MPL Lays Off : ભારત સરકારના આ નિર્ણય પછી 350 કર્મચારીઓએ સાગમટે નોકરી ગુમાવી, આ જાણીતી કંપનીએ પાણીચું પકડાવ્યું

MPL Lays Off : GST કાઉન્સિલ(GST Council)ના ઓનલાઈન ગેમિંગ પર 28 ટકા GST (GST on Online Gaming)લાદવાના નિર્ણય બાદ ઓનલાઈન સ્પોર્ટ્સ પ્લેટફોર્મ Mobile Premier League (MPL) એ એક મોટું પગલું ભર્યું છે. ખર્ચ ઘટાડવાના હેતુસર MPL એ કંપનીના લગભગ 350 કર્મચારીઓને નોકરીમાંથી કાઢી મૂક્યા છે. આ કંપનીની ભારતીય ટીમના કર્મચારીઓના 50 ટકા જેટલી છે.

MPLના કર્મચારીઓને મોકલવામાં આવેલા આંતરિક મેલમાં આ માહિતી આપવામાં આવી છે. GST કાઉન્સિલે તાજેતરમાં એક નિર્ણયની જાહેરાત  સાથે ઓનલાઈન ગેમિંગ ઉપરાંત  કેસિનો તેમજ હોર્સ રેસિંગ પર GST લાદ્યા બાદ 28%  કરવાનો નિર્ણય લેવામાં આવ્યો છે.

મોબાઈલ પ્રીમિયર લીગ (MPL)ના સહ-સ્થાપક સાઈ શ્રીનિવાસે તેમના કર્મચારીઓને મોકલેલા ઈ-મેલમાં જણાવ્યું હતું કે ગયા અઠવાડિયે સ્પષ્ટ કરવામાં આવ્યું હતું કે 28 ટકા GST ગ્રોસ ગેમિંગ રેવન્યુને બદલે સંપૂર્ણ મૂલ્ય પર વસૂલવામાં આવશે.

400 ટકા સુધી ભારણ વધશે

શ્રીનિવાસે કહ્યું કે GST કાઉન્સિલના નવા નિયમોથી અમારા પર ટેક્સનો બોજ 350-400 ટકા વધી જશે. એક કંપની તરીકે, અમે 50 ટકા અથવા વધુમાં વધુ 100 ટકા વૃદ્ધિ માટે તૈયાર રહી શકીએ છીએ. પરંતુ આ અચાનક જંગી વૃદ્ધિને સમાવવા માટે, આપણે કેટલાક કડક નિર્ણયો લેવાની જરૂર છે.

કંપની આ ખર્ચમાં ઘટાડો કરશે

શ્રીનિવાસે જણાવ્યું હતું કે ડિજિટલ કંપની તરીકે અમારા વેરિયેબલ ખર્ચમાં મુખ્યત્વે કર્મચારીઓ, સર્વર અને ઓફિસ સંબંધિત ઈન્ફ્રાસ્ટ્રક્ચરનો સમાવેશ થાય છે. તેથી, બજારમાં ટકી રહેવા અને વ્યવસાયને સધ્ધર રાખવા માટે આપણે આ ખર્ચ ઘટાડવાના પગલાં લેવાની જરૂર છે. અમે અમારા સર્વર અને ઓફિસ ઈન્ફ્રાસ્ટ્રક્ચરની કિંમત પર ફરીથી વાટાઘાટો કરવાનું કામ શરૂ કરી દીધું છે.

350 લોકોને કંપનીમાંથી કાઢી મૂકવામાં આવ્યા

શ્રીનિવાસે કહ્યું, “જો કે, આ સ્થિતિ હોવા છતાં અમારે હજુ પણ અમારા કર્મચારીઓ સાથે સંકળાયેલા ખર્ચમાં ઘટાડો કરવાની અમને ફરજ પડશે. અમને અફસોસ છે કે તમારામાંથી અંદાજે 350 લોકોએ જવું પડશે. આ એક દુઃખદ નિર્ણય છે કારણ કે તે અમારા ઘણા મિત્રો અને સહકાર્યકરોને અસર કરશે.”

“દુર્ભાગ્યવશ, આ નિર્ણયના પરિણામે ઓલિગોપોલિસ્ટિક માર્કેટના ઉદભવમાં પરિણમશે. માત્ર થોડીક સ્થાપિત અને સારી રીતે સ્થાપિત કંપનીઓ તેમના હાલના મૂડી અનામતનો ઉપયોગ કરીને આ ફેરફારમાંથી બહાર નીકળી શકશે. જોકે, તેમની આવક અને મૂલ્યાંકનમાં પણ નોંધપાત્ર ઘટાડો થશે ” તેમ કંપનીના પ્રવક્તાએ ઉમેર્યું હતું