પૂર્વ કેન્દ્રીય ગૃહમંત્રી અને નાણાંમંત્રી પી.ચિદમ્બરમ ગુજરાત પ્રવાસે, સરકાર બદલવા ગુજરાતીઓને અપીલ

ગુજરાત પ્રવાસે આવેલ અર્થશાસ્ત્રી, પૂર્વ કેન્દ્રીય ગૃહમંત્રી અને નાણામંત્રી પી. ચિદમ્બરમે કોંગ્રેસ પ્રદેશ કાર્યાલયથી મોરબી દુર્ઘટનાના ભોગ બનેલા પરિવારજનોને સાંત્વના પાઠવી હતી. ચિદમ્બરમે જણાવ્યું કે ગુજરાત હાઈકોર્ટે રાજ્ય સરકારને નોટિસ પાઠવી છે. મને આશા છે કે હાઈકોર્ટ આ પ્રશ્નો અને અન્ય પ્રશ્નો પણ ઉઠાવશે અને જવાબો મેળવશે. સૌથી ચોંકાવનારી ઘટના એ છે કે રાજ્ય સરકાર વતી કોઈએ પણ આ દુર્ઘટના માટે માફી માંગી નથી. જવાબદારી સ્વીકારીને કોઈએ રાજીનામું આપ્યું નથી. આટલી ભયાનક દુર્ઘટના પછી કોઈ માફી નહીં અને કોઈ રાજીનામું નહીં તે ગુજરાતની જનતા માટે વધુ શરમજનક છે. ગુજરાત વિધાનસભાની ચૂંટણી જાહેર થઈ ગઈ છે.

ગુજરાતમાં ભાજપ સરકાર 1998થી સતત સત્તામાં છે. છેલ્લા છ વર્ષમાં, તેના શાસનમાં ત્રણ મુખ્યમંત્રીઓ બદલી નાંખ્યા છે – જે મુખ્યમંત્રીઓની કામગીરી પર સ્પષ્ટ આરોપ છે. અને 2023 માં ભૂપેન્દ્ર પટેલને પણ સત્તા પરથી ઉતારી દેવામાં આવે તેવી પૂરેપૂરી શક્યતા છે. ગુજરાતમાં મુખ્યમંત્રીઓને બદલવા માટેનું કારણ એકદમ સરળ છે. ગુજરાતનું શાસન ગાંધીનગરથી નહીં, દિલ્હીથી ચાલે છે. ગુજરાતનું શાસન નિયુક્ત કરાયેલા મુખ્યમંત્રી દ્વારા નહીં, પરંતુ નરેન્દ્ર મોદી અને અમિત શાહની જોડી દ્વારા ચલાવવામાં આવે છે. ગુજરાતમાં ઊંચો વિકાસ, સમૃદ્ધિ અને સામાજિક સમરસતાના ભ્રમ પાછળ એવી કદરૂપી હકીકતો છે જે ચાલાકીથી છુપાવાયા હોવાના આક્ષેપો ચિદમ્બરમે કર્યા.

ગુજરાતનો જીડીપી માઇનસમાં:ચિદમ્બરમ

ભાજપ જ્યાં એક તરફ રાજ્યનો GDP દર શ્રેષ્ઠ હોવાના દાવા છે ત્યારે પૂર્વ નાણામંત્રી અને અર્થશાસ્ત્રી પી.ચિદમ્બરમે આંકડાઓ આપી સ્પષ્ટ કર્યું કે 20221માં ગુજરાતનો જીડીપી દર -1.9 રહ્યો છે. આંકડાઓ પર નજર કરવામાં આવે તો

વર્ષ              જીડીપી

2017-18     10.7%

2018-19      8.9%

2019-20     7.3%

2020-21     -1.9

કોંગ્રેસે આપેલ આંકડાઓ મુજબ 2017 બાદ ગુજરાતનો જીડીપી દર સતત ઘટી રહ્યો છે. સાથે જ રાજ્યના જાહેર દેવાના આંકડાઓ પણ જાહેર કરતા જણાવ્યું કે 2020-21માં રાજ્યનું કુલ દેવું રૂ 2,98,810 કરોડનું હતું જે રાજ્યની જીડીપીના 18.04 ટકા હતું. રિઝર્વ બેન્ક ઓફ ઇન્ડિયાના રિપોર્ટ અનુસાર, 2022માં ગુજરાત રાજ્યના માથે કુલ રૂપિયા 4.02,785 કરોડની જવાબદારીઓ છે.

સરકાર બદલવા માટે મત આપે ગુજરાત: ચિદમ્બરમ

કામદારો, મહિલાઓ, બેરોજગારી સાહિતના આંકડાઓ આપતા ચિદમ્બરમે જણાવ્યું કે તમને કેટલાક ઉદાહરણો આપ્યા છે જે બતાવવા માટે કે કેવી રીતે ભાજપ દ્વારા બનાવવામાં આવેલી માયાજાળ પાછળ, કેટલી બધી ભયાનક વાસ્તવિકતાઓ છુપાયેલી છે. કોઈપણ સરકાર – અને કોઈપણ પક્ષ – જો ચૂંટણી હારવાનો ડર હોય તો જ તે લોકો માટે જવાબદાર અને તેને ઉત્તરદાયી બની રહેશે. તેથી જ તમામ પરિપક્વ સંસદીય લોકશાહીમાં, લોકો દર થોડા વર્ષો પછી અથવા થોડા સમય પછી સરકારને બદલે છે. છેલ્લા બે દાયકાથી પણ વધુ સમયથી એક જ સરકાર હોવાને કારણે ગુજરાતે ઘણું સહન કર્યું છે. તેથી જ સરકારને લાગે છે કે તે લોકો માટે જવાબદાર નથી. મોરબીની દુર્ઘટના પછી જવાબદારીનો સંપૂર્ણ અભાવ તેનું એક માત્ર સ્પષ્ટ ઉદાહરણ છે. ગુજરાતની જનતાને મારી અપીલ છે કે ‘સરકાર બદલવા માટે મત આપો’.