ઇલેક્ટ્રિક વાહનો પર આજથી લાગુ થઈ નવી સ્કીમ, કયા વાહનો પર કેટલી સબસિડી મળશે? જાણો અહીં
દેશમાં ઈલેક્ટ્રિક વાહનો (EVs) અપનાવવાની પ્રક્રિયાને વધુ વેગ આપવા માટે, ભારે ઉદ્યોગ મંત્રાલયે રૂ. 500 કરોડની ઇલેક્ટ્રિક ટ્રાન્સપોર્ટ પ્રમોશન સ્કીમ 2024 (EMPS 2024) શરૂ કરી છે.
નાના થ્રી-વ્હીલર (ઈ-રિક્ષા અને ઈ-કાર્ટ)ની ખરીદી પર રૂ. 25,000 સુધીની સહાય આપવામાં આવશે. યોજના હેઠળ આવા 41,000 થી વધુ વાહનોને પ્રોત્સાહન આપવામાં આવશે.
મોટા થ્રી-વ્હીલરના કિસ્સામાં 50,000 રૂપિયા સુધીની નાણાકીય સહાય આપવામાં આવશે. EMPS 2024 એ ફંડ લિમિટેડ પીરિયડ સ્કીમ છે. આમાં, ઇલેક્ટ્રિક ટુ-વ્હીલર (E-2W) અને થ્રી-વ્હીલરને ઝડપથી અપનાવવા માટે ચાર મહિના એટલે કે 1 એપ્રિલ, 2024 થી 31 જુલાઈ, 2024 સુધી કુલ રૂ. 500 કરોડનો ખર્ચ કરવામાં આવશે.
દેશમાં ગ્રીન ટ્રાન્સપોર્ટેશન સિસ્ટમ અને ઈલેક્ટ્રિક વ્હીકલ મેન્યુફેક્ચરિંગ ઈકોસિસ્ટમના વિકાસને વધુ વેગ આપવા માટે ભારે ઉદ્યોગ મંત્રાલયે 13 માર્ચે આની જાહેરાત કરી હતી. આ યોજનાનો હેતુ 3,72,215 ઇલેક્ટ્રિક વાહનોને ટેકો આપવાનો છે. મંત્રાલયે કહ્યું હતું કે અદ્યતન તકનીકોને પ્રોત્સાહિત કરવા માટે, પ્રોત્સાહનોનો લાભ ફક્ત તે વાહનોને આપવામાં આવશે જે અદ્યતન બેટરીથી સજ્જ છે. આ યોજનાથી મોટી સંખ્યામાં નોકરીઓ પણ સર્જાવાની અપેક્ષા છે.
