એશિયાના સૌથી ધનિક ઉદ્યોગપતિ મુકેશ અંબાણીના (Mukesh Ambani) નાના ભાઈ અનિલ અંબાણીના (Anil Ambani) દિવસો સારા નથી ચાલી રહ્યા. અનિલ અંબાણી લાઈમલાઈટમાં રહે છે પરંતુ ક્યારેક તેમની કંપનીના વેચાણના સમાચાર આવે છે અને ત્યારબાદ કંપનીઓના શેરના ભાવ તળીયે પહોચી ગયા તેવા ન્યૂઝ આવે છે. હાલમાં જે મામલો સામે આવ્યો છે તે ચિંતાજનક છે. અનિલ અંબાણીની આજે ED ઓફિસમાં પૂછપરછ કરવામાં આવી હતી. ED અધિકારીઓએ આ સમાચારની પુષ્ટિ કરતા કહ્યું કે ઉદ્યોગપતિ અનિલ અંબાણીની વિદેશી હૂંડિયામણ સંબંધિત કાયદાના કથિત ઉલ્લંઘન સાથે સંબંધિત તપાસ મુદ્દે પૂછપરછ કરવામાં આવી છે.
અધિકારીઓએ જણાવ્યું કે અનિલ અંબાણી ફોરેન એક્સચેન્જ મેનેજમેન્ટ એક્ટ એટલે કે ફેમાની (FEMA) વિવિધ કલમો હેઠળ નોંધાયેલા કેસમાં પોતાનું નિવેદન નોંધવા માટે બેલાર્ડ એસ્ટેટ વિસ્તારમાં ફેડરલ એજન્સીની ઓફિસમાં હાજર થયા હતા. ફોરેન એક્સચેન્જ મેનેજમેન્ટ એક્ટ (ફેમા)ની વિવિધ કલમો હેઠળ દાખલ કરવામાં આવેલા નવા કેસના ભાગરૂપે અંબાણીના નિવેદનને નોંધવામાં આવ્યું હતું.
ઈન્ડિયા ટુડેના અહેવાલ મુજબ મુકેશ અંબાણીના ભાઈ અનિલ અંબાણી સવારે 10 વાગ્યે EDની મુંબઈ ઓફિસ પર પહોંચ્યા હતા. તેમની ઓફિસના અધિકારીઓ બહાર રાહ જોઈ રહ્યા હતા. 2020ની શરૂઆતમાં અનિલ અંબાણી યસ બેંકના પ્રમોટર રાણા કપૂર અને અન્યો વિરુદ્ધ મની લોન્ડરિંગ કેસમાં ED સમક્ષ હાજર થયા હતા.
આ પણ વાંચો : GST Council Meeting: 11 જુલાઈએ GST કાઉન્સિલની મીટિંગ થશે, બેઠકમાં લેવાઈ શકે છે આ મોટા નિર્ણયો
વર્ષ 2022 માં ઓગસ્ટ મહિનામાં આવકવેરા વિભાગે કાળા નાણાં વિરોધી કાયદા હેઠળ અંબાણીને બે સ્વિસ બેંક ખાતાઓમાં 814 કરોડ રૂપિયાથી વધુની અઘોષિત રકમ પર 420 કરોડની કથિત કરચોરી માટે નોટિસ જાહેર કરી હતી. માર્ચમાં બોમ્બે હાઈકોર્ટે ઈન્કમ ટેક્સ શો કોઝ નોટિસ અને દંડની માગ પર વચગાળાનો સ્ટે આપવાનો આદેશ આપ્યો હતો.