Budget 2021: બજેટ રજૂ થાય તે પહેલાં મળ્યા સારા સમાચાર, આ મોરચે મળી મોટી સફળતા

Budget 2021: આજે સવારે 11 વાગ્યે નાણામંત્રી નિર્મલા સીતારમણ નાણાકીય વર્ષ 2021-22નું બજેટ રજૂ કરશે. આ પહેલા પણ સરકાર માટે રાહતના સમાચાર આવ્યા છે. GST કલેક્શનનો રેકોર્ડ જાન્યુઆરીમાં વધ્યો છે. જાન્યુઆરીમાં જીએસટીનું કુલ કલેક્શન 1.20 લાખ કરોડ રૂપિયા પર પહોંચી ગયું છે.

નાણાં મંત્રાલયે કહ્યું કે જાન્યુઆરી 2021 માં જીએસટી કલેક્શન અગાઉના વર્ષ કરતા ૮ ટકા વધ્યું છે. નાણાં મંત્રાલયે એક નિવેદનમાં કહ્યું છે કે ’31 જાન્યુઆરી 2021 ના ​​સાંજના 6 વાગ્યા સુધી જીએસટીની આવક 1,19,847 કરોડ રૂપિયા છે. સેન્ટ્રલ જીએસટી (CGT) રૂ .21,923 કરોડ, સ્ટેટ્સ જીએસટી (SGST) 29,014 કરોડ, ઈન્ટિગ્રેટેડ જીએસટી (IGST) રૂ 60,288 છે.

જીએસટી કલેક્શનમાં થયેલા વધારા અંગે સરકારી સૂત્રો કહે છે કે કરવેરાની છેતરપિંડીના મામલે વિભાગ દ્વારા કડક કાર્યવાહી કરવામાં આવી રહી છે જેના પગલે રીટર્ન ફાઇલિંગમાં તેજી આવી છે. નવેમ્બર 2020 થી અત્યાર સુધીમાં 274 લોકોની ધરપકડ કરવામાં આવી છે, જ્યારે 8500 બોગસ કંપનીઓ વિરુદ્ધ 2700 કેસ નોંધાયા છે. આ કાર્યવાહીને કારણે 858 કરોડ રૂપિયા સરકારી તિજોરીમાં આવ્યા હતા.

જીએસટી કલેક્શનના આંકડા પર નજર કરીએ તો નાણાકીય વર્ષ 2020-21ના પહેલા ૬ માસિક એટલે કે એપ્રિલ-સપ્ટેમ્બરની વચ્ચે સરેરાશ કલેક્શનમાં 24 ટકાનો ઘટાડો થયો હતો. જો કે, બીજા ભાગમાં તેમાં 8 ટકાનો વધારો જોવા મળ્યો હતો. જાન્યુઆરીમાં આયાત માલની આવકમાં 16 ટકાનો વધારો થયો છે. આ ઉપરાંત ઘરેલુ ટ્રાંઝેક્શનની આવકમાં 6 ટકાનો વધારો થયો છે.