ગુજરાત વિધાનસભા ચૂંટણીને (Gujarat Election) ના પડઘમ વાગી ચૂક્યા છે, ત્યારે સત્તાના શિખર સર કરવા ક્યારેય મત વિસ્તારમાં ન જોવા મળતા નેતાઓ હવે પગપાળા પ્રચાર કરી રહ્યા છે. જો કે મતદારો EVM પર કઈ પાર્ટીનું બટન દબાવે છે, તે તો પરિણામ જ બતાવશે. ત્યારે TV9ની ચૂંટણીલક્ષી વિશેષ રજૂઆતમાં અમે બનાસકાંઠાની દાંતા વિધાનસભા બેઠકના (Danta Assembly Seat) મતદારોનો (Voters) મિજાજ જાણવાનો પ્રયાસ કર્યો.
એક એવી વિધાનસભા બેઠકની કે જે આદિવાસી વિસ્તારમાં (Triabal Area) આવેલી છે. દાંતાનો પૂર્વ ઇતિહાસ જોઈએ તો દાંતાથી પશ્વિમ તરફ જતાં આશરે બે માઇલ દુર દાંતોરીયા વીરનું સ્થાન આવેલું છે. આ વીરના નામ પરથી જ આ ગામનું નામ દાંતા પડયુ. ઈસ 1544 માં સદરહું ગામ રાજધાની બનતાં દાંતા રાજય તરીકે ઓળખાવા લાગ્યું. જે રાજાશાહી સમયમાં દાંતા સ્ટેટ તરીકે ઓળખાતું હતું.
આ વિધાનસભા બેઠક પર છેલ્લી બે ટર્મથી કોંગ્રેસનું (Congress) દબદબો છે. છેલ્લી બે ટર્મથી કોંગ્રેસના કાંતિ ખરાડી આ બેઠક પરથી ચૂંટાય છે. પાછલી 2 ટર્મથી જીતથી દૂર ભાજપ 2022માં પરિવર્તન માટે મહેનત કરી રહી છે. તો કોંગ્રેસ પણ જીતની પરંપરા જાળવી રાખવા કટિબદ્ધ છે, ત્યારે મતદારોનો કેવો છે મિજાજ અને 2022માં કેવા છે સત્તાના સમીકરણો આવો જાણીએ.
જો દાંતા વિધાનસભા બેઠકના મતદારોની વાત કરીએ તો કુલ મતદારો 2 લાખ 10 હજાર છે, જેમાં પુરૂષ મતદારો 1 લાખ 4 હજાર 418 અને સ્ત્રી મતદારો 98 હજાર છે. જો આ બેઠકના રાજકીય ઈતિહાસની વાત કરીએ તો અહીં 2017માં કોંગ્રેસના કાંતિ ખરાડીને 86,129 મત મળ્યા તો ભાજપના માલજી કોડરવીને 61,477 મત મળ્યા હતા. જેથી કોંગ્રેસના (Gujarat Congress) કાંતિ ખરાડીની 24,652 મતે જીત થઇ.2012ની ચૂંટણીની વાત કરીએ તો કોંગ્રેસના કાંતિ ખરાડીને 73,751 મત મળ્યા હતા. જ્યારે ભાજપના ગમા ખરાડીને 46,761 મત મળ્યા હતા. તો કોંગ્રેસના કાંતિ ખરાડી 26,990 મતે જીત્યા હતા.
જો અહીંના રાજકીય ઈતિહાસની વાત કરીએ તો 1967 થી 2017 સુધી આ બેઠક પર 13 વખત ચૂંટણી યોજાઇ છે.જેમાં ભાજપનો (BJP Party) 2 વખત અને કોંગ્રેસ 8 વાર વિજય થયો છે. છેલ્લી 2 ટર્મથી કોંગ્રેસના પંજાનો અહીં દબદબો છે. એટલું જ નહીં મોદી લહેરમાં પણ કોંગ્રેસનો ગઢ અભેદ રહ્યો હતો. એક ટર્મને બાદ કરતા આ બેઠક પર કોંગ્રેસનો દબદબો રહ્યો છે.
Published On - 1:10 pm, Thu, 6 October 22