Breaking News: પલ્સરથી આવ્યા અને ટ્રેનમાં થયા ફરાર..ટાઈગર શ્રોફ પર હુમલો કરનાર આરોપિયોની તસવીર આવી સામે

બોલિવૂડ અભિનેતા ટાઈગર શ્રોફ સાથે જોડાયેલી ગોળીબારની ઘટનામાં પોલીસને એક મહત્વપૂર્ણ કડી મળી છે. હુમલાખોરો દ્વારા ઉપયોગમાં લેવાયેલું મોટરસાયકલ જપ્ત કરવામાં આવ્યું છે અને આ હુમલામાં સામેલ બે વ્યક્તિઓની તસવીરો પણ સામે આવી છે. સૂત્રોના જણાવ્યા અનુસાર, હુમલાખોરોએ તેમનું પલ્સર મોટરસાયકલ વિલે પાર્લે રેલવે સ્ટેશન પાસે છોડી દીધું હતું અને લોકલ ટ્રેનમાં બેસીને ત્યાંથી ફરાર થઈ ગયા હતા. અહેવાલો મુજબ, જપ્ત કરાયેલું મોટરસાયકલ સેકન્ડ-હેન્ડ (જૂનું) વાહન હતું. મુંબઈ પોલીસની 15 ટીમો આ તપાસમાં સક્રિયપણે જોડાયેલી છે, અને ક્રાઈમ બ્રાન્ચ પણ આ કેસની તપાસ કરી રહી છે.

ટાઈગર શ્રોફ પર ફાયરિંગ

મુંબઈ પોલીસે આ ગોળીબારની ઘટનાના સંબંધમાં અભિનેતા ટાઈગર શ્રોફના ડ્રાઈવર, ફિરદોસનું નિવેદન નોંધ્યું છે. પોલીસના જણાવ્યા અનુસાર, ત્રણ અજાણ્યા હુમલાખોરોએ ગોળીબાર કર્યો હતો. આ ઘટનામાં ડ્રાઈવર સહિત બે વ્યક્તિઓને ઈજાઓ પહોંચી છે; ફિરદોસ હાલમાં હોસ્પિટલમાં સારવાર લઈ રહ્યા છે. જુહુ પોલીસે ત્રણ અજાણ્યા શંકાસ્પદ વ્યક્તિઓ વિરુદ્ધ ભારતીય ન્યાય સંહિતા (BNS)ની કલમ 109(1) અને 3(5) તેમજ આર્મ્સ એક્ટ (શસ્ત્ર અધિનિયમ)ની જોગવાઈઓ હેઠળ કેસ નોંધ્યો છે.

જેકી શ્રોફની પ્રતિક્રિયા

ટાઈગર શ્રોફ પર થયેલા હુમલા બાદ ફિલ્મ ઉદ્યોગમાં આઘાતનું મોજું ફરી વળ્યું છે અને ચાહકો અભિનેતાની સુરક્ષા અને સ્વાસ્થ્યને લઈને ખૂબ ચિંતિત છે. ટાઈગરના પિતા, જેકી શ્રોફના પ્રતિનિધિએ અપડેટ આપતા જણાવ્યું છે કે ટાઈગર અત્યારે ઠીક છે.

એકનાથ શિંદેએ ટાઈગરની મુલાકાત લીધી

દરમિયાન, મહારાષ્ટ્રના નાયબ મુખ્યમંત્રી એકનાથ શિંદેએ ટાઈગર શ્રોફના નિવાસસ્થાને પહોંચીને તેમના સ્વાસ્થ્ય વિશે પૂછપરછ કરી હતી. તેમણે ખાતરી આપી હતી કે ગુનેગારોને વહેલી તકે પકડી પાડવામાં આવશે. એકનાથ શિંદેએ આ હુમલાની નિંદા કરી અને જીવલેણ હુમલાની આ ઘટનાને અત્યંત ગંભીર બાબત ગણાવી. શિંદેના જણાવ્યા અનુસાર, મુંબઈ પોલીસે આ મામલાને ખૂબ જ ગંભીરતાથી લીધો છે. પોલીસ કમિશનરે ક્રાઈમ બ્રાન્ચ સહિત 15 વિશેષ ટીમોની રચના કરી છે, જે હવે ગુનેગારોની સક્રિયપણે શોધખોળ કરી રહી છે. નાયબ મુખ્યમંત્રીએ ખાતરી આપી છે કે જવાબદારો સામે કડક કાર્યવાહી કરવામાં આવશે.

શું છે સમગ્ર ઘટના?

રવિવાર, 18 ઓક્ટોબર, 2026ની સાંજે, ટાઈગર શ્રોફ ફૂટબોલ રમીને પોતાની કારમાં પરત ફરી રહ્યા હતા. કારમાં બેઠેલા ટાઈગર જ્યારે તેમના ચાહકોનું અભિવાદન કરી રહ્યા હતા, ત્યારે અચાનક અજાણ્યા હુમલાખોરોએ ગોળીબાર કર્યો. ઘણા રાઉન્ડ ફાયર કર્યા અને ત્યારબાદ મોટરસાઈકલ પર ઘટનાસ્થળેથી ફરાર થઈ ગયા. આ હુમલામાં ટાઈગરના ડ્રાઈવર, ફિરદોસને ઈજાઓ પહોંચી છે અને હાલમાં તેઓ હોસ્પિટલમાં સારવાર લઈ રહ્યા છે. ટાઈગરને પોતે ગોળી વાગી નથી, પરંતુ કાચના ટુકડા વાગવાથી તેમના જમણા હાથ પર સામાન્ય ઈજા થઈ છે.

લોરેન્સ બિશ્નોઈએ જવાબદારી સ્વીકારી

બોલિવૂડ સ્ટાર્સ પર ગોળીબારની આ કોઈ પહેલી ઘટના નથી; અગાઉ પણ અનેક હસ્તીઓને આ જ રીતે નિશાન બનાવવામાં આવી છે. આ પહેલાં સલમાન ખાનના નિવાસસ્થાન ‘ગેલેક્સી એપાર્ટમેન્ટ્સ’ પર પણ ગોળીબારની ઘટના બની હતી, જેની જવાબદારી બિશ્નોઈ ગેંગે લીધી હતી. આ ઉપરાંત, બોલિવૂડ દિગ્દર્શકોના ઘરે પણ ગોળીબારની ગંભીર ઘટનાઓ બની ચૂકી છે. હવે, ટાઈગર શ્રોફની કારને નિશાન બનાવવામાં આવી છે, જે તેમના જીવ પરના હુમલાના પ્રયાસ જેવું લાગે છે. લોરેન્સ બિશ્નોઈ ગેંગ સાથે સંકળાયેલા અનિલ પંડિત અને હરમન સિંધુએ આ હુમલાની જવાબદારી સ્વીકારી છે અને ધમકી આપી છે કે જે કોઈ પણ સલમાન ખાન સાથે કામ કરશે, તેની હાલત પણ આવી જ થશે. હાલમાં, આ નિવેદનની સત્તાવાર પુષ્ટિ થવાની બાકી છે.

Breaking News : સાંજે 7 વાગ્યે ગોળીબાર, શંકાસ્પદ કસ્ટડીમાં, ટાઈગર શ્રોફ પરના હુમલાએ મુંબઈને હચમચાવી નાખ્યું જુઓ Video, આ સ્ટોરી વાંચવા અહીં ક્લિક કરો