કોમનવેલ્થ ગેમ્સમાં દેશને પ્રથમ ગોલ્ડ મેડલ મળ્યો, વેઇટલિફટીંગમાં મીરાબાઇ ચાનુએ બાજી મારી

નવી દિલ્હી: મીરાબાઈ ચાનુએ (Mirabai Chanu)ભારતને કોમનવેલ્થ ગેમ્સ 2022નો  (Commonwealth Games 2022) પહેલો ગોલ્ડ મેડલ (GOLD) અપાવ્યો છે અને તેની સાથે જ બર્મિંગહામમાં ભારતની સુવર્ણ યાત્રા પણ શરૂ થઈ છે. આ પહેલા શનિવારે વેઈટલિફ્ટિંગમાં ભારતને સિલ્વર અને બ્રોન્ઝ મેડલ મળ્યા હતા, પરંતુ ચાનુએ મોડી સાંજે ભારતની બેગમાં ગોલ્ડ નાખ્યો હતો. ચાનુએ 49 કિગ્રા વજન વર્ગમાં આ ખિતાબ જીત્યો હતો. તેણે કુલ 201 કિગ્રા વજન ઉઠાવીને રેકોર્ડ સાથે ખિતાબ જીત્યો.

ક્લીન એન્ડ જર્કમાં રેકોર્ડ બ્રેકિંગ પ્રદર્શન ચાલુ રહ્યું

ચાનુએ સ્નેચમાં 88 કિગ્રા અને ક્લીન એન્ડ જર્કમાં 113 કિગ્રા વજન ઉપાડીને ખિતાબ જીત્યો હતો અને એક ગેમ્સ રેકોર્ડ પણ બનાવ્યો હતો. ટોક્યો ઓલિમ્પિક સિલ્વર મેડલ વિજેતા ભારતના આ સ્ટાર વેઇટલિફ્ટરે સ્નેચમાં કોમનવેલ્થ ગેમ્સનો રેકોર્ડ બનાવ્યો હતો. તેણે ક્લીન એન્ડ જર્કમાં રેકોર્ડ રન ચાલુ રાખ્યો અને પ્રથમ પ્રયાસમાં 109, બીજા પ્રયાસમાં 113 કિલો વજન ઉપાડ્યું.

ચાનુ ક્લીન એન્ડ જર્કમાં ત્રીજા પ્રયાસમાં 115 કિલો વજન ઉપાડવા માંગતી હતી, પરંતુ તે આ પ્રયાસમાં સફળ થઈ શકી નહીં. ભારતના આ સ્ટાર વેઈટલિફ્ટરે ગત કોમનવેલ્થ ગેમ્સમાં પણ ગોલ્ડ જીત્યો હતો. બર્મિંગહામમાં પણ તેની સુવર્ણ યાત્રા ચાલુ રહી.

આ પહેલા બે મેડલ ભારતના ખાતે નોંધાયા

સંકેત સરગરે ઈંગ્લેન્ડમાં ભારતની તાકાત બતાવી હતી. શનિવારે તેણે વેઇટલિફ્ટિંગમાં (CWG 2022 Weightlifting) સિલ્વર મેડલ જીતીને કોમનવેલ્થ ગેમ્સ 2022માં (Commonwealth Games 2022) ભારતનું ખાતું ખોલ્યું. સરગરે 75મા સ્વતંત્રતા દિવસ પર પોતાનો મેડલ અર્પણ કરતા કહ્યું કે જેમણે આઝાદી માટે લોહી વહાવ્યું છે, આ મેડલ એવા લોકો માટે છે. સરગર 55 કિગ્રાની ફાઈનલમાં માત્ર 1 કિગ્રાના માર્જિનથી ગોલ્ડ મેડલ જીતવાથી ચૂકી ગયો છે.

તો ભારતના અનુભવી વેઈટલિફ્ટર ગુરુરાજા પૂજારી (Gururaj Poojary)એ બર્મિંગહામમાં શાનદાર પ્રદર્શન કરીને બ્રોન્ઝ જીત્યો હતો. આ નાના કદના વેઈટલિફ્ટરે 61 કિગ્રા વજન વર્ગમાં આ મેડલ જીત્યો હતો.