દક્ષિણ આફ્રિકા પ્રવાસમાં રોહિત શર્માનું રમવું ખૂબ જ જરૂરી, જાણો શું છે કારણ

ODI વર્લ્ડ કપ બાદ ઓસ્ટ્રેલિયા સામે T20 સિરીઝ ચાલી રહી છે, પરંતુ ટીમ ઈન્ડિયાની ખરી કસોટી દક્ષિણ આફ્રિકાના પ્રવાસથી શરૂ થશે. આફ્રિકા સામે 10 ડિસેમ્બરથી શ્રેણી શરૂ થવાની છે, જેના માટે ગુરુવારે ટીમની જાહેરાત થઈ શકે છે. જો કે, એક શંકા છે કે શું કેપ્ટન રોહિત ત્રણેય ફોર્મેટ માટે શ્રેણીમાં ઉપલબ્ધ રહેશે કે નહીં? કોહલી પહેલાથી જ સફેદ બોલ ફોર્મેટથી દૂર થઈ ચૂક્યો છે, તેથી એવી અપેક્ષા રાખવામાં આવી રહી છે કે રોહિત અહીં ઉપલબ્ધ રહેશે.

ગુરુવારે ટીમ ઈન્ડિયાની જાહેરાત કરવામાં આવશે!

જો આફ્રિકા પ્રવાસની વાત કરીએ તો ટીમ ઈન્ડિયાએ અહીં 3 T20, 3 ODI અને બે ટેસ્ટ મેચ રમવાની છે. ગુરુવારે બીસીસીઆઈ ટીમની જાહેરાત કરી શકે છે. વર્લ્ડ કપ પછી સિનિયર ખેલાડીઓ આરામ કરી રહ્યા છે, જ્યારે બાકીની ટીમ ઓસ્ટ્રેલિયા સામે શ્રેણી રમી રહી છે. કારણ કે સાઉથ આફ્રિકાનો પ્રવાસ મહત્વપૂર્ણ અને મોટો છે, ટીમ ઈન્ડિયા પોતાની સંપૂર્ણ તાકાત અહીં મોકલવા માટે તૈયાર છે. વિરાટ કોહલી પહેલેથી જ સંકેત આપી ચૂક્યો છે કે તે આ પ્રવાસ પર માત્ર ટેસ્ટ શ્રેણી માટે જ ઉપલબ્ધ રહેશે, તેથી કેટલાક અન્ય ખેલાડીઓને તક મળી શકે.

આફ્રિકા સિરીઝ માટે રોહિત શર્મા જરૂરી છે

વનડે વર્લ્ડ કપની ફાઈનલમાં હાર બાદ રોહિત શર્મા સંપૂર્ણ રીતે ભાંગી પડ્યો હતો. ફાઈનલ બાદ તે ક્યાંય જોવા મળ્યો ન હતો અને હાર બાદ રડતા-રડતા ડ્રેસિંગ રૂમમાં જતો જોવા મળ્યો હતો. હવે દક્ષિણ આફ્રિકા પ્રવાસથી એક નવો પડકાર શરૂ થઈ રહ્યો છે. કોહલી જેવો સિનિયર ખેલાડી અહીં ન હોવાથી બોર્ડ ઈચ્છે છે કે રોહિત પોતે હાજર રહે, જેથી કોઈ મોટો ખેલાડી આ મોટા પ્રવાસ પર જવાબદારી લેવા તૈયાર હોય.

T20 વર્લ્ડ કપની તૈયારી માટે સારો મોકો

રોહિત પોતે પણ ઈચ્છે છે કે જો તે જૂનમાં યોજાનારા T20 વર્લ્ડ કપ માટે ઉપલબ્ધ હોય તો તેણે અત્યારથી જ પોતાની લય તૈયાર કરવી જોઈએ. તમને જણાવી દઈએ કે T20 વર્લ્ડ કપ 2022ની સેમી ફાઈનલમાં હાર બાદ રોહિત શર્માએ કોઈ T20 મેચ રમી નથી. આવી સ્થિતિમાં તે જૂન પહેલા આ મહત્વપૂર્ણ સિરીઝ અને IPLમાં T20 વર્લ્ડ કપ માટે પણ તૈયારી કરી શકે છે.

દક્ષિણ આફ્રિકામાં રોહિત પોતાનો રેકોર્ડ સુધારવા માંગશે

રોહિત ઈજાના કારણે દક્ષિણ આફ્રિકાના છેલ્લા પ્રવાસ પર જઈ શક્યો ન હતો. તેની ગેરહાજરીમાં કેએલ રાહુલે ટીમની કમાન સંભાળી હતી, જ્યાં ટીમ ઈન્ડિયાની હાર થઈ હતી. આવી સ્થિતિમાં રોહિત પોતે આ વખતે બેટ્સમેન અને કેપ્ટન તરીકે વિદેશી ધરતી પર પોતાનો રેકોર્ડ સુધારવા માંગશે. જો કે દક્ષિણ આફ્રિકામાં યજમાન ટીમ સામે ત્રણેય ફોર્મેટમાં રોહિત શર્માનો રેકોર્ડ કંઈ ખાસ નથી, તેથી રોહિત ચોક્કસપણે આ આંકડાને સુધારવાનો પ્રયત્ન કરશે.

દક્ષિણ આફ્રિકામાં રોહિત શર્માનો રેકોર્ડ:

• 6 T20, 135 રન
• 14 ODI, 256 રન, 1 સદી
• 4 ટેસ્ટ, 123 રન

ભારતનો દક્ષિણ આફ્રિકા પ્રવાસ:

• પહેલી T20: 10 ડિસેમ્બર
• બીજી T20: 12 ડિસેમ્બર
• ત્રીજી T20: 14 ડિસેમ્બર
• પહેલી ODI: 17 ડિસેમ્બર
• બીજી ODI: 19 ડિસેમ્બર
• ત્રીજી ODI: 21 ડિસેમ્બર
• પ્રથમ ટેસ્ટઃ 26-30 ડિસેમ્બર
• બીજી ટેસ્ટઃ 3-7 જાન્યુઆરી

આ પણ વાંચો: Legends League Cricketની આજની મેચ અચાનક થઈ રદ્દ! જાણો કારણ