8th Pay Commission : શું પેન્શનરોને DA અને અન્ય લાભો નહીં મળે ? સંપૂર્ણ સત્ય સામે આવ્યું
તાજેતરમાં 8મા પગાર પંચ અને DA વધારા અંગે પેન્શનરો માટે કેટલીક અફવાઓ ફેલાઈ છે કે Financial Act 2025 હેઠળ લાભો બંધ થશે. પરંતુ PIB ફેક્ટ ચેક મુજબ કઈક અલગ જ વાત સામે આવી.
તાજેતરમાં 8મા પગાર પંચને લઈને કેટલીક અફવાઓ સામે આવી છે, જેના કારણે નિવૃત્ત સરકારી કર્મચારીઓ અને પેન્શનરોમાં ચિંતા ફેલાઈ છે. આ અફવાઓમાં એવો દાવો કરવામાં આવી રહ્યો છે કે હવે પેન્શનરોને ડીએ (મોંઘવારી ભથ્થું) વધારો કે 8મા પગાર પંચ જેવા લાભો મળશે નહીં. ખાસ કરીને નાણાકીય અધિનિયમ 2025ને લઈને આ પ્રકારની ચર્ચાઓએ લોકોમાં ગેરસમજ ઊભી કરી છે. પરંતુ હકીકત શું છે? ચાલો સમગ્ર સત્ય જાણીએ.
તાજેતરના દિવસોમાં સોશિયલ મીડિયા અને વોટ્સએપ પર એક સંદેશ વાયરલ થયો છે, જેમાં કહેવામાં આવ્યું છે કે નાણાકીય અધિનિયમ 2025 બાદ સરકારે પેન્શનરોને મળતા અનેક લાભો બંધ કરી દીધા છે. આ સંદેશમાં દાવો કરવામાં આવ્યો છે કે હવે નિવૃત્ત સરકારી કર્મચારીઓને ડીએમાં વધારો નહીં મળે અને ભવિષ્યના પગાર પંચ, જેમાં પ્રસ્તાવિત 8મો પગાર પંચ પણ સામેલ છે, તેનો લાભ પણ પેન્શનરોને નહીં આપવામાં આવે. આ દાવાઓથી લાખો પેન્શનરોમાં ચિંતા વ્યાપી ગઈ છે.
વાયરલ મેસેજમાં શું દાવો કરવામાં આવ્યો?
વાયરલ મેસેજ મુજબ, નાણાકીય અધિનિયમ 2025 લાગુ થયા બાદ નિવૃત્ત સરકારી કર્મચારીઓ માટે ડીએ વધારો બંધ થઈ જશે. સાથે જ એવો દાવો પણ કરવામાં આવ્યો છે કે પેન્શનરોને હવે 8મા પગાર પંચ સહિત કોઈપણ ભવિષ્યના પગાર પંચના લાભો મળશે નહીં. સંદેશમાં એવું પણ કહેવામાં આવ્યું છે કે આ નિર્ણયથી દેશભરના લાખો પેન્શનરો પ્રભાવિત થશે.
તથ્ય ચકાસણીમાં શું સામે આવ્યું?
પ્રેસ ઇન્ફર્મેશન બ્યુરો (PIB)ની ફેક્ટ ચેક યુનિટે આ તમામ દાવાઓને સંપૂર્ણપણે ખોટા અને ભ્રામક જાહેર કર્યા છે. PIB મુજબ, નાણાકીય અધિનિયમ 2025માં એવી કોઈ જોગવાઈ નથી કે જેના કારણે પેન્શનરોને ડીએ અથવા પગાર પંચના લાભોથી વંચિત રાખવામાં આવે. સરકારે સ્પષ્ટ રીતે કહ્યું છે કે નિવૃત્ત કર્મચારીઓને અગાઉની જેમ ડીએ વધારો મળતો રહેશે અને ભવિષ્યના પગાર પંચની ભલામણો પણ પેન્શનરો પર લાગુ થશે, જેમ કે અગાઉના પગાર પંચોમાં કરવામાં આવ્યું હતું.
પછી મૂંઝવણ કેમ ઊભી થઈ?
આ ગેરસમજ CCS (પેન્શન) નિયમો, 2021ના નિયમ 37માં કરાયેલા એક સુધારા કારણે ઊભી થઈ છે. આ નિયમ એવા સરકારી કર્મચારીઓને લાગુ પડે છે, જેઓ કોઈ કારણસર જાહેર ક્ષેત્રના ઉપક્રમો (PSU)માં સ્થાનાંતરિત થયા હોય. આ નિયમ મુજબ, જો કોઈ કર્મચારી ગંભીર ગેરવર્તણૂકમાં દોષિત સાબિત થાય, તો તેના કેટલાક નિવૃત્તિ લાભો જપ્ત થઈ શકે છે. જોકે, આ નિયમનો સામાન્ય પેન્શનરો, ડીએ વધારો અથવા પગાર પંચ સાથે કોઈ સીધો સંબંધ નથી.
શું ડીએ અને 8મા પગાર પંચના લાભો બંધ થશે?
બિલકુલ નહીં. સરકારે ડીએ વધારો બંધ કર્યો નથી અને ન તો પેન્શનરોને 8મા પગાર પંચ અથવા ભવિષ્યના પગાર પંચના લાભોથી બાકાત રાખ્યા છે. જ્યારે પણ નવું પગાર પંચ અમલમાં આવે છે, ત્યારે તેની ભલામણો સરકારની મંજૂરી બાદ વર્તમાન કર્મચારીઓ સાથે-સાથે પેન્શનરો પર પણ લાગુ કરવામાં આવે છે.
