Commonwealth Games 2026 : લિફ્ટિંગ શૂઝ ખરીદવા પણ પૈસા નહોતા, હવે સતત બીજો CWG મેડલ જીતી બિંદિયારાણી દેવીએ રચ્યો ઈતિહાસ

મણિપુરની 27 વર્ષીય વેઇટલિફ્ટર બિંદિયારાણી દેવીએ ગ્લાસગો કોમનવેલ્થ ગેમ્સ 2026માં શાનદાર પ્રદર્શન કરીને ભારતને વધુ એક મેડલ અપાવ્યો છે. મહિલાઓની 58 કિલોગ્રામ કેટેગરીમાં તેણે કુલ 199 કિલોગ્રામ વજન ઉપાડીને બ્રોન્ઝ મેડલ જીત્યો. આ કોમનવેલ્થ ગેમ્સમાં તેનો સતત બીજો મેડલ છે. અગાઉની કોમનવેલ્થ ગેમ્સમાં તેણે સિલ્વર મેડલ જીત્યો હતો.

બિંદિયારાણીએ જીત્યો બ્રોન્ઝ મેડલ

બિંદિયારાણીએ સ્નેચ રાઉન્ડમાં પોતાના પ્રથમ પ્રયાસમાં 83 કિલોગ્રામ વજન ઉપાડ્યું હતું. ત્યારબાદ બીજા પ્રયાસમાં 85 કિલોગ્રામ અને ત્રીજા પ્રયાસમાં 87 કિલોગ્રામ વજન ઉપાડવામાં સફળ રહી હતી. ક્લીન એન્ડ જર્કમાં તેનો પ્રથમ 110 કિલોગ્રામનો પ્રયાસ નિષ્ફળ રહ્યો હતો, પરંતુ તેણે શાનદાર વાપસી કરીને બીજા પ્રયાસમાં 112 કિલોગ્રામ વજન ઉપાડ્યું અને બ્રોન્ઝ મેડલ પોતાના નામે કર્યો.

મીરાબાઈ ચાનુને માને છે આઈડલ

વર્ષ 1999માં જન્મેલી બિંદિયારાણી એ જ મણિપુરી એકેડેમીમાંથી તાલીમ લઈને આગળ આવી છે, જ્યાંથી ઓલિમ્પિક મેડલ વિજેતા મીરાબાઈ ચાનુએ પણ પોતાની કારકિર્દીની શરૂઆત કરી હતી. ડિસેમ્બર 2021માં બિંદિયારાણીએ વર્લ્ડ ચેમ્પિયનશિપમાં ટોક્યો ઓલિમ્પિક ચેમ્પિયનને હરાવીને 55 કિલોગ્રામ ક્લીન એન્ડ જર્કમાં ગોલ્ડ મેડલ જીતીને પોતાની ઓળખ બનાવી હતી.

Another medal moment from Weightlifting.

Bindyarani Devi claims bronze in the Weightlifting Women’s 58kg event with a determined performance.

Congratulations on a well-deserved medal!

Let’s #Cheer4Bharat! #WeAreTeamIndia | #TogetherWeDream pic.twitter.com/uCIeA6Es9F

— Team India (@WeAreTeamIndia) July 27, 2026

લિફ્ટિંગ શૂઝ ખરીદવાના પણ પૈસા નહોતા

બિંદિયારાણીની સફળતાની સફર સરળ નહોતી. કારકિર્દીના શરૂઆતના દિવસોમાં તેની પાસે વ્યાવસાયિક લિફ્ટિંગ શૂઝ ખરીદવાના પણ પૈસા નહોતા. તે સમયે તેની મદદ માટે મીરાબાઈ ચાનુ આગળ આવી હતી. બિંદિયારાણી જ્યારે તાલીમ શિબિરમાં નવી હતી, ત્યારે મીરાબાઈએ તેને તાલીમની બારીકીઓ સમજાવવાની સાથે વાતાવરણમાં અનુકૂળ થવામાં પણ મદદ કરી હતી. જ્યારે મીરાબાઈને ખબર પડી કે બિંદિયારાણી પાસે મોંઘા લિફ્ટિંગ શૂઝ ખરીદવાના પૈસા નથી, ત્યારે તેમણે પોતાના પૈસાથી શૂઝ ખરીદીને તેને ભેટમાં આપ્યા હતા.

સંઘર્ષમાંથી સફળતા સુધીની સફર

મીરાબાઈ ચાનુના માર્ગદર્શન અને પ્રોત્સાહનથી બિંદિયારાણીને પોતાની કારકિર્દીમાં આગળ વધવામાં ઘણી મદદ મળી. આજે તે ભારતની ઉભરતી વેઇટલિફ્ટરોમાંની એક છે. ગ્લાસગો કોમનવેલ્થ ગેમ્સમાં બ્રોન્ઝ મેડલ જીતીને તેણે સતત બીજી વખત કોમનવેલ્થ ગેમ્સના પોડિયમ પર સ્થાન મેળવ્યું છે. બિંદિયારાણીની કહાની સાબિત કરે છે કે યોગ્ય માર્ગદર્શન, મહેનત અને સંઘર્ષથી મુશ્કેલ પરિસ્થિતિઓને પાર કરીને મોટી સફળતા મેળવી શકાય છે.

Commonwealth Games 2026 : પિતાના બ્રોન્ઝ મેડલને સિલ્વરમાં ફેરવ્યો, 33 વેઇટલિફ્ટર આપનાર ગામના અજય બાબુએ CWGમાં રચ્યો ઈતિહાસ