CWG 2026: કોમનવેલ્થ ગેમ્સમાં ભારતની ડબલ સિદ્ધિ, નીરજે સિલ્વર તો યશવીરે બ્રોન્ઝ જીતી ઇતિહાસ રચ્યો

કોમનવેલ્થ ગેમ્સ 2026માં ભારત માટે સૌથી વધુ અપેક્ષા ધરાવતી સ્પર્ધાઓમાં પુરુષોની જેવલિન થ્રોનો સમાવેશ થતો હતો. નીરજ ચોપરા ફરી એકવાર ગોલ્ડ મેડલના સૌથી મોટા દાવેદાર તરીકે મેદાનમાં ઉતર્યા હતા. તેમની સાથે પ્રથમ વખત કોમનવેલ્થ ગેમ્સમાં ભાગ લઈ રહેલા યશવીર સિંહ અને રોહિત યાદવ પર પણ સૌની નજર હતી. બીજી તરફ પાકિસ્તાનના અરશદ નદીમ પણ ડિફેન્ડિંગ ચેમ્પિયન તેમજ વર્તમાન ઓલિમ્પિક ચેમ્પિયન તરીકે મેદાનમાં હતા.

નીરજે સિઝનનો શ્રેષ્ઠ થ્રો કર્યો, છતાં ગોલ્ડથી વંચિત રહ્યા

સ્પર્ધાની શરૂઆતમાં નીરજ ચોપરાએ સંયમપૂર્વક રમત શરૂ કરી હતી. પ્રથમ પ્રયાસ બાદ બીજા થ્રોમાં તેમણે 85.83 મીટર સુધી ભાલો ફેંકીને સ્પર્ધામાં પ્રથમ સ્થાન મેળવ્યું. ગંભીર ઈજામાંથી વાપસી કર્યા બાદ આ તેમની સિઝનનો અત્યાર સુધીનો શ્રેષ્ઠ પ્રયાસ હતો.

જોકે તેમની ખુશી લાંબા સમય સુધી ટકી નહોતી. એ જ રાઉન્ડમાં શ્રીલંકાના રૂમેશ થરંગા પથિરાગેએ 89.73 મીટરનો જબરદસ્ત થ્રો કરીને ટોચનું સ્થાન કબજે કર્યું. ત્યારબાદના ચારેય પ્રયાસોમાં નીરજ કે પથિરાગા પોતાનો રેકોર્ડ સુધારી શક્યા નહીં. અન્ય કોઈ ખેલાડી પણ તેમની નજીક પહોંચી શક્યો નહીં, જેના કારણે પથિરાગેએ ગોલ્ડ મેડલ જીત્યો અને નીરજને સિલ્વર મેડલથી સંતોષ માનવો પડ્યો.

A double podium finish to remember!

Congratulations to Neeraj Chopra for winning Silver and Yash Vir Singh for securing Bronze in the Men’s Javelin Throw at the Commonwealth Games.

Two Indians finishing on the podium is a historic first for this event. This is a truly… pic.twitter.com/QmqnW2VJT1

— Dr Mansukh Mandaviya (@mansukhmandviya) July 31, 2026

અરશદ નદીમનું નિરાશાજનક પ્રદર્શન

આ ફાઇનલમાં સૌથી મોટું આશ્ચર્ય પાકિસ્તાનના અરશદ નદીમના પ્રદર્શનને લઈને જોવા મળ્યું. ગોલ્ડ મેડલના પ્રબળ દાવેદાર માનવામાં આવતા અરશદ ઈજામાંથી વાપસી કરી રહ્યા હતા, પરંતુ શરૂઆતના ત્રણ પ્રયાસમાં તેઓ એક પણ વખત 80 મીટરનો આંકડો પાર કરી શક્યા નહીં.

પરિણામે તેઓ ટોચના આઠ ખેલાડીઓમાં સ્થાન મેળવી શક્યા નહીં અને અંતિમ ત્રણ પ્રયાસ કરવાની તક પણ ગુમાવી બેઠા. આમ ડિફેન્ડિંગ ચેમ્પિયનનો સફર અપેક્ષા કરતાં ઘણો વહેલો પૂર્ણ થયો.

યશવીરનો અંતિમ પ્રયાસ બન્યો ગેમ ચેન્જર

સ્પર્ધા દરમિયાન યશવીર સિંહ શરૂઆતમાં મેડલની રેસથી દૂર દેખાઈ રહ્યા હતા. પાંચમા રાઉન્ડ સુધી તેમનો શ્રેષ્ઠ પ્રયાસ 81.33 મીટર હતો અને તેઓ છઠ્ઠા સ્થાને હતા. જોકે અંતિમ પ્રયાસમાં તેમણે દબાણને તકમાં ફેરવી નાખ્યું.

છેલ્લા થ્રોમાં યશવીરે 85.41 મીટરનો શાનદાર થ્રો કરીને સીધા ત્રીજા સ્થાને છલાંગ લગાવી. આ તેમની કારકિર્દીનો અત્યાર સુધીનો શ્રેષ્ઠ પ્રયાસ હતો, જેના કારણે તેમને કોમનવેલ્થ ગેમ્સમાં પ્રથમ જ વખત બ્રોન્ઝ મેડલ જીતવાનો ગૌરવ મળ્યો.

Yash Vir clinched BRONZE in Men’s Javelin Final with a sensational 85.41m throw in his SIXTH attempt

A remarkable podium finish for the 24-year-old in his first appearance at the Commonwealth Games. As they say, it’s not over until it’s over pic.twitter.com/OGElfgs9KY

— ESPN India (@ESPNIndia) July 31, 2026

ભારતના અન્ય ખેલાડી રોહિત યાદવે પણ સારો પ્રયાસ કર્યો, પરંતુ તેઓ છઠ્ઠા સ્થાન સાથે સ્પર્ધા પૂર્ણ કરવામાં સફળ રહ્યા.

ભારતીય એથ્લેટિક્સ માટે ઐતિહાસિક ક્ષણ

પુરુષોની જેવલિન થ્રોમાં ભારતને એકસાથે બે મેડલ મળ્યા તે ભારતીય એથ્લેટિક્સ માટે મહત્વપૂર્ણ સિદ્ધિ માનવામાં આવી રહી છે. નીરજ ચોપરાએ ફરી એકવાર મોટા મંચ પર પોતાની સ્થિરતા સાબિત કરી, જ્યારે યશવીર સિંહે ભવિષ્યના સ્ટાર તરીકે મજબૂત દાવેદારી નોંધાવી.

આ પરિણામ એ પણ દર્શાવે છે કે ભારતીય જેવલિન થ્રો હવે માત્ર એક ખેલાડી પર આધારિત નથી. નવી પેઢીના ખેલાડીઓ પણ આંતરરાષ્ટ્રીય મંચ પર દેશને ગૌરવ અપાવવા માટે સંપૂર્ણ રીતે તૈયાર છે. કોમનવેલ્થ ગેમ્સમાં મળેલી આ ડબલ સફળતા ભારતીય એથ્લેટિક્સ માટે નવા યુગની શરૂઆત તરીકે પણ જોવામાં આવી રહી છે.

આ પણ વાંચો: રાજકોટમાં વરસાદની સ્થિતિના કારણે આજે શાળા-કોલેજ બંધ, લોકોને કામ વગર બહાર ન નીકળવા તંત્રની અપીલ