Gir Somnath: ગીરસોમનાથ જિલ્લાના સૂત્રાપાડાના અનેક વિસ્તારોમાં ધોધમાર વરસાદ વરસ્યો છે. ભારે વરસાદને લઈ પ્રશ્નાવડા ગામ બેટમાં ફેરવાયું છે. હાલ પ્રશ્નાવડા ગામમાં જ્યાં જૂઓ ત્યાં પાણી જ પાણી દેખાઈ રહ્યું છે અને શેરીઓમાં જાણે નદી વહેતી થઈ હોય તેવા જેવા દ્રશ્યો સર્જાયા છે. ચારેય તરફ પાણી ભરાયા હોવાના કારણે લોકો પોતાના ઘરમાં જ રહેવા મજબૂર બન્યા છે. વહેલી સવારે બે કલાકમાં સૂત્રાપાડામાં 4 ઇંચ વરસાદ ખાબક્યો હતો. કોડીનારમાં અઢી ઇંચ, વેરાવળમાં દોઢ ઇંચ વરસાદ વરસ્યો હતો. વેરાવળ કોડીનાર નેશનલ હાઇવે પર વાહનવ્યવહાર ખોરવાયો હતો. મોરડીયા પેઢાવાળા વચ્ચે ડાયવર્ઝન નદીમાં ફેરવાયું હતું. જૂનો પુલ તોડી નાખ્યો પણ નવો પુલ સમયસર પૂર્ણ ન કર્યો જેથી રાહદારીઓ જોખમી રીતે પુલ પરથી પસાર થવા મજબુર બન્યા છે. હાલ જોખમી પુલ પરથી પસાર રાહદારીઓ થઇ રહ્યા છે.
ગુજરાતમાં ચોમાસામાં જાણે આભ વરસી રહ્યુ છે. દક્ષિણ ગુજરાત, સૌરાષ્ટ્ર, મધ્ય ગુજરાત સહિતના અનેક વિસ્તારોમાં ચોમાસાની શરુઆતમાં જ સારો એવો વરસાદ નોંધાયો છે. 24 કલાકમાં રાજ્યના કુલ 200થી વધુ તાલુકામાં વરસાદ વરસ્યો છે. સૌથી વધુ ગીર સોમનાથના સૂત્રાપાડામાં 7 ઈંચ જેટલો વરસાદ ખાબક્યો છે. આ સિવાય પણ અનેક સ્થળોએ સારો એવો વરસાદ નોંધાયો છે. વરસાદના પગલે નદી-નાળા છલકાયા છે. તો ઘણા શહેરોમાં રસ્તાઓમાં પાણી ભરાઇ ગયા છે. જેના કારણે લોકોને અવરજવરમાં મુશ્કેલીઓનો સામનો કરવો પડી રહી છે.