Rain in Sabarkantha: સાબરકાંઠા જિલ્લામાં મોડી રાત્રી દરમિયાન ભારે પવન અને ગાજવીજ સાથે વરસાદ, હોર્ડિંગ્સ હવામાં ઉડ્યા
Rain in Sabarkantha: સાબરકાંઠા જિલ્લામાં ગત મોડી રાત્રી દરમિયાન એકાએક જ ભારે પવન ફુંકાયો હતો. જેને લઈ અનેક વિસ્તારોમાં વિજ પુરવઠો ખોરવાઈ ગયો હતો. જ્યારે વાવાઝોડાને લઈ અનેક હોર્ડિંગ્સ હવામાં ઉડ્યા હતા.
સાબરકાંઠા જિલ્લામાં મોડી રાત્રી દરમિયાન ભારે પવન સાથે વરસાદ વરસ્યો હતો. હિંમતનગર શહેર અને આસપાસના વિસ્તારમાં ગાજવીજ સાથે વરસાદ વરસ્યો હતો. સાબરકાંઠા જિલ્લામાં સૌથી વધારે ઈડર પંથકમાં વરસાદ નોંધાયો હતો.
સાબરકાંઠા જિલ્લામાં હિંમતનગર ઉપરાંત ઈડર, ખેડબ્રહ્મા અને વડાલી વિસ્તારમાં વરસાદ નોંધાયો હતો. જેમાં સૌથી વધારે ઈડરમાં પોણો ઈંચ વરસાદ ખાબક્યો હતો. જ્યારે વડાલી અને હિંતમનગરમાં 7-8 મીમી વરસાદ નોંધાયો હતો.
ભારે પવન ફુંકાવાને લઈ હિંમતનગર શહેરમાં અનેક ઠેકાણે હોર્ડિંગ્સ ઉડી જવા પામ્યા હતા. શહેરમાં બસ સ્ટેશન વિસ્તારમાં પણ હોર્ડિંગ્સ હવામાં ઉડ્યા હતા. જોખમી હોર્ડિંગ્સ ઉડતા બસ સ્ટેશન વિસ્તારમાં મુસાફરોને જોખમ સર્જાયુ હતુ.
હિંમતનગર શહેરમા આવેલ મહિલા પોલીસ સ્ટેશનનુ બોર્ડ પણ મોડી રાત્રે ફુંકાયેલા ભારે પવનમાં ઉડીને નિચે પડ્યુ હતુ. મોડી રાત્રી દરમિયાન વિસ્તારમાં વાવાઝોડાની માફક ઝડપી પવન ફુંકાયો હતો.
હિંમતનગર અને આસપાસના વિસ્તારના ગાંભોઈ, કાંકણોલ, બેરણા, નવા, બળવંતપુરા, હડિયોલ અને ગઢોડા સહિતના વિસ્તારોમાં વરસાદ વરસ્યો હતો.
મોડી રાત્રી દરમિયાન પવન અને ગાજવીજ સાથે વરસાદ દરમિયાન અનેક વિસ્તારોમાં વિજ પુરવઠો ખોરવાઈ ગયો હતો. હિંમતનગર શહેરમાં પણ અનેક વિસ્તારોમાં વિજપુરવઠો ખોરવાઈ ગયો હતો.
Published On - 8:19 am, Tue, 6 June 23