Commonwealth Games 2026: બોક્સિંગમાં પ્રીતિ પવારનો ગોલ્ડન પંચ, ‘દંગલ’ ફિલ્મે બદલી નાખ્યું જીવન
કોમનવેલ્થ ગેમ્સ 2026માં ભારતીય બોક્સર પ્રીતિ પવારે 54 કિગ્રા વર્ગમાં ગોલ્ડ મેડલ જીતીને દેશનું ગૌરવ વધાર્યું છે. કેનેડાની સ્કારલેટ ડેલગાડોને હરાવી તેણે પોતાની કારકિર્દીની સૌથી મોટી સિદ્ધિ મેળવી. એક સમય એવો પણ હતો જ્યારે પ્રીતિ બોક્સર બનવા માંગતી નહોતી, પરંતુ એક ફિલ્મ અને પરિવારના પ્રોત્સાહને તેનું આખું જીવન બદલી નાખ્યું.
ભારતીય બોક્સર પ્રીતિ પવારે કોમનવેલ્થ ગેમ્સ 2026માં 54 કિગ્રા વર્ગની ફાઇનલમાં કેનેડાની સ્કારલેટ ડેલગાડોને હરાવી ગોલ્ડ મેડલ પોતાના નામે કર્યો હતો.
પ્રીતિએ સમગ્ર ટૂર્નામેન્ટ દરમિયાન શાનદાર રમત બતાવી હતી. તેણે રાઉન્ડ ઓફ 16થી લઈને ફાઇનલ સુધી દરેક મુકાબલામાં પ્રભુત્વ જાળવી રાખ્યું અને એકતરફી જીત સાથે ગોલ્ડ સુધીનો સફર પૂર્ણ કર્યો.
રસપ્રદ વાત એ છે કે પ્રીતિ શરૂઆતમાં બોક્સિંગમાં આવવા માંગતી નહોતી. ઈજાના ડરને કારણે તે આ રમતથી દૂર રહેતી હતી, પરંતુ તેના કાકા અને કોચ વિનોદ પવારે તેને તાલીમ આપીને આત્મવિશ્વાસ વધાર્યો.
પ્રીતિના જીવનમાં આમિર ખાનની ફિલ્મ 'દંગલ' પણ મોટો ટર્નિંગ પોઈન્ટ બની. ફિલ્મ અને મહિલા ખેલાડીઓની સફળતાથી પ્રેરાઈ તેના પિતાએ તેને રમતગમતમાં આગળ વધવા પ્રોત્સાહિત કરી, જેના પરિણામે આજે તે દેશ માટે ગોલ્ડ મેડલ જીતી શકી છે.
પ્રીતિ પવારની સિદ્ધિઓ સતત વધી રહી છે. ખેલો ઈન્ડિયા યુથ ગેમ્સ, એશિયન અંડર-22 ચેમ્પિયનશિપ, વર્લ્ડ બોક્સિંગ કપ અને એશિયન બોક્સિંગ ચેમ્પિયનશિપમાં ગોલ્ડ જીત્યા બાદ હવે કોમનવેલ્થ ગેમ્સમાં ગોલ્ડ મેડલ જીતીને તેણે ભારતીય બોક્સિંગમાં પોતાનું નામ વધુ મજબૂત બનાવ્યું છે. (PC:X/SONY SPORTS NETWORK)
