કણભામાં ફરી એકવાર દારૂનું ગોડાઉન ઝડપાયુ, 78 લાખના મુદ્દામાલ સાથે 3 લોકોની ધરપકડ

કણભા પોલીસ સ્ટેશન (Kanbha Police Station)ની હદમાં આવતા બાકરોલ જીઆઈડીસીમાંથી (Bakrol GIDC) ફરી એક વાર દારૂ (Liquor)નું ગોડાઉન ઝડપાયુ છે. કણભા પોલીસને બાતમી મળી હતી કે બાકરોલમાં આવેલા રૂદ્ર ઈન્ડસ્ટ્રીયલ એસ્ટેટ (Rudra Industrial Estate)માં એક ગોડાઉનમાં કઈંક ગેરરીતિ ચાલી રહી છે, જેથી ડીવાયએસપી સહિતનો કાફલો એસ્ટેટમાં પહોંચ્યો હતો અને રેડ કરતા 73 લાખથી વધુની કિંમતનો દારૂનો જથ્થો મળી આવ્યો હતો.

મહત્વનું છે કે કણભા પોલીસે ગોડાઉનમાંથી 1,570 પેટી ભારતીય બનાવટની ઈંગ્લીશ દારૂ અને 131 પેટી બિયર સહિત કુલ 78 લાખના મુદ્દામાલ સાથે મનોહર પવાર, સુનિલ બિશ્નોઈ અને પ્રદિપ બિશ્નોઈની ધરપકડ કરી છે. પકડાયેલા આરોપીઓ દારૂનો જથ્થો બોક્સ બદલીને નાના વાહનોમાં લોડ કરીને અમદાવાદ શહેરમાં સપ્લાય કરતા હોવાનું સામે આવ્યુ છે. આ ગુનામાં મુખ્ય આરોપી હરીશ મારવાડીને પકડવા પોલીસે ચક્રો ગતિમાન કર્યા છે.

પ્રાથમિક તપાસમાં સામે આવ્યુ કે હરીશ મારવાડીએ કાસિન્દ્રાના મહાદેવભાઈ સોલંકી પાસેથી આ ગોડાઉન ફિનાઈલના વેપાર માટે ભાડે લીધું હતું અને છેલ્લા 15 દિવસથી દારૂનો વેપલો કરતા હતા. ત્યારે આરોપીઓ કઈ કઈ જગ્યાએ દારૂ સપ્લાય કરતા હતા અને ક્યાંથી લાવતા હતા તે દિશામાં કણભા પોલીસે તપાસ હાથ ધરી છે.

મહત્વનું છે કે બાકરોલમાં એક વર્ષ પહેલા ડીજી વિજિલન્સની રેડમાં દારૂનું ગોડાઉન ઝડપાયુ હતુ અને કરોડોનો મુદ્દામાલ જપ્ત કરવામાં આવ્યો હતો. જેમાં પોલીસ અધિકારીને સસ્પેન્ડ કરાયા હતા, ત્યારે તે જ વિસ્તારમાંથી ફરી એકવાર દારૂ ઝડપાતા બાકરોલ વિસ્તાર બૂટલેગરોનો નવો અડ્ડો બનતો હોય તેવુ ચર્ચાઈ રહ્યું છે.

આ પણ વાંચો: Ahmedabad : હ્યુમન ટ્રાફિકિંગના પ્રયાસના ગુનામાં વધુ એકની ધરપકડ

આ પણ વાંચો: માસ્ક પહેર્યા વગર ફરતી મહિલાને અટકાવ્યા બાદ રસ્તા વચ્ચે સિવિલ ડિફેન્સ કર્મચારીને માર્યો માર, મહિલા વિરુદ્ધ નોંધાયો ગુનો