25 વર્ષના ખેલાડીને મળશે 9 અબજનું બોનસ, પગારમાંથી પણ મળશે કરોડો રૂપિયા
લગભગ 7 વર્ષ સુધી એક જ ક્લબમાં રહ્યા પછી, થોડા અઠવાડિયા પહેલા, ફ્રાન્સના યુવા ફૂટબોલ સુપરસ્ટાર Mbappeએ જાહેરાત કરી હતી કે તે તેની સફર સમાપ્ત કરશે. તે સમયે તેણે તેની નવી ક્લબ જાહેર કરી ન હતી પરંતુ છેલ્લા દોઢ વર્ષથી તે સ્પષ્ટ હતું કે તે સ્પેનિશ ક્લબ રિયલ મેડ્રિડનો ભાગ બનશે. માત્ર 25 વર્ષની ઉંમરમાં તેને એ રકમ મળશે જે અન્ય ખેલાડીઓ માટે એક સ્વપ્ન સમાન છે.
ઉંમર માત્ર 25 વર્ષ અને કમાણી અબજોમાં. આ કોઈ બિઝનેસમેનના પુત્ર કે સ્ટાર્ટઅપ ફાઉન્ડરની સક્સેસ સ્ટોરી નથી, પરંતુ એક ખૂબ જ પ્રતિભાશાળી ફૂટબોલરની વાસ્તવિકતા છે, જે છેલ્લા 6-7 વર્ષથી દુનિયાભરના ચાહકોના દિલ પર રાજ કરી રહ્યો છે. આ છે ફ્રેંચ સુપરસ્ટાર ફૂટબોલર કિલિયન એમબાપ્પે, જે એક નવી સફર શરૂ કરવા જઈ રહ્યો છે.
રિયલ મેડ્રિડ, વિશ્વની સૌથી પ્રખ્યાત ફૂટબોલ ક્લબમાંની એક છે જેમણે શનિવારે 1 જૂનના રોજ સૌથી મોટી ક્લબ સ્પર્ધા UEFA ચેમ્પિયન્સ લીગનું ટાઈટલ જીત્યું હતું. રિયલે વિક્રમી 15મી વખત આ ખિતાબ જીત્યો અને તેના એક દિવસ પછી જ કિલિયન એમબાપ્પે આ ક્લબમાં જોડાવાના સમાચાર ફાઈનલ થયા છે.
છેલ્લા દોઢ વર્ષથી એકબીજા સાથે જોડાવાનો પ્રયાસ કરી રહેલા Mbappe અને રિયલ મેડ્રિડની ઈચ્છા પૂરી થઈ ગઈ છે, કારણ કે Mbappeએ ક્લબ સાથે 5 વર્ષનો કરાર કર્યો છે. હવે તેની સત્તાવાર જાહેરાત થવાની બાકી છે. પરંતુ મેડ્રિડને પણ Mbappe માટે મોટી રકમ ખર્ચવી પડી હતી.
સ્કાય સ્પોર્ટ્સના અહેવાલ અનુસાર, Mbappeને મેડ્રિડ તરફથી સાઈનિંગ બોનસ તરીકે 85 મિલિયન પાઉન્ડ એટલે કે લગભગ 9 અબજ રૂપિયા (903 કરોડ)થી વધુ મળશે. એટલું જ નહીં તેની વાર્ષિક સેલેરી 12.8 મિલિયન પાઉન્ડ એટલે કે લગભગ 136 કરોડ રૂપિયા હશે. આ હિસાબે તેમને 5 વર્ષમાં 650 કરોડ રૂપિયા અથવા 6.5 અબજ રૂપિયા અલગથી મળશે.
Mbappe છેલ્લા 7 વર્ષથી ફ્રાન્સની સૌથી મોટી ક્લબ પેરિસ સેન્ટ-જર્મન એટલે કે PSG સાથે હતો, જ્યાં તેણે 308 મેચમાં 256 ગોલ કર્યા હતા. તેણે ગયા મહિને જ પીએસજી સાથેનો પ્રવાસ ખતમ કરવાની જાહેરાત કરી હતી. Mbappeએ 2018માં ફ્રાન્સને વર્લ્ડ કપ પણ જીતાડ્યો હતો, જ્યારે તે 2022માં ટીમને ચેમ્પિયન બનાવવાની નજીક હતો પરંતુ ટીમ ફાઈનલમાં હારી ગઈ હતી.
Published On - 7:04 pm, Mon, 3 June 24