ગુજરાત ભાજપના પ્રદેશ પ્રમુખ બન્યા બાદ, ગાંધીનગર-દિલ્લી થઈને સૌ પ્રથમવાર સુરત આવતા સી આર પાટીલના સ્વાગતમાં ભાજપના કાર્યકરોએ વિશાળ કાર રેલીનું આયોજન કર્યું છે. કોરોનાકાળમાં લોકોના એકઠા થવા ઉપર કેન્દ્રીય ગૃહમંત્રાલય, આરોગ્ય વિભાગે કેટલીક માર્ગદર્શીકાઓ જાહેર કરી છે. તેના અનુસંધાને આ કાર રેલી ટિકાનું પાત્ર બની છે. જો કે કારરેલીના આયોજક અને મજૂરા મતવિસ્તારના ધારાસભ્ય હર્ષ સંધવીએ દાવો કર્યો છે કે, કોરોનાકાળમાં પણ સોશિયલ ડીસ્ટન્સ સાથે કેવી રીતે કાર્યક્રમ થાય છે તે આજે જોવા મળશે. વાલક પાટીયાથી કાર રેલીનો બપોરના 12 વાગે પ્રારંભ થશે અને સી આર પાટીલના કાર્યલયે સમાપ્ત થશે.