IND vs AUS : એક દાયકા બાદ ભારતે ગુમાવી બોર્ડર-ગાવસ્કર ટ્રોફી, ઓસ્ટ્રેલિયા આ શ્રેણી 1-3થી જીત્યુ
ઓસ્ટ્રેલિયાએ સિડનીમાં રમાયેલી બોર્ડર-ગાવસ્કર ટ્રોફી 2024-25ની છેલ્લી ટેસ્ટ મેચમાં ભારતને હરાવી 3-1થી શ્રેણી જીતી લીધી. ભારતીય બેટ્સમેનોનો નિષ્ફળ દાવ અને ઓસ્ટ્રેલિયાના સુઘડ બોલિંગ આ હારનું મુખ્ય કારણ રહ્યું. દસ વર્ષ બાદ ઓસ્ટ્રેલિયાએ આ ટ્રોફી જીતી છે, જ્યારે ભારત માટે આ એક મોટો આઘાત છે.
ટીમ ઈન્ડિયા માટે આ હાર ખૂબ જ દુઃખદાયક છે. ભારતીય ટીમ 10 વર્ષ બાદ બોર્ડર-ગાવસ્કર ટ્રોફી હારી છે. આ પહેલા ટીમ ઈન્ડિયા 2014-15 બોર્ડર-ગાવસ્કર ટ્રોફીમાં હારી ગઈ હતી, જ્યારે ઓસ્ટ્રેલિયા 2-0થી જીત્યું હતું.
આ પછી બંને ટીમો વચ્ચે 4 સિરીઝ રમાઈ અને દરેક વખતે ટીમ ઈન્ડિયા જીતી, જેમાંથી તેણે ઓસ્ટ્રેલિયાને તેના જ ઘરમાં બે વખત હરાવ્યું. પરંતુ આ વખતે ભારતીય ટીમ આ સિદ્ધિનું પુનરાવર્તન કરી શકી નથી, જેના કારણે ઓસ્ટ્રેલિયાએ એક દાયકા પછી બોર્ડર-ગાવસ્કર ટ્રોફી જીતી લીધી.
ભારતીય બોલરોએ પ્રથમ દાવમાં સારી બોલિંગ કરી હતી, જેના કારણે ટીમને 4 રનની લીડ મળી હતી. પરંતુ બીજા દાવમાં પણ ભારતીય બેટ્સમેનો ફ્લોપ રહ્યા હતા. આ વખતે પણ માત્ર ઋષભ પંતનું બેટ કામ કરતું હતું. રિષભ પંતે 33 બોલમાં 61 રનની ઝડપી ઈનિંગ રમી હતી, પરંતુ આ પછી પણ ભારતીય ટીમ માત્ર 157 રન બનાવીને ઓલઆઉટ થઈ ગઈ હતી અને ઓસ્ટ્રેલિયાને 162 રનનો ટાર્ગેટ આપ્યો હતો. ઓસ્ટ્રેલિયાને આ લક્ષ્યાંક હાંસલ કરવામાં કોઈ મુશ્કેલીનો સામનો કરવો પડ્યો ન હતો અને તે આસાનીથી જીતી ગયો હતો.
