છેલ્લા કેટલાક દિવસોથી રાજ્યમાં હાર્ટએટેકથી યુવાનોના મોત નિપજવાની ઘટના સતત સામે આવી રહી છે. યુવાનોમાં એક પ્રકારે ચિંતાનો માહોલ સર્જાયો છે. સાબરકાંઠા જિલ્લામાં એક મહિનામાં આ ત્રીજો બનાવ છે, કે યુવાન વયે હાર્ટએટેક આવવાથી મોત નુપજ્યુ હોય. ઈડર તાલુકાના સાબલવાડ ગામના એક ખેડૂતને ઘરમાં જ હોવા દરમિયાન હાર્ટ એટેક આવતા મોત નિપજ્યુ છે.
સાબલવાડ ગામના 42 વર્ષીય ખેડૂત યુવક ઘરમાં જ હતા, એ વખતે તેઓને અસ્વસ્થતા જણાઈ હતી અને એકાએક જ ઘરમાં ઢળી પડ્યા હતા. બેહોશ જેવી સ્થિતિમાં લાગતા પરિવારજનોએ તેમને તુરત જ ઈડરની ખાનગી હોસ્પિટલમાં ખસેડ્યા હતા. જ્યાં તેમનુ મોત નિપજ્યુ હોવાનુ તબીબોએ જણાવ્યુ હતુ. આ અગાઉ ગત ભાદરવી પૂર્ણિમાના દિવસે હિંમતનગરના 22 વર્ષીય યુવાન કેવિન રાવલનુ ઘરમાં જ ઢળી પડતા મોત નિપજ્યુ હતુ. અરવલ્લીમાં પણ પંદરેક દિવસ અગાઉ 35 વર્ષીય યુવક હાર્ટએટેકથી ઢળી પડતા મોતને ભેટયાના સમાચાર હતા.
Published On - 2:40 pm, Mon, 23 October 23