West Bengal Assembly elections : પશ્ચિમ બંગાળમાં 27 માર્ચથી આઠ તબક્કામાં યોજાનારી વિધાનસભા ચુંટણી માટે TMC બાદ ભાજપે ઉમેદવારોની પ્રથમ યાદી જાહેર કરી છે. આ યાદીમાં 57 ઉમેદવારોના નામ જાહેર કરવામાં આવ્યા છે. તેમજ TMCમાંથી ભાજપમાં જોડાયેલા કદ્દાવર નેતા શુભેન્દુ અધિકારીને ભાજપે મમતા બેનર્જી સામે નંદીગ્રામથી ટિકિટ આપી છે.
નંદીગ્રામમાં શુભેન્દુ – મમતા સામસામે
પશ્ચિમ બંગાળના મુખ્યપ્રધાન મમતા બેનર્જી (Mamata Banerjee)એ જાહેરાત કરી છે કે તે વિધાનસભાની ચૂંટણી નંદીગ્રામ બેઠક પરથી જ લડશે. નંદીગ્રામ બેઠક પરથી ચૂંટણી લડવાની જાહેરાત કર્યાના થોડા સમય બાદ ભાજપના નેતા શુભેન્દુ અધિકારીએ મમતા બેનર્જીને પડકાર ફેંક્યો છે. શુક્રવારે મિદનાપુરમાં એક સભાને સંબોધન કરતા શુભેન્દુ અધિકારીએ કહ્યું, ‘ઉમેદવારોની સૂચિ મુજબ મુખ્યપ્રધાન મમતા બેનર્જી નંદીગ્રામથી ચૂંટણી લડશે. ખૂબ સારું, અમે તેનું સ્વાગત કરીએ છીએ.તેમણે નંદીગ્રામની જનતાને પણ અવાજ ઉઠાવવા જણાવ્યું હતું. તેમણે કહ્યું કે અમને મિદનાપુરનો પુત્ર જોઈએ છે, બહારના લોકોની જરુર નથી. અમે તમને રાજકીય યુદ્ધના મેદાનમાં જોઈશું. 2 મેના રોજ તમે હારશો અને નંદિગ્રામ છોડશો.