દિવાળી 2023: રાજકોટમાં ‘હેન્ડમેઈડ’ ફટાકડા ચોકલેટની માર્કેટમાં જબ્બર માંગ, જુઓ ફોટો
રાજકોટવાસીઓમાં દિવાળીના તહેવારને લઈ ભારે ઉત્સાહ જોવા મળી રહ્યો છે. દિવાળીમાં નાના બાળકોથી લઈ મોટા લોકો સુધી સૌ કોઈ ફટાકડા ફોડી દિવાળીના તહેવારની મોજ મસ્તી સાથે ઉજવણી કરતા હોય છે, પરંતુ જો આ વર્ષ તમને કોઈ રોકેટ, સૂતળી બોમ્બ, શંભુ અને રોકેટ જેવા ફટાકડા ખાવા માટે ગિફ્ટ કરે તો તમને કેવું લાગશે?
રાજકોટમાં રહેતી ખુશ્બૂ ગોસ્વામીએ ચોકલેટના ફટાકડા બનાવીને દિવાળીના ફટાકડાને મીઠ્ઠા મધુરા બનાવ્યા છે. ચોકલેટ ફટાકડામાં શંભુ ચોકલેટ, ભિતિયા ચોકલેટ બોમ્બ, રોકેટ ચોકલેટ, ચકરી ચોકલેટ સહિતની અવનવી વેરાયટીનો સમાવેશ થાય છે.
રાજકોટ શહેરના જીવરાજ પાર્કમાં રહેતી યુવતીએ ચોકલેટ ફટાકડા બનાવી સૌ કોઈનું ધ્યાન ખેંચ્યું છે. ખુશ્બુએ કહ્યું કે બાળકોને ફટાકડા ફોડવા ખુબ જ ગમે છે અને ચોલકેટ પણ બાળકોની ખુબ જ પ્રિય વસ્તુ છે. એટલે મને વિચાર આવ્યો કે ચોકલેટ અને ફટાકડાનું કોમ્બિનેશન થાય તો બાળકોને ખુબ જ મજા આવી જાય.
જેને લઈ ચોકલેટને ફટાકડાની જેમ બનાવી છે. મેં ફટાકડામાં 7થી 8 જેટલી અલગ અલગ વેરાયટી બનાવી છે. જેમાં રોકેટ, સૂતળી બોમ્બ, શંભુ અને ટેટા જેવી ચોકલેટ બનાવી છે. એક બોક્સ બનાવતા અડધાથી પોણો કલાક જેટલો સમય લાગે છે. જેને અમે 700થી લઈ 1200 રૂપિયા ભાવે વેચીએ છીએ. ખૂશ્બુએ વધુમાં જણાવ્યું કે આ ઓર્ડર મુજબ ચોકલેટ બનાવીને આપીએ છીએ અને આના સૌ કોઈ વખાણ કરી રહ્યાં છે.
ખુશ્બુ સાથે પરિવારના પાંચ લોકો સાથે મળીને ઘરે જ ‘હેન્ડમેઇડ’ ચોકલેટ બનાવીએ છીએ. જેમાં ખુશ્બુના મમ્બી-પપ્પા અને ભાઈ-ભાભી આ કામમાં મદદ કરે છે. માત્ર મિલ્ક પાવડર, કોકો પાવડરના પ્રોપર મિશ્રણથી જ બનતી ચોકલેટની કવોલિટી બાબતે કોઈ બાંધછોડ કરવામાં આવતી નથી.
12 થી 15 પીસનું કોર્પોરેટર ગીફટ બોકસ 250 રૂપિયાથી શરૂ થાય છે. જ્યારે 850 રૂપિયા કિલો વેચાતી ચોકલેટમાં નાના-મોટા મળીને 100થી 110 પીસ આવે છે. ચોકલેટનો આકાર લાદી બોમ્બ, સૂતળી બોમ્બ, ભોં-ચકરડી, રોકેટ, મોટા ટેટાની સર, નાના ટેટાની સર, શંભુ સહિતનાં આકારોમાં ચોકલેટ બનાવતા ખુશ્બુબેન વિવિધ ફલેવર્ડમાં પણ ચોકલેટ બનાવે છે. જેમાં ડ્રાયફૂટ, બટરસ્કોચ, ફ્રેકલ અને પાન-મસાલા જેવી ફલેવર સામેલ છે. આમાં આર્ટીફીશીયલ કલર ઉમેરવામાં આવતો નથી. નેચરલ કલરમાં જ ચોકલેટ બનાવવામાં આવે છે. ઓર્ડર મુજબ પણ વિવિધ આકારમાં ફટાકડા ચોકલેટ બનાવી આપે છે.