પાકિસ્તાનના પૂર્વ વડાપ્રધાન ઈમરાન ખાન જેલમાંથી આવશે બાહર ? સુપ્રીમ કોર્ટે આપ્યા જામીન
પીટીઆઈ નેતા શાહ મહેમૂદ કુરેશીને પણ જામીન મળી ગયા છે. ઈમરાન અને કુરેશી બંને સાઈફર કેસમાં આરોપી હતા. બંનેને 10-10 લાખ પાકિસ્તાની રૂપિયાના બોન્ડ પર જામીન આપવામાં આવ્યા છે. સુપ્રીમ કોર્ટની ત્રણ સભ્યોની બેંચ દ્વારા બંને નેતાઓના જામીનનો આદેશ આપવામાં આવ્યો છે.
પાકિસ્તાનની સુપ્રીમ કોર્ટે શનિવારે પેશાવર હાઈકોર્ટના આદેશને રદ કર્યો હતો, જેમાં આગામી સામાન્ય ચૂંટણીઓ માટે પીટીઆઈના ચૂંટણી પ્રતીક તરીકે બેટને પુનઃસ્થાપિત કરવામાં આવ્યું હતું. ઈમરાન ખાન સહિત પાર્ટીના તમામ નેતાઓએ કોર્ટના નિર્ણય પર નિરાશા વ્યક્ત કરી હતી. આગેવાનોએ કહ્યું કે, કોર્ટે ચૂંટણી ચિન્હ છીનવી લીધું છે, પરંતુ પક્ષ હજુ રજીસ્ટર્ડ છે, તેથી અમે અપક્ષ ઉમેદવાર તરીકે ચૂંટણી લડીશું.
સાયફર કેસ કેટલાક રાજદ્વારી દસ્તાવેજો સાથે જોડાયેલો મામલો છે, જેમાં ઈમરાન ખાન પર રાજદ્વારી દસ્તાવેજોનો દુરુપયોગ કરવાનો આરોપ છે. ગુપ્ત દસ્તાવેજને સાર્વજનિક કરીને દેશની સુરક્ષા માટે ખતરો ઉભો કર્યો હતો. પાકિસ્તાનની તપાસ એજન્સીનો દાવો છે કે ઈમરાન ખાને સંબંધિત રાજદ્વારી દસ્તાવેજો સરકારને પરત કર્યા નથી.
બીજી તરફ પૂર્વ વડાપ્રધાન ઈમરાન ખાનને સુપ્રીમ કોર્ટ તરફથી મોટો ઝટકો લાગ્યો છે. તેમની પાર્ટી પીટીઆઈ પાસેથી ચૂંટણી ચિન્હ ‘બેટ’ છીનવી લેવામાં આવ્યું છે. સામાન્ય ચૂંટણી પહેલા કોર્ટનો આ નિર્ણય ઈમરાન ખાન અને તેમની પાર્ટી માટે મોટો ઝટકો છે. સુપ્રીમ કોર્ટે શનિવારે મોડી રાત્રે પીટીઆઈની આંતરિક ચૂંટણીને અમાન્ય જાહેર કરી હતી. આ સાથે કોર્ટે પાર્ટીના ચૂંટણી ચિન્હ 'બેટ'ને પણ અમાન્ય જાહેર કર્યું છે.