ચીનના (China) શાંઘાઈ (Shanghai) શહેરમાં કોરોના વાઈરસને અટકાવવા માટે લાગુ પાડવામાં આવેલા લોકડાઉનને વધુ કડક બનાવવામાં આવ્યું છે. રાષ્ટ્રપતિ શી જિનપિંગે દેશની ઝિરો કોવિડ પોલિસીની અસરને બે ગણી કરવા માટે કહ્યું છે. જેના લીધે લાખો લોકો અનિશ્ચિતકાળ માટે ઘરમાં કેદ થયા છે. શાંઘાઈમાંથી એક વીડિયો સોશ્યિલ મીડિયા પર વાઈરલ થયો છે. જેમાં લોકો પીપીઈ કીટ પહેરેલા કર્મચારીઓ તથા પોલીસ અધિકારીઓ સાથે અથડામણમાં ઉતર્યા છે. આ લોકોને પરાણે સરકારના કવોરન્ટાઈન સેન્ટરમાં લઈ જવામાં આવી રહ્યા છે. તેને કારણે સરકાર માટે લોકોમાં રોષ વ્યાપ્યો છે.
નવા કેસ પહેલા કરતાં ઘટ્યા છે. જોકે તેમ છતાં પ્રતિબંધોમાં કોઈ મોકળાશ આપવામાં આવી નથી. સ્થાનિક અધિકારી વાઈરસના કોમ્યુનિટી ટ્રાન્સમિશનને રોકવા માટે પ્રયત્ન કરી રહ્યા છે. નવી કડક પોલિસી હેઠળ જે લોકોનો ટેસ્ટ નેગેટિવ આવી રહ્યો છે, તેને પણ કવોરન્ટાઈન કેન્દ્રમાં બંધ કરવામાં આવી રહ્યા છે. સોશ્યિલ મીડિયા પોસ્ટ અને સ્થાનિક સરકારની ઓનલાઈન વાઈરલ નોટિસ પ્રમાણે શહેરના ઘણા ભાગમાં આખી ઈમારતોને બ્લોક કરવામાં આવી છે અને બધાને પરાણે ઘરમાં રહેવા માટે કહેવામાં આવ્યું છે.
એક વાઈરલ વીડિયો પ્રમાણે લોકો પોલીસ સાથે સંઘર્ષમાં ઉતરેલા જોવા મળે છે. વીડિયોમાં પોલીસ કહી રહ્યા છે કે અત્યારે જે લોકો એક જ ફ્લોર પર રહે છે તે બધાને કવોરન્ટાઈન થવા મોકલવામાં આવી રહ્યા છે. એવું નથી કે તમે જે કરવા માંગો છો એ કરી શકશો. આ અમેરિકા નથી આ ચીન છે. તો અન્ય એક પોલીસ અધિકારી સેનેટાઈઝરની બોટલ લઈને ચારે તરફ સ્પ્રે કરી રહ્યો છે અને કહે છે કે અમે પોતાના દેશના નિયમો અને મહામારી નિયંત્રણ નીતિઓને માનવા માટે પ્રતિબદ્ધ છીએ.
ચીનમાંથી વીડિયો આવી રહ્યો છે તેની પુષ્ટિ કરવી મુશ્કેલ છે. કારણ કે ત્યાં ફેસબુક અને ટ્વીટર જેવા પ્લેટફોર્મ ઉપર પ્રતિબંધ છે તેમનું પોતાનું સોશ્યિલ મીડિયા એપ વીબો છે. એવામાં વીડિયોમાં જોવા મળતા લોકોની પુષ્ટિ કરવી મુશ્કેલ છે. જોકે ઓનલાઈન વાઈરલ થયેલી નોટિસમાં બેથી ત્રણ દિવસના સાઈલન્ટ પીરિયડ વિશે કહેવામાં આવ્યું છે. ખાસ તો મુશ્કેલીની વાત એ છે કે લોકો બહારથી જમવાનું ઓર્ડર નથી કરી શકતા, તેથી લોકોની જમવાની મુશ્કેલી પણ વધી છે. લોકોએ પોતાના ઘરની ચાવી પણ સ્વાસ્થ્ય કર્મીઓને સોંપવી પડે છે, જેથી તેઓ કવોરન્ટાઈન હોય ત્યારે તેમના ઘરને ડિસઈન્ફેક્ટ કરી શકાય.