Commonwealth Games 2026: ટ્રિપલ જમ્પમાં ભારતનો ‘ડબલ ધમાકો’, પ્રવીણે સિલ્વર અને સેલ્વા પ્રભુએ બ્રોન્ઝ મેડલ જીત્યો
ગ્લાસગો કોમનવેલ્થ ગેમ્સ 2026ના 10મા દિવસે 1 ઓગસ્ટના રોજ ભારતીય એથ્લેટ્સે ટ્રિપલ જમ્પમાં શાનદાર પ્રદર્શન કર્યું છે. દેશના સ્ટાર જમ્પર પ્રવીણ ચિત્રાવલે સિલ્વર મેડલ જીતીને જૂની હારનો બદલો લીધો, જ્યારે પદાર્પણ કરી રહેલા 21 વર્ષીય યુવા ખેલાડી સેલ્વા પ્રભુ તિરુમરને બ્રોન્ઝ મેડલ પોતાના નામે કરીને દેશનું ગૌરવ વધાર્યું છે.
2026 કોમનવેલ્થ ગેમ્સની ટ્રેક એન્ડ ફિલ્ડ સ્પર્ધાઓમાં ભારતનો સફળતાનો સિલસિલો સતત ચાલુ રહ્યો છે. 1 ઓગસ્ટના રોજ ગ્લાસગોમાં ભારતીય એથ્લેટ્સે ટ્રિપલ જમ્પ સ્પર્ધામાં બે મેડલ જીતીને ઈતિહાસ રચ્યો હતો.
ભારતના નંબર-1 ટ્રિપલ જમ્પર પ્રવીણ ચિત્રાવલે 16.58 મીટરના શ્રેષ્ઠ કૂદકા સાથે સિલ્વર મેડલ પોતાના નામે કર્યો છે. અગાઉની બર્મિંગહામ ગેમ્સમાં ચોથા સ્થાને રહીને મેડલ ચૂક્યા બાદ પ્રવીણે આ વખતે શાનદાર વાપસી કરી છે.
સ્પર્ધાનો ગોલ્ડ મેડલ જમૈકાના જોર્ડન સ્કોટના નામે રહ્યો હતો, જેણે 16.72 મીટરનો કૂદકો માર્યો હતો. પ્રવીણ માટે આ મેડલ ચાર વર્ષની મહેનત અને મક્કમ નિર્ધારનું પરિણામ છે.
બીજી તરફ, પહેલીવાર કોમનવેલ્થ ગેમ્સમાં ભાગ લઈ રહેલા 21 વર્ષીય યુવા એથ્લેટ સેલ્વા પ્રભુ તિરુમરને 16.52 મીટરના જમ્પ સાથે બ્રોન્ઝ મેડલ જીતીને ભારતની સફળતા બેગણી કરી દીધી છે.
સેલ્વા પ્રભુ માટે આ સિનિયર સ્તરે કારકિર્દીનો સૌથી મોટો મેડલ છે. આ પહેલા તેમણે 2022ની વર્લ્ડ અંડર-20 એથ્લેટિક્સ ચેમ્પિયનશિપમાં સિલ્વર મેડલ જીતીને પોતાની પ્રતિભા સાબિત કરી હતી. (PC:X/SONY SPORTS NETWORK)
