુરિમાએ દિવાળીના ખાસ અવસરે સોશિયલ મીડિયા મારફતે કરી હતી.

પિતાએ શેર કરી દીકરાની સંગીત સફરની કહાની

સોનુ નિગમે સોશિયલ મીડિયા પર પુત્ર નિવાનનો એક સુંદર ફોટો શેર કરીને તેની સંગીત ક્ષેત્રે એન્ટ્રીની જાણકારી આપી હતી. આ સાથે તેમણે નિવાનની અત્યાર સુધીની સફર વિશે પણ કેટલીક રસપ્રદ વાતો જણાવી હતી. સોનુ નિગમના જણાવ્યા અનુસાર, એક સમયે પિતાની સામે ગાવામાં શરમાતો નિવાન આજે સંગીત પ્રત્યે એટલો સમર્પિત થઈ ગયો છે કે પોતાના ગાયન કોચના માર્ગદર્શન હેઠળ દરરોજ 16 કલાક સુધી પ્રેક્ટિસ કરતો હતો. તેણે સ્ટુડિયોમાં પૂ બેર સાથે માત્ર એક જ ટેકમાં રેકોર્ડિંગ પણ પૂર્ણ કર્યું હતું.

દીકરાની મહેનત જોઈ પિતા થયા ભાવુક

પુત્રના બદલાયેલા વ્યક્તિત્વ અને સંગીત પ્રત્યેના સમર્પણને યાદ કરતાં સોનુ નિગમ ભાવુક થઈ ગયા હતા. તેમણે જણાવ્યું કે જે બાળક એક સમયે ત્રણ મિનિટ પણ દોડી શકતો નહોતો, તે આજે પોતાની કળાને વધુ સારી બનાવવા કલાકો સુધી ડાન્સની પ્રેક્ટિસ કરે છે. નિવાને પોતાની મહેનત અને લગનથી પરિવારને ગૌરવની લાગણી કરાવી છે. સોનુ નિગમે પુત્રની આ સિદ્ધિ બદલ તેના માટે ચાહકો પાસે પ્રેમ અને આશીર્વાદ પણ માગ્યા હતા.

4 વર્ષની ઉંમરથી જ સંગીત સાથે જોડાણ

નિવાનનો સંગીત સાથેનો સંબંધ નાનપણથી જ રહ્યો છે. માત્ર ચાર વર્ષની ઉંમરે તેણે સ્ટુડિયોમાં ‘કોલાવેરી ડી’ ગીત ગાયું હતું. જ્યારે સાડા ચાર વર્ષની ઉંમરે તેણે સ્ટેજ પર ‘અભી મુઝમેં કહીં’ ગીત રજૂ કર્યું હતું. આમ, બાળપણથી જ સંગીતના વાતાવરણમાં ઉછરેલા નિવાને હવે ગાયન ક્ષેત્રે પોતાની અલગ ઓળખ બનાવવાની દિશામાં પહેલું પગલું ભર્યું છે.

પુત્રને આપી ખાસ સલાહ

સોનુ નિગમે પુત્રને નવી સફર માટે શુભેચ્છા પાઠવતાં મહેનત, આત્મસન્માન, સમર્પણ અને નમ્રતાને જીવનમાં જાળવી રાખવાની સલાહ આપી છે. હવે નિવાન પોતાના પિતા અને દાદાની સંગીત પરંપરાને આગળ વધારવા તૈયાર છે. નિવાનના સિંગિંગ ડેબ્યૂની જાહેરાત બાદ તેના પરિવારજનો અને ચાહકો તરફથી શુભેચ્છાઓનો વરસાદ થઈ રહ્યો છે.

આ પણ વાંચો- Breaking News : દિવાળી પછી દિલ્હીની હવા ઝેરીલી બની, AQI 400ને પાર