Breaking News: ડોપિંગથી ભારતને વધુ એક ઝટકો, સિલ્વર મેડલિસ્ટ તુલિકા માન કોમનવેલ્થ ગેમ્સમાંથી બહાર
કોમનવેલ્થ ગેમ્સ 2026 શરૂ થાય તે પહેલાં જ ભારતને વધુ એક મોટો ફટકો લાગ્યો છે. 2022માં સિલ્વર મેડલ જીતનારી જુડો ખેલાડી તુલિકા માનને ડોપિંગ વિરોધી નિયમોના ઉલ્લંઘન બદલ કામચલાઉ સસ્પેન્ડ કરવામાં આવી છે. આ સાથે ભારતના ડોપિંગ સંબંધિત કેસોની સંખ્યામાં વધુ વધારો થયો છે.
કોમનવેલ્થ ગેમ્સ 2026 પહેલા ભારતીય ખેલાડીઓ માટે ડોપિંગના કેસો ચિંતાનો વિષય બન્યા છે. હવે મહિલા જુડો ખેલાડી તુલિકા માનને પણ કામચલાઉ સસ્પેન્ડ કરવામાં આવતા ભારતને વધુ એક મોટો ઝટકો લાગ્યો છે.
તુલિકા માને 2022 કોમનવેલ્થ ગેમ્સમાં સિલ્વર મેડલ જીત્યો હતો અને આ વખતે પણ 78 કિલોગ્રામ વજન વર્ગમાં ભારત માટે મેડલની દાવેદાર માનવામાં આવી રહી હતી. જોકે ગ્લાસગો જવાના પહેલાં જ NADAએ તેના પર કાર્યવાહી કરી છે.
તુલિકા પર પ્રતિબંધિત દવા લેવાનો આરોપ નથી. તેના બદલે તેણે ડોપિંગ વિરોધી 'વ્હેરઅબાઉટ્સ (Whereabouts)' નિયમનું ઉલ્લંઘન કર્યું હોવાનું સામે આવ્યું છે. એક વર્ષમાં ત્રણ વખત ડોપ ટેસ્ટ માટે ઉપલબ્ધ ન રહેતા NADAએ તેને કામચલાઉ સસ્પેન્ડ કરી છે અને સ્પષ્ટતા માટે નોટિસ પાઠવી છે.
'Whereabouts' નિયમ મુજબ RTPમાં સામેલ ખેલાડીઓએ વર્ષભર પોતાનું સ્થાન અને સમયપત્રક NADA અથવા WADAને આપવું ફરજિયાત હોય છે, જેથી કોઈપણ સમયે ડોપ ટેસ્ટ થઈ શકે. સતત ત્રણ વખત ટેસ્ટ ચૂકી જવાથી સસ્પેન્શન સહિતની કાર્યવાહી થઈ શકે છે.
આ કોમનવેલ્થ ગેમ્સ પહેલાં ભારત માટે ત્રીજો મોટો ડોપિંગ સંબંધિત કેસ છે. આ પહેલાં જુડો ખેલાડી અર્જુન કુમાર અને પિસ્તોલ શૂટર ગોવર કુમાર મસુરી પણ ડોપિંગના કારણે ટીમમાંથી બહાર થઈ ચૂક્યા છે. સતત વધી રહેલા આવા કેસો ભારતીય રમતજગત માટે ચિંતાનો વિષય બની રહ્યા છે. (PC:X)
