ભારતમાં આઈપીએલની સફળતા બાદ એક પછી એક એમ દરેક રમતમાં લીગ કલ્ચરની શરૂઆત થવા લાગી છે. ત્યારે ગુજરાત ટેબલ ટેનિસ (Gujarat Table Tennis) માં પણ હવે લીગની શરૂઆત કરવામાં આવી રહી છે. ગુજરાત ટેબલ ટેનિસ એસોસિએશનના જણાવ્યા પ્રમાણે જુન મહિનાના અંતમાં ગુજરાત સુપર લીગ (Gujarat Super League) ની શરૂઆત કરવા જઇ રહી છે. આ લીગમાં રમવા માટે કુલ 80 ખેલાડીઓની હરાજી કરવામાં આવી હતી. આ હરાજીમાં 80 માંથી કુલ 48 ખેલાડીઓને ખરીદવામાં આવ્યા હતા. લીગમાં કુલ 8 ટીમો ભાગ લઇ રહી છે.
લીગ માટે યોજાયેલી ખેલાડીઓની આ હરાજીમાં ભારતભરમાંથી 80 ખેલાડીઓએ પોતાના નામ નોંધાવ્યા હતા. જેમાં ગુજરાતના વડોદરા શહેરના માનુષ શાહ સૌથી મોંઘો ખેલાડી સાબિત થયો હતો. આણંદની ટોપ નોચ એચિવર્સ ટીમે માનુષ શાહ (Manush Shah) ને 1.11 લાખમાં ખરીદ્યો હતો. તો બીજી સૌથી મોંઘી ખેલાડી તરીકે ભારતની મહિલા યુવા ખેલાડી રહી હતી. ભારતની મહિલા સિંગલ્સની નંબર 1 ખેલાડી શ્રીજા અકુલાને ભાવનગરની ભાયાણી સ્ટાર્સ ટીમે 96 હજારમાં ખરીદી હતી. આ હરાજીમાં સૌથી મોંઘી મહિલા ખેલાડીમાં શ્રીજા અકુલાનું નામ ટોચ પર રહ્યું હતું. શ્રીજા અકુલા તેલંગાણા રાજ્યથી રમે છે. તો ગુજરાતના અન્ય ખેલાડીઓમાં હરમિત દેશાઇ (Harmeet Desai) ને અમદાવાદની મલ્ટિવેટ માર્વેલ ટીમે 93 હજારમાં ખરીદ્યો હતો. તો સુરતના જ માનવ ઠક્કરને સુરતની શામલ સ્કવૉડ ટીમે 72 હજાર અને કચ્છના ઇશાન હિંગોરાણીને ભાવનગરની ભાયાણી સ્ટાર્સ ટીમે 52 હજારમાં ખરીદ્યો હતો.
ગુજરાત સુપર લીગની પહેલી સિઝનમાં કુલ 8 ટીમો ભાગ લેશે. જેમાં હરાજી દરમ્યાન 80 માંથી કુલ 48 ખેલાડીઓને ખરીદવામાં આવ્યા હતા. આ 8 ટીમો ગુજરાતના વિવિધ શહેરોનું પ્રતિનિધિત્વ કરે છે. આ ટીમોએ મહત્તમ 7 ખેલાડીઓ અને 2 કોચનો જ સમાવેશ કરી શકશે. જેમાં ટીમે એક નેશનલ અને એક સ્થાનિક કોચ હોવો જોઇએ. આ 8 ટીમોમાં બે ટીમ અમદાવાદ અને સુરતની છે. તો 1-1 ટીમ ભાવનગર, ગાંધીનગર, આણંદ અને કચ્છની ટીમો છે.
Published On - 12:08 pm, Thu, 9 June 22