ભારતમાં બિઝનેસ શરૂ કરતા પહેલા જ Tesla group એ 6000 થી વધુ કર્મચારીઓની છટણીની કરી જાહેરાત, જાણો શું કે કારણ

અબજોપતિ એલોન મસ્ક(Elon Musk)ની ઇલેક્ટ્રિક કાર કંપની ટેસ્લાએ નાણાકીય વર્ષ 2024-25ના પ્રથમ ત્રિમાસિક ગાળાના પરિણામો જાહેર કર્યા છે (Tesla Q1 Results) અને જાન્યુઆરી-માર્ચ ક્વાર્ટરમાં કંપનીના ચોખ્ખા નફામાં 55 ટકાનો ઘટાડો થયો છે. એક તરફ ત્રિમાસિક પરિણામો જાહેર કરવામાં આવી રહ્યા હતા, તો બીજી તરફ કંપનીએ મોટી છટણીની જાહેરાત કરી. રિપોર્ટ અનુસાર, ખર્ચમાં ઘટાડાને ટાંકીને, ટેસ્લાએ 6,000 લોકોને છૂટા કરવાની તૈયારી કરી છે.

2020 પછી પ્રથમ વખત આવકમાં ઘટાડો થયો છે

સૌથી પહેલા ટેસ્લાના ત્રિમાસિક પરિણામોની વાત કરીએ, પછી તમને જણાવી દઈએ કે 31 માર્ચ, 2024 ના રોજ પૂરા થયેલા પ્રથમ ક્વાર્ટરમાં કંપનીનો ચોખ્ખો નફો $1.13 બિલિયન હતો, જે એક વર્ષ પહેલાના સમાન ક્વાર્ટરમાં $2.51 બિલિયન હતો. મતલબ કે કંપનીના નફામાં 55 ટકાનો ઘટાડો થયો છે. ઘટતા નફાની સાથે ટેસ્લા (Tesla Revenue Fall)ની આવકમાં પણ 2020 પછી પ્રથમ વખત ઘટાડો થયો છે.

મસ્કને 4 મહિનામાં $62 બિલિયનનું નુકસાન થયું

તાજેતરના ભૂતકાળમાં ટેસ્લાના શેરમાં તીવ્ર ઘટાડો થયો છે અને તેની અસર કંપનીના માલિક એલોન મસ્ક (Tesla CEO Elon Musk)ની નેટવર્થ પર પણ જોવા મળી હતી. સંપત્તિમાં ઘટાડાને કારણે પહેલા તેણે વિશ્વના નંબર વન અમીર વ્યક્તિનો તાજ ગુમાવ્યો અને પછી મસ્ક અમીરોની યાદીમાં ચોથા સ્થાને સરકી ગયો. બ્લૂમબર્ગ બિલિયોનેર્સ ઈન્ડેક્સ અનુસાર, તેમની કુલ સંપત્તિ ઘટીને $166 બિલિયન થઈ ગઈ છે. આ વર્ષે 2024, એલોન મસ્કને $62 બિલિયનથી વધુનું નુકસાન થયું છે.

કેલિફોર્નિયા અને ટેક્સાસમાં સૌથી વધુ છટણી

ઘણા અહેવાલોમાં ટેસ્લાના ત્રિમાસિક નફામાં ઘટાડાનું અનુમાન પહેલેથી જ કરવામાં આવ્યું હતું અને તેની જાહેરાત પહેલા, ટેસ્લામાં મોટી છટણીની જાહેરાત કરવામાં આવી હતી. બિઝનેસ ટુડે પર પ્રકાશિત અહેવાલ મુજબ, એલોન મસ્કએ 6,000 થી વધુ કર્મચારીઓની છટણી કરવાની જાહેરાત કરી છે. કંપનીએ યાદી તૈયાર કરી છે અને આ અંતર્ગત ટેસ્લાના કેલિફોર્નિયા યુનિટમાં 3,332 કર્મચારીઓ જ્યારે ટેક્સાસ યુનિટમાં 2,688 કર્મચારીઓને બહારનો રસ્તો બતાવવામાં આવશે.

ઘટતી માગ અને માર્જિનની અસર

રિપોર્ટમાં કહેવામાં આવ્યું છે કે ટેસ્લામાં છટણી(Tesla Lay Off)ની પ્રક્રિયા 14 જૂન, 2024થી શરૂ થવા જઈ રહી છે. એવું કહેવામાં આવી રહ્યું છે કે ઇલેક્ટ્રિક કાર કંપનીએ ઘટતી માગ અને માર્જિનના કારણે છટણીનું આ પગલું ભર્યું છે. કોસ્ટ કટિંગ માટે જોબ કટની અસર ટેસ્લાના બફેલો, ન્યૂયોર્ક યુનિટમાં કામ કરતા 285 કર્મચારીઓને પણ થશે. નોંધનીય છે કે યુએસ રેગ્યુલેટરી ફાઇલિંગ અનુસાર, ટેસ્લામાં ગત વર્ષે 2023ના અંતે કર્મચારીઓની સંખ્યા 140,000થી વધુ હતી.

‘વાર્ષિક 1 બિલિયન ડૉલરની બચત થશે…’

ત્રિમાસિક પરિણામોની જાહેરાત પછી, ટેસ્લા દ્વારા કોન્ફરન્સ કોલનું આયોજન કરવામાં આવ્યું હતું. એએફપીના અહેવાલ મુજબ, કંપનીના મુખ્ય નાણાકીય અધિકારી વૈભવ તનેજાએ જણાવ્યું હતું કે નોકરીઓ કાપવાથી ટેસ્લાના ખર્ચમાં વાર્ષિક $1 બિલિયનથી વધુની બચત થશે. તેમણે એમ પણ કહ્યું કે ટેસ્લા 2025 ના બીજા ભાગમાં ઉત્પાદન શરૂ થાય તે પહેલાં નવા મોડલના લોન્ચિંગને વેગ આપવાની યોજના ધરાવે છે.