Gold Price Today : અમેરિકાના આ પગલાંથી ભારતમાં સોનાના ભાવ નીચે ઉતરશે, વાંચો વિગતવાર

યુક્રેન સાથે ચાલી રહેલા યુદ્ધ વચ્ચે(russia ukraine war) રશિયાની મુસીબતો દિવસેને દિવસે વધી રહી છે. જોકે આપત્તિની આ ઘડીમાં ભારત માટે કેટલીક તકો પણ દેખાઈ રહી છે. રશિયામાંથી સસ્તા સોનાની આયાતને લઈને નવી આશા જાગી છે કારણ કે અમેરિકા-યુરોપ હવે રશિયામાંથી સોનાની આયાત પર પ્રતિબંધ મૂકવાની તૈયારી કરી રહ્યું છે. અમેરિકી રાષ્ટ્રપતિ જો બિડેને રવિવારે તાજેતરમાં કહ્યું હતું કે G-7 સભ્ય દેશો રશિયાથી સોનાની આયાત પર પ્રતિબંધની જાહેરાત કરવા જઈ રહ્યા છે. યુક્રેન પર રશિયાના હુમલા બાદ લાદવામાં આવી રહેલા પ્રતિબંધોના દોરમાં આ એક નવો પ્રતિબંધ હશે.

બિડેન વહીવટીતંત્રના વરિષ્ઠ અધિકારીઓએ જણાવ્યું હતું કે ઇંધણ પછી સોનું રશિયાની બીજી સૌથી મોટી નિકાસ છે. આવી સ્થિતિમાં રશિયામાંથી સોનાની આયાત પર અંકુશ મુકવાથી રશિયા માટે વૈશ્વિક બજારોમાં ભાગ લેવો મુશ્કેલ બનશે. આ દરમિયાન બિડેને પણ પોતાના ટ્વિટર સંદેશમાં કહ્યું હતું કે રશિયા તેના સોનાના વેચાણથી અબજો ડોલરની કમાણી કરે છે. તેના પર પ્રતિબંધ લગાવવાથી તેને મોટું આર્થિક નુકસાન થશે.

ભારત માટે સારી તક

બજારના જાણકારોનું કહેવું છે કે પશ્ચિમી દેશોમાં ક્રૂડની જેમ સોનાની આયાત પર પ્રતિબંધ લગાવ્યા બાદ રશિયા ફરી એકવાર ભારત તરફ વળી શકે છે. એપ્રિલમાં રશિયાએ ભારતને સસ્તા ભાવે ક્રૂડ ઓઈલ ખરીદવાની ઓફર કરી હતી. જે બાદ માત્ર બે મહિનામાં રશિયા પાસેથી ઓઈલની ખરીદી 50 ગણી વધી ગઈ છે. એવી અટકળો છે કે રશિયા ભારતને તેના સોનાની નિકાસ માટે ઓછી કિંમતે ઓફર પણ કરી શકે છે.

રશિયાની સોનાની નિકાસ કેટલી છે?

તાજેતરના વર્ષોમાં સોનું એ ઊર્જા પછી રશિયાનું બીજું સૌથી મોટું નિકાસ ઉત્પાદન રહ્યું છે. વર્ષ 2020 માં રશિયાએ લગભગ 19 બિલિયન ડોલરના સોનાની નિકાસ કરી જે કુલ વૈશ્વિક સોનાની નિકાસના લગભગ 5 ટકા છે. ખાસ વાત એ છે કે રશિયન સોનાની લગભગ 90 ટકા નિકાસ માત્ર G-7 દેશોને જ મોકલવામાં આવતી હતી. તેમાંથી 90 ટકાથી વધુ સોનાની નિકાસ માત્ર બ્રિટનમાં જ થતી હતી