પંજાબ નેશનલ બેંકે તેના ગ્રાહકોને ચેતવણી આપી : જો તમે આ લિંક પર ક્લિક કરશો તો ખાતું થઈ જશે ખાલી

PNB Alert : જો તમે દેશની બીજી સૌથી મોટી પંજાબ નેશનલ બેંકના ગ્રાહક છો, તો તમારા માટે મહત્વના સમાચાર છે. બેંકે તેના કરોડો ગ્રાહકો માટે એલર્ટ જાહેર કર્યું છે. PNB નું કહેવું છે કે સાયબર ક્રિમિનલ્સ બેંકની 130મી વર્ષગાંઠના નામે ગ્રાહકોને નકલી મેસેજ મોકલી રહ્યા છે. બેંક દ્વારા આવી કોઈ ઓફર કરવામાં આવી રહી નથી અને બેંક તેને સમર્થન આપતી નથી. આ એક ફેક લિંક છે જેનો ઉદ્દેશ્ય ગ્રાહકોના પૈસા પડાવી લેવાનો છે. બેંકે આ સંબંધમાં એક ટ્વીટમાં કહ્યું છે કે જો તમારી પાસે બેંકની 130મી વર્ષગાંઠ નિમિત્તે કોઈ મેસેજ આવે છે તો સાવચેત રહો. આવી લિંક્સને ક્લિક કે શેર કરશો નહીં. આમ કરવાથી તમે તમારી મહેનતની કમાણી ગુમાવશો.

બેંકે તેના ગ્રાહકોને સલાહ આપી છે કે તેઓ બેંકના નામ પર મોકલવામાં આવતા કોઈપણ મેસેજ પર વિચાર્યા વગર ક્લિક ન કરે. એટલું જ નહીં, તેઓએ ફેસબુક, ટ્વિટર અને વ્હોટ્સએપ જેવા સોશિયલ મીડિયા પ્લેટફોર્મ પર ફરતા સંદેશાઓની પણ તપાસ કરવી જોઈએ. જો કોઈ વ્યક્તિ તમને વ્યક્તિગત માહિતી જેમ કે નામ, આધાર નંબર, પાન નંબર અથવા OTP બેંકિંગ વિગતો જેમ કે એકાઉન્ટ નંબર, ક્રેડિટ/ડેબિટ કાર્ડ વગેરે માટે પૂછે, તો ભૂલથી પણ આ વિગતો શેર કરશો નહીં. આ તમારા એકાઉન્ટને જોખમમાં મૂકી શકે છે.

ગ્રાહકોને લૂંટવાના અવનવા પેતરા

દેશ અને દુનિયામાં ઓનલાઈન ટ્રાન્ઝેક્શનનું ચલણ ઝડપથી વધી રહ્યું છે. પરંતુ સાયબર ગુનેગારો ગ્રાહકોને લૂંટવા માટે પણ નવા નવા રસ્તા અપનાવી રહ્યા છે. આમાંના મોટાભાગના કેસ KYC અને PAN અપડેટના નામે છેતરપિંડીના છે. ક્યારેક ફોન કરીને, ક્યારેક મોબાઈલ પર લિંક મોકલીને તો ક્યારેક અન્ય માધ્યમથી ગ્રાહકો ફસાઈ જાય છે. બેંકોનું કહેવું છે કે ગ્રાહકોએ ઓનલાઈન KYC ટાળવું જોઈએ અને આ કામ માત્ર બ્રાન્ચમાં જઈને જ કરવું જોઈએ. સાયબર ગુનેગારો તમારા એકાઉન્ટને નિષ્ક્રિય થવાથી બચાવવા માટે KYC અથવા PAN અપડેટ માટે પૂછે છે. તેઓ એક લિંક મોકલે છે જે વ્યક્તિગત માહિતી માટે પૂછે છે. આ પછી, થોડીવારમાં આ ગુનેગારો ગ્રાહકોના ખાતામાંથી લાખો રૂપિયા ઉપાડી લે છે.

ગુજરાતના તમામ સમાચાર અને બ્રેકિંગ ન્યૂઝ ગુજરાતીમાં વાંચો tv9gujarati.com પર

બિઝનેસના તમામ સમાચાર વાંચવા માટે જોડાયેલા રહો…