વૃંદાવનમાં ભગવાન શ્રી કૃષ્ણનું ચમત્કારી મંદિર, વર્ષમાં માત્ર 2 વાર જ ખુલે છે દરવાજા
ભારતમાં ઘણા રહસ્યમય મંદિરો આવેલા છે. ઘણા મંદિરો પોતાના ચમત્કારો અને અલૌકિક માન્યતાઓ માટે ખૂબ જ પ્રખ્યાત હોય છે. આ મંદિરોમાંથી એક મંદિર વૃંદાવનમાં પણ છે. જ્યાં ભગવાના દર્શન કરવા માટે ભક્તોને આતુરતાથી રાહ જોવી પડે છે.
ઉત્તર પ્રદેશના વૃંદાવનમાં આવેલા શાહજીના આ મંદિર સાથે ઘણી માન્યતાઓ જોડાયેલી છે. ભગવાન શ્રી કૃષ્ણના દર્શન કરવા માટે ભારે માત્રામાં લોકોની ભીડ જામે છે. એવું માનવામાં આવે છે કે વૃંદાવનનું આ ચમત્કારી મંદિર ખૂબ જ ખાસ છે.અહીં એક વસંતી રૂમ પણ આવેલો છે. જે વર્ષમાં માત્ર બે વાર જ ખુલે છે.
આ શાહજીનું મંદિર ખાસ કરી વસંત પંચમી અને શ્રાવણ માસની ત્રયોદશીના દિવસે ખુલે છે. જેના પગલે મોટી સંખ્યામાં ભક્તો ભગવાન કૃષ્ણના શાહજી મંદિરમાં આવે છે.
શાહજી મંદિરનું નિર્માણ ઈ.સ. 1835 માં ભગવાન કૃષ્ણના મોટા ભક્ત કુંદનલાલ શાહ દ્વારા કરવામાં આવ્યુ હતુ. આ મંદિર સફેદ આરસપહાણથી બનેલું આ ખૂબ જ ખાસ અને સુંદર મંદિર વાસ્તુકલાનું અદ્ભુત ઉદાહરણ માનવામાં આવે છે. મંદિરની ખાસિયત છે કે અહીં બનાવેલા તમામ વાંકાચૂકા થાંભલા એક જ પથ્થરમાંથી બનાવવામાં આવ્યા છે.
વસંત પંચમીના દિવસે મંદિર અંદર આવેલા વસંત રુમને પીળા રંગના ફૂલથી શણગારવામાં આવે છે. તેમજ રુમમાં અલગ- અલગ અરીસાઓથી પણ શણગારવામાં આવે છે.
ભગવાન કૃષ્ણના ભક્તો વસંત પંચમીના દિવસથી હોળીની શરૂઆત કરે છે. જેમાં સૌથી પહેલા ભગવાન કૃષ્ણને ગુલાલ ચઢાવવામાં આવે છે. આ સાથે જ વસંત પંચમીના દિવસે ભગવાનને ફૂલોથી શણગારવામાં આવે છે. શાહજી મંદિરમાં વસંત પંચમીના તહેવારને ખાસ બનાવવા માટે રાધારમણલાલ જીની મૂર્તિને એક દિવસ માટે આ રૂમમાં લાવવામાં આવે છે.